امس قبل انام كنت اقرا رساله = مع هدوء الليل وبحالة كئيبه
من حبيبٍ كل مايطري خياله = أفتخر أني معه ( أجمل حبيبه )
أتجمل وأعشقه حد الثماله= يبتدي عمري معاه وينتهيبه
أكرهه كره النشامى للنذاله= واسهره من طلعة الليل لمغيبه
أتلاشى في جنونه واعتداله= واتبعثر في تفاصيل ٍ عجيبه
طيبته .. بسمة شفاياه .. إحتماله = هيبته .. صمته على ناس ٍ مصيبه
ضحكته .. وسامته .. ليل إرتحاله= لاخذاه الحزن لأحلام ٍ غريبه
أذكر أني قلت له والقلب داله= ماأحبك !! قال لي وبكل طيبه
الهوى لولاك كيف أطلق حباله = وأنتي اللي من معاناتي قريبه
قلت يعني ايش !! قلبك كيف حاله = قال عايش .. إنما بحاله عصيبه
آآه يا ايلاف يكفيه إنعزاله = وكل قلب بالحياة وله نصيبه
وأذكر أنه كفكف الدمع بشماله = قبل ماينساب من خده لجيبه
قال كيف أنساك يا أم الجماله= ياحنونه .. ياأميرة .. يا أديبه
ياغرام اشوف عمري من خلاله = ياحضن دافي كذا ثلجي يذيبه
ياوطن ماعاد يعنيه إحتلاله = ياطموح أما أجيبه أو أجيبه
وأذكر أني ضعت مرة في سؤاله = يوم قال الحب من يفرض نحيبه
قلت مدري ؟؟ قال هذي استقاله = من هواك وبس من شك ٍ وريبه
سافر لغيري وأنا ارجي وصاله = مثل من يرجي قبل موته طبيبه