يطلب حواري باللقا عدم الاجناس=فالملتقى حدّده من طيب نيّه
حيثه له اجهوده تثمّن بالالماس=في صالح الموروث نفسه صخيّه
يجري مع الشّعار والهرج بقياس=بتحاوره يظهر علوم ٍ خفيّه
تخفى عن الجمهور تظهر على ساس=يعرف خفايا شاعره والهويّه
وساعة دعاني شاف في مطلبه ياس=جاه اعتذاري ضاق منّه شويّه
ومن شان مايلحقه من يمّنا باس=بكتب قصيده بالتّحاور وفيّه
قصيدة اللي رادع لكل مقّاس =بنبيك بالخافي على المقدريّه
واسمي ماهو خافيك معلم ونبراس=من حدّ اكيهف لا وصلتي طميّه
اعرف ترى خالد بن عبيد حسّاس=بمعامل العربان نفسه نقيّه
سلطان مجلس معه مايملّ جلاّس=في خوّته تنزال ضيقة خويّه
ونوبات اموري كنها ليل بدماس=عندي تحفّظ نوب ميّه بميّه
لي وضع معجبني ولا يرضي النّاس=هذا ولا للنّاس حكم ٍ عليّه
عايش وحيد ومشتري راحة الرّاس=انسان غامض حاروا النّاس فيّه
واليا بغيت احتك ماصاحب انجاس=اختار بالرّفقه زبون الحميّه
وباللي يخصّ الشّعر نبذه بكرّاس=بعطيك فيها علم مااعطيت زيّه
مبطي فبحر الشّعر سابح وغطّاس=وهبه من اللي مانحصّل سميّه
اكتب قصيدي مقصدي منه نوماس=مادوّر الشّهره ولو جات ليّه
راحه ومتنفّس ليا صار هوجاس=سيطر عليّه بالفرح وآلاسيّه
تعبير حسّاس انكتب فوق قرطاس=ببيات نوزنها مع الشّاذليه
وفساحة الشّعار مابان الافلاس=لسّاعها بالجزل ساحه مليّه
منهم تعلمنا طرايق بها ايساس=والموهبه تورث ولاهي عطيّه
وصلّي على اللي كان للدين درّاس=محمّد المرسول خير البريّه
اعداد مايهطلّ على قاع مدراس=بمزون تمطر بالضّحى والمسيّه