كم ليلة ضليت ضايق ومحتار = واحس في جوفي كما واهج النار
الفكر تاه ورحت اقسم فالافكار = بين الرجا والياس عندي خيالات
لكنها هانت وحصلت طبي = حيث الدوا موجود في ذكر ربي
ولين ذكر الله مرادي وحبي = كررت انا التوحيد ثم الصلوات
قالوا علامك قلت ياما وياما =عانيت من سقم اللحم والعظاما
صابر على حالي وكثر الالاما= والصبر عون المرء وقت المهمات
بلاوي الدنيا خفاف وثقالي= لاجات ماعنها مناص ومحالي
الدهر طبعه بين مر وحالي = والحمد لله كل ماجت سلامات
عانيت من كثر الطلب والحفيلة= الوقت قاسي والمصالح قليلة
كافحت لين اني كسبت الجميلة= وش عاد يبغى الرجل غير الجمالات
الرزق عند الله مقدر ومضمون = والناس تبغا العالية ماتبا الدون
احدِ يجيه المال باليسر والهون = واحدِ تعب فيها ولا سد حاجات
والمسعد اللي مايبيح سدوده= صابر على مابه وكثرة لهوده
يثبي كما عدِ تكاثر وروده = والجم ماتغطيه كثر النثيلات
يبذل معاريفه ومده وطيبه = يالو حصيله غير ماحاش جيبه
الطيب يبذل للبعيد وقريبه = باب الوفا مفتوح في كل الاوقات
وان صار لك موقف وتحتاج حله = انصا الكريم وكلمه في محله
ترى الكرام تنوب وقت الله الله = ولااحدِ غني عن صحبته والقرابات
ولاتكون فامر الله كثير الطواري = ولاتردها مابين بايع وشاري
ماقدر المولى على العبد جاري= ولا ينفعك غير الصبر والدعوات
والموت لابد البنادم ملاقيه= حتى لو ان العمر طالت لياليه
هذا الاجل له حد لازم يجي فيه = والرابح الخارج بحسن الختامات