سر ياقلم واكتب بيوت(ن) جزيله= من خاطرن قامت تشيله نواياه
لاصار عندك حاجة(ن) مستحيله= ودك على شيئ(ن) ولا انته بوياه
دور لها أميرن يحوش الجميله = شيخ (ن) علامات الوفاء في محياه
يمناه في كل المراجل طويله= يشيل حمل(ن) ماتشيله مطاياه
الطيب كايد بالامور الثقيله=مايدركه الا أهل الطيب والجاه
الناس واجد مير وش ندعيله= اعرف مواكير الحرار المسماه
من غير قاصر في شيوخ القبيلة=سلم على محمد زبون المخلاه
محمد حفيد متعبين الاصيله=محمد ابن رداس لاجيت تلقاه
شيخ(ن) كبير ولا يبيله دليله= مثل الجدي من بين ذولا وذولاه
بيته مناعير النشاما تجيله= وانا ومثلي لااعجزه شي ينصاه
مااقول فيه الا الخصال النبيله= ريف الضعيف وفيه شرن على اعداه
عوق السمين ام الشحوم الجليله= وعلى الجمر دايم دلاله مراكاه
يزهى المدح والطيبة تستويله= راعي نسب والطيب ورث(ن) من اباه
وقصايدن في أبوه ماهي قليله= غنو به الشعار والصدق منجاه
الناس تعرف كل شيخ وحصيله= ولولا الوفاء كل الاوادم مساواه
وانتم هل الوقفات واهل النفيله= زبنت ابن رداس من طيب مجناه
من لابة(ن) تروي السيوف الصقيله= ترعى الخطر لازان نبته ومرعاه
ترعى بهم وضحى شناحن طويله=يوم الزمان اللي تعاوى ضراياه
واليوم في ظل الجبال المهيله= امن وخير كاثراتن مزاياه
ليا مشى الطرقي ماينقل صميله=وحكمن عساه يدوم للناس بغناه
يامحمد الدنيا بها كل ميله= والعسكرية دونها شروط مآذاه
ماعاد عندي ياابيض الوجه حيله=وهداج جمه يبهج الورد من ماه
اسري مع الهوجاس في كل ليله=وهمن يزايمني على الله مشكاه
انخاك بعد الله شف لي وسيله= واللي فعل معروف مأ والله انساه
واطلب من المعبود بكرة وأصيله=وان ماجزيته والي العرش يجزاه
وصلاة ربي عد وبل المخيله= على النبي باول كلامي وباتلاه