محاورة من النوع الخاص بين الشاعر سفر الدغيلبي والشاعر تركي المطيري أرجو أن تستمتعوا بها :

يابـن سعـد هبـت هـبـوب المعـانـي=حـضـر هواجيـسـك وخـلـك وزانــي
واحسـب حسـاب العشـر قبـل الثمانـي=(إن لـم تكـن ذيـبٍ كلـتـك الذيـابـه)

الليله الليلـه نبـا نأخـذ علومـك ياسفـر=ونشوف تالي وضعك الحساس والساري سرا
أنته على وجه البسيطه يابشر مثل البشـر=ومن الغشامه ماتشوف الناس والساري سرا

سفر الدغيلبي :

عـدّل وقـل هـبّـت هـبـوب المـعـارك=كـلّـن بجـهـده يالمطـيـري يـشــارك
ومصيبـة الطـرقـي نـقـاط الجـمـارك=(إن لـم يكـن ذيــبٍ كلـتـه الذيـابـه)

الليله الليلـه نبـا نرفـع علامـات الخطـر=اصرف قصيد وحضّر الهوجاس والساري سرا
أصل القضيه كلهـا بيـن المفتـح والعـور=المشكله فـالبأس غير البأس والساري سرا

تركي المطيري :

الـعـام فالطـايـف وفأقـصـى تهـامـه=ومريحـن مـن فـوق ريــش النعـامـه
واليـوم أشـوفـك عاصـبـن فالعمـامـه=(إن لـم تكـن ذيــبٍ كلـتـك الذيـابـه)

يااللي تلد العين لا تارد على الموت الحمـر=بعض الدعاوي ماتخش الرأس والساري سرا
اللي حصلّك تذكره والخافيات أدهـى وأمـر=والطوب مايثبت بليا ساس والسـاري سـرا

سفر الدغيلبي :

فالطـايـف المـأنـوس ولا هـنـيّـا=الـرأس يقـدح بالسّـطـر والحمـيّـا
وأنتـه مرافـق فـي قصـور العلـيـا=(إن لـم تكـن ذيـبٍ كلتـك الذيابـه)

الله يستر ياتريكي لاتموت مـن القهـر=ياولد عم خليف بن دواس والساري سرا
دايم معقّدت الأمور أهل البلاسه والغدر=الله يزيل الخاين البلاّس والساري سـرا

تركي المطيري :

أخــذت لــك فالـوقـت لـفّـه ودوره=والحـال يمشـي والأمــور مخـبـوره
وأنا مـع أهـل الطيـب واخـوان نـوره=(إن لـم تكـن ذيـبٍ كلـتـك الذيـابـه)

ماباقين لك غير خمس أيام وسبوع وشهر=وتصير مثل الحبر فالقرطاس والساري سرا
لوتنشد الروّاد يالمقرود عن سطح القمـر=قالوا لعله مايجيك البأس والسـاري سـرا

سفر الدغيلبي :

ماأخاف غيـر الله ولا اعبـد ولا ارجـي=إلا العليـم بسـرّ هـرجـك وهـرجـي
وأنتـه مـع الحكـاّم لكـن سفـرجـي=(إن لـم تكـن ذيـبٍ كلتـك الذيـابـه)

وأنته بعد ماباقين لك غير جزء من الدهر=وتصير مثل البن فالمحماس والساري سرا
بعض الأوادم من جنونه صايبه جن البقر=لاهوب لامهلهل ولا جساس والساري سرا

تركي المطيري :

سفـر رثــع فالشـعـر ينـهـد بيـتـه==وحتيش لـو هـو شـاع ذكـره وصيتـه
مايـدري أنـه قهوجـي فــي حويـتـه=(إن لـم تكـن ذيـبٍ كلـتـك الذيـابـه)

خل السوالف مير بكره سو لي دله عصـر=وأحسب حسابك لايجيك نعاس والساري سرا
الهرج واجد ياجماعه والسموحـه والعـذر=بعض السوالف مالها مقياس والساري سرا

سفر الدغيلبي :

تـرا الـكـلام الـلـي تـقـول اشـرفـن لــي=أعــد نفـسـي قهـوجـي فـــي مـحـلـي
وأنـتـه عـلـى بـيـت المـعـزب تـهـلّـي=(إن لــم تـكـن ذيــبٍ كلـتـك الـذيـابـه)

أكله ماغيـر اتقسمـه واحـد نفـر واحـد نفـر=وتقدّم المويـه بوسـط الكـأس والسـاري سـرا
حـــــنّـــا نـــــعــرف الحصني اللي كلّما ردّد جحر=ماله مع اسباع اللحم مجلاس والساري سرا

تركي المطيري :

أنـا مـع أهــل المعـرفـه ماتحـيّـر=وأنته مسيّـر غصـب مـا انتـه مخيّـر
إتــدور الشـرهـات عـنـد القصـيـر=(إن لـم تكـن ذيـبٍ كلـتـك الذيـابـه)

مهنتك معروفه ليا قدم لك البـن الخضـر=لكن أبا خذلي معك مرواس والساري سـرا
ياوقتنا ياوقتنا يا اللي على بطن او ظهـر=الشعر في تال الزمان انحاس والساري سرا

سفر الدغيلبي :

تـرا القصيـر مـن طويلـيـن الأشـبـار=أحـرار ومصاحـب بنـي عـم وأحــرار
يامـدوّر الشرهـه وراء عـمّـك الـفـار=(إن لـم تكـن ذيـبٍ كلـتـك الذيـابـه)

حنّا لياقمنا حشرنا اللـي يخاصمنـا حشـر=قدّامنا مايهلس الهـلاّس والسـاري سـرا
صح الشعر من عقب ماجا تركي ألفين اندمر=قدّام صفّه يضرب المرواس والساري سـرا

تركي المطيري :

عــز الله إنــي مانـويـت المـشـاكـل=لكـن بعـض الـنـاس مـثـل الهيـاكـل
فاتـح فمـه مـن شـان يشـرب ويـاكـل=(إن لـم تكـن ذيــبٍ كلـتـك الذيـابـه)

يادغيلبي مالك معشّـا قـدم حمـران النظـر=ندخلك في كيس"ن" من الأكياس والساري سرا
أنا من أهل الشعر والوقفات وانحت من حجر=وأنته من اللي يطبخون الفاس والساري سرا

سفرالدغيلبي :

أكلـي وشربـي مـن فمـي خلـقـت الله=المشكلـه فيـك أنـت يابـن عـطـا الله
اتشـرّبـك شـلّـه وتوكـلـك شـلّــه=(إن لـم تكـن ذيـبٍ كلـتـك الذيـابـه)

أنا تراي لمثلك او شـرواك علّـه فالنحـر=كم شاعرن تحت قدمي إنداس والساري سرا
مالك شعر غار المهازى والمخازى والعيـر=ماأنت ابلها لادقّت الأجراس والساري سـرا