سلام يا رمز الأدب والدين وبحور القصيد=ياللي بنيت أمجاد وصروح ما تمحاها السنين
إنت بزمنا أكبر عطايا وقتنا وأغلى الرصيد=ولا أقول غير الله يخليكم ذخر للمسلمين
أهلا هلا بالشاعر المقدام والشهم الرشيد=في حضرتك ننثر سنابل كادها والياسمين
إليا ذكر تركي ذكرنا قصة القول المفيد=أقطف زهور الورد من شعره على مر السنين
الله يبارك فيك ياللي كلما زادوا تزيد=وتبني من الأشعار ما تذهل عقول السامعين
النار فاتح بابها والموت في حبل الوريد=لكن متى تصحى قلوب الغافلين النايمين
ذكرتني بالنابغة والبحتري وابن العميد=مجالس المأمون في بغداد وأيام الأمين
معاوية نمدح علومه مير ما نمدح يزيد=وش لون نمدح من توهق حيل في قتل الحسين
هذي شهادة والشهادة منك يا دكتور عيد=نبي نعلقها على جدار الزمن للتابعين
أحد بها الدنيا شقي و أحد بها الدنيا سعيد=تمر دورات الزمن والعاقبة للمتقين
أبي أرسل الأشواق لكن كيف يحملها البريد=أحسن نوصلها وليلة عيد شوق الطيبين
أرجوك خبّر كل مخذول وشيطان مريد=قبر الغزاة ديارنا وحنا عيال الفاتحين
ضاعت حلول المشكلة يا شيخنا مابه جديد=إلا غرور أهل اليسار وصمت أصحاب اليمين
مدري نقول لما مضى من وقتنا ليته يعيد=وإلا عليك نهل كل الدمع يا بدر وحنين
اليآس ذنب وعندنا أحفاد المثنى والوليد=والشبل من ذاك الأسد وأرض الوطن كله عرين
من يعتصم بالله ربه عاش في عمره سعيد=يبشر بحفظ الله له ويكون في حصن حصين
حنا بلشنا بالقريب اللي عرض دون البعيد=يا صعبها لا حولت ما بين خشم وبين عين
الجرح مبطي مابرى والصبر ذاب مع الجليد=ولا أقول غير الله يعين القانتين الصابرين
حنا تعودنا على طحن الحجارة والحديد=ولا نخاف الموت لنّا للجنان مسافرين
عدونا والله ما يحميه زيد ولا عبيد=على جماجمهم نشيد مجدنا الباهي المتين

مشكور وبيض الله وجهك على هالنقل الجميل