ملتقى قبيلة حرب الرسمي - ( ياطيبكم يااهل القلوب النّظيفه) ....مجالسي

/
/
/
/
/
/
/
/
/
/
/
/
/
/
/

ساعة بديت القاف والقاف مليان=حبر القلم ترجمّ ويملي له لسان
ينبيك عن واقع فياكان ماكان=(والتّرجمه حاضر بحاضر وفالحال)
يلقى بها القاري معاني توضّح=مثل المزاين بين شعلٍ ووضّح
ممّا وجد فالصّدر فضفضّ وفضّح=(شاعر جميل اسلوب في حبك الامثال)
وقال الجريدي والجريدي مفوّه=رجّال فيه الخير فيه المروّه
الله عطاه العرف والعرف قوّه=(واللي يعرفه يشهد بكلّ ماقال)
رجّال وافي مايخون الرّفاقه=وايجود لضّيفان لو فيه فاقه
ولدّار والحكّام عهد وصداقه=(ولايخونها لو كان يشكي من اللال)
مذكور صدقه مامشى بالنّميمه=عزيز نفس وفيه طيبه وشيمه
ولايغدر الانسان لوهو خصيمه=(مشهود له بين الرّجاجيل رجّال)
والاحمدي خالد يقول الصّراحه=لو كان قوله يزعل اهل الوقاحه
ماعاد عندي فالمجامل مساحه=(ونهجي على نهج الكريمين لازال)
انا لقيت الظّلم ماله مبرّر=والله لابدّه بحقّي يقرّر
وحسبي على اللي بالخلايق يغرّر=(وابليس له مثله من الانس دجّال)
قامت عليّ اضروف الايّام تطغى=ونّيت منها واذنها لي مااصغى
عيّت معي تمشي على كيف ماابغى=(وبالصّبر اجمّلها عسى الهمّ ينزال)
وظلم البعيد اللي به الهمّ صالي=فاقه بجرمه جرم ظلم الموالي
اللي بعد لنّه شرب من دلالي=(عقّب بوسط الصّدر بالغيض زلزال)
وياكم صاحب كان عندي مقرّب=وانا له ابحزّات ضيقه مجرّب
واثره على الغدرات جندي مدرّب=(روحه وجيّه كلّها كذب محتال)
يبدي لي انّي صاحبه وابن عمّه=بسّ الحقيقه صحبتي ماتهمّه
مغسول وجهه بالمرق دون ذمّه=(يبغى يساوّم في رفيقه على اريال)
وياكم جار ايضيق من شوف جاره=لو كان ماضرّه يجيه ابعياره
وقت المكاسب فيه تقلب خساره=(تنعاف ياوقتٍ للاعدال ميّال)
وياحيف ياللي تخلفون النّوايا=ومن فوقكم واحد يشوف السّوايا
سبحانه اللي عالمٍ بالخفايا=(والرّعد سبّح له بحمده بالاجلال)
الله ياطيب القلوب النّظيفه=تكبر سعادتها ولاهي كليفه
ناسٍ عفيفه والنّوايا شريفه=(ولاّ القلوب السّود فصدور الانذال)
والنّذل لو تعطيه سرّك يضرّك=خيرك معه يصبح على النّفس شرّك
ومنه العواقب دايماً ماتسرّك=(بعدك عن دروبه ثمنّ راحة البال)
لاتصاحب الا حرّ فيه الفلاحه=وجهه سفير وفيه دين وسماحه
يمكن صلاحك للتقي مع صلاحه=(تقوى علاقتكم وتظفر بالآمال)
ولا تجاري اللي بالجهاله يجاهلك=اعفي عفو حكام وابدي تساهلك
يمكن يموت بغيض سبّة تجاهلك=(والحلم فالاخلاق رتبة جنيرال)
وابعد عن اللي لاعملته يشينك=يبقى فتاريخك معيّر سنينك
ولطّيبات اعزم وربّك يعينك=(العزم فيه البخت والرّب حلّال)
وياربّ ياعالي وداري بحالي=يامرسل الما بالسّحاب الثّقالي
ارضا عليّ وخلّ جنّتك فالي=(وبارك لي ابحالي وجاهي وبالمال)
ياالواحد اللي ماخفا عنك خافي=نومن بعفوك من عذابك نخافي
اجعلّ لنا التّوفيق ستر وعوافي=(وطالبك حنّبنا شماتات عذّال)
وطالبك ورّدني على حوض مورود=حوض الذي له عندك امقام محمود
واعداد مافالبلّ حاشي ومفرود=(صلّي على المصدوق يافرد متعال)

الشّاعر / خالد بن عبيد بن معتوق ألأحمدي