البيت عقب الكار للضين منصوب=للضين عود يابو صالح اضلالي
بيت الشعر من عقب ما هو بمرغوب=اصبح كما فيٍ عقب طال زالي
اقفى زمانه وقفت الشمس بغروب=ولا عاد باقي له على الارض تالي
شرايده تلقاه بالسوق مجلوب=من عقب كاره دوروبه ريالي
وجو الحضاره صار للناس عذروب=نسيو مساكن طيبين الرجالي
يا ربع انا قلبي مع البيت مشغوب=أنا أشهد إنه نال كل الجمالي
أول جماله شوفت الضو مشبوب=والنجر قدمك خلف صفر الدلالي
هذي لها عندي مقاييس وسلوب=وتزين كان الجو جابه اخيالي
بيت الشعر عندي فلا هو بمغلوب=يا زين شوفه بالطويله يلالي
بيت الشعر زينه كما زين رعبوب=ما خبلك ياللي ناصبه للحلالي
وعشنا بيت الشعر وبيت مصبوب=في ذمتي ماذا لهذا يحالي
ويلومني من طاح بالببس والروب=خبلٍ بليدٍ من نبا العرف خالي

يا معيض أنا جيتك على الذكر يا معيض=يوم أنت رجل ومدهلٍ للرجالي
جيتك ولي عندك لزوم وملاحيض=أبيك تفزع يا كريم السبالي
ولو مالكم بالطيب فعل ومراكيض=يا بو علي ما سقت يمك رحالي
عرق الندى يندى ولو مسه القيض=تلقى بظله للنشاما ظلالي
وذكر الحياء يظهر له رسوم ويفيض=ويبين لاركب الرشاء للمحالي
وإلى وصلك العلم موفى بتحميض=يا معيض أنا أعدك لنا راس مالي
أشهر جناحك يا بعيد المناهيض=وانته معودنا لصيد الجزالي
وإلى أنهيت موضوعي اكفيت العواريض=والين معروفك بنا أول وتالي
قبلي ( سبيل ) اثبت فعايلك يا معيض=بالموقف اللي له على الكبد صالي
وقفت به ما طاب للعين تغميض=لين الليالي مرها صار حالي
لعل تفداك الوجيه المباغيض=اللي عن الطوله يجيهم جفالي
هذا كلامٍ معتبر نوع تفويض=منخي وأنا ابنخى تخوت الجمالي
ولآني بقول افرض على الناس تفريض=أوقف بجاهك يا نزيه القبالي
وأسلم ودم وانته عن الروح تعويض=ويبقى على المعبود كل اتكالي
وصلوا عدد ما يكشف البرق وينيض=على النبي عداد وبل الخيالي

الشاعر / سعود بن صالح الحصني

يا شعر لا تكسب بمن حبك ذنوب=حبك بقلبي والشقا منك جاني
مالك وراء سهري مصالح ومطلوب=وشبك على صعب الدروب تحداني
كم مرة قررت باترك وتوب=وقفل مجالك صدق وكوي لساني
اتعبت قلبي وشتكا غيري قلوب=كم واحد عانى من اللي نعاني
ولا قول مالك وفقةٍ تقضي النوب=لك وقفةٍ تحسب كبار الحساني
وعند النشاما لك مكانه ومرغوب=وتشبه بمجلسهم سهيل اليماني
تشهر محاسن طيبٍ ما به عيوب=رجلٍ على الجزله عضوده متاني
يحرص على الوقفات في كل ما جوب=وقفت رجل ما هي بوقفة هداني
ولك بالطبيعة وصف وافي ومحسوب=ليا طاح وبل الوسم والكيف زاني
ليا قمت اخيل البرق عن داري غروب=مع العتيم وحالك الليل داني
برق تقل ضوٍ من السمر مشبوب=من شاف براقه ثبت فالمكاني
فيه يتأمل يدفعه شوق وعجوب=ويشوف مع برقه هميل الغشاني
وليا اصغيت سمعك لرعد تسمع ضروب=ضربة طبول مرددين الاغاني
وليا اصبحوا وليا الوطا كله دروب=والسيل قثوه فوق الاشجار باني
وهواه لا بارد ولا هو بلاهوب=شمة هواه دواء الضلوع المحاني
هكا النهار بصوب والناس في صوب=تصير عندي في معزة اخواني
العب طواريقك هجيني ومسحوب=مع دلةٍ بالهيل والزعفراني
مع كبش مصلاحٍ من البدو مجيوب=وخوة نشاما كلبوهم عواني
ما بينهم رجلٍ قصاوي وسعبوب=الكل منهم لردى ما يداني
هذي طراتك لصفاء كل مشروب=ولا الحقيقة تالي العمر فاني
وختامها صلوا على اعز محبوب=نبينا المبعوث رحمة واماني

