ملتقى قبيلة حرب الرسمي - الشاعر معيض العجي الله يرحمه والشاعرمستور العصيمي

يشرفني ان أضع بين أيديكم محاوره جرت بين
معيض العجي..الله يرحمه ومستور العصيمي....وكانت هذه المحاوره في مدينة جده في حفل أبن صياف السحيمي

مــــــعــــــيـــــــض :

في محل اهل الوفى والطيب ورجـال الكرامـه
مرحبا باللي حضر في حفلهم من كـل ديـره
ثم اهني من حضر عقب المغيبـه بالسلامـه
والعلوم مفسـره يالله عسـى بالأمـر خيـره

مــــــســــــتـــــــور :

البقا ياشاعر يفرض علـى النـاس احترامـه
العميل اللـي يخلـص فالكبيـره والصغيـره
احسب ان شعيل الأشقر ماع شحمه عن سنامه
له سنين طوال ما اسمع لا رغـاه ولا هديـره

مــــــعــــــيـــــــض :

صاحبك يعطي حقوق الناس ومكمـل نظامـه
يشتري ويبيـع ومجـود مضاميـن البريـرة
وانت ماتجهل شعيل يشيل مخه فـي عظامـه
محتسي ممشى المشاه ومحتسي ممشا المغيره

مــــــســــــتـــــــور :

يامعيض الوقت فيه مغالطـه مـدري علامـه
حد سكينـه علـى النـاس الغنيـه والفقيـره
نعرف الرجال من فعله ومن منطـق كلامـه
لا تحـط الاولـه ياصاحبـي جنـب الأخيـره

مــــــعــــــيـــــــض :
لا تلوم اللي يحط القفش الأحمر فـي حزامـه
وانت لك شي ظهر مانتـه بـداري بالسريـرة
بعض خلق الله تضيع ابه الروابع فـي منامـه
وان صحى بلشان بين الوارده واللـي صديـره

مــــــســــــتـــــــور :

البنادم مايحاسـب غيـر فـي يـوم القيامـه
يالله انـك لاتوريـنـا بعمـيـان البصـيـره
....... بعـض الدعـاوي لا تلحقنـا ملامـه
لا توقفنـا علـى حيـد الرحـاه المستديـره

مــــــعــــــيـــــــض :

البنـادم مقتفيـه حسـاب وحسـابٍ يمامـه
وانت برق ويش لون النار في جنـب الذخيـره
مايجيك اللوم وانته مادحمـت أهـل الرغامـه
ميـر دنيانـا تـدور وصـار للجـرة جريـرة

مــــــســــــتـــــــور :

لو لزمنا المـوس يمدينـا تعلمنـا الحجامـه
ان لزمناهـا خطيـرة وان تركناهـا خطيـرة