الشاعر / سعود بن صالح الحصني

جيتك وانا اطلب فزعتك يابوراكان= في حاجـة ليـه وعنـدك خبرهـا
حربي ونفخر بك وتذخر على شـان=لا جاتنا صعبة تقـف فـي نحرهـا
الجهد عيا يبين في وسـط عميـان=والسمعة القشـرى تـزود قشرهـا
الكتله اللي سممـت كـل الابـدان=تكفـا تجنبنـي بـلاوي خطـرهـا
لو مانت حربي كان ما جيت شرهان=ولا سقت لك قيفان فكـرٍ صخرهـا
وانته تراك بموقعـك يـا كحيـلان=لنا مثـل دوحـة يظلـل شرجهـا
مدام معك عيـون ويديـن ولسـان=تقـدر تميـز برهـا مـن بحرهـا
افزع ترى الاحسان يجزى بالاحسان=يابن الرجال اللي تنومـس سيرهـا
لا روح انا يا مسندي في خبر كان=عينـك علينـا لا يقصـر نظرهـا
خلك لنا يا مذرب الشـور مزبـان=يوم الحميـة فيـك جـدك ذخرهـا
وسلم وسامح وعرف العلم نيشـان=والطيبـه لا جـات كلـن ذكرهـا
والطيـب للرجـال رمـزٍ وعنـوان=وطيبـك يـزود للقبيلـة فخـرهـا
هذا من الحصني بشكـرٍ وعرفـان=والطيبه فـي طيـبٍ مـا خسرهـا
بين لك المطلوب يا طيـر حـوران=وانتـه تملاهـا وعطنـي خبرهـا

قالوا تقول الشعر قلت ايه اقوله=لكن ما اقوله على غير معناه
ماني من اللي دوم تقرع طبوله=يشن هجماته ولا يرهب اعداه
لا شاف طفقين العرب صفقوله=قام يتكسر ويتهايل من اقصاه
باسبوع ياخذ له ثلاثين جوله=ولافيهن اللي تشتقيله وتقراه
يحسب كثر الشعر كسب البطوله= ما يدري ان الشعر به داه ودواه
به داه لا جيته على غير اصوله=ودواه كانه وافق الكي مكواه
قلته عقب ما قست عرضه وطوله=وشفت الهدف قدمي وجودت مرماه
ولا قلت قول اجوده عن ميوله=ولا اترك مجال لناقد الشعر يقفاه
الشعر كنز مبهماتٍ قفوله=حصن منيع ان ضيع الخصم مسراه
لكن يابغى من رجاله زحوله=ماكل ماثارت عجاجه تنصاه
يبغا رجالٍ ترفعه عن سموله=وتنزله منزال عالي وترفاه
وبعض التقصر يالنشاما رجوله=ومن طال عمره يا صل اللي تمناه
لابد ما تكثر على الماء نزوله=وياصل لمقصوده ولا يجيه ماذاه
ومن قام يرثع كل وادٍ يحوله=اكيد يمشي به على غير مشهاه
يبي يشوف من الشعر ما يهوله=وايضا إن ياسمله على الكبد عرقاه
وبعض التصنع بالدعاوي هزوله=اليا صار ما شوف الرجل قطر ممشاه
وبني على المجهول ساس الجهوله=ومن ما مسك راس الرشا ما شرب ماه
وكلٍ على ما قيل يلقى محصوله=وجميع ما يزرع يحصده بيمناه
هذا كلامٍ مختصر به حلوحله=للي نشد عن قاصي الشعر وادناه
وعداد قطرات المطر والطلوله=صلو على اللي نزه الله مزاياه

الشاعر / سعود بن صالح الحصني

للشعر في كل المواقيف مـا جـوب=ومن واجبه يا جب علي استجيبـي
وصور الواقـع بمصـداق وسلـوب=ما زود الواقـع ولا ظلـم نصيبـي
وحرص على ما قول لا يجيبه عيوب=وشفق على جزل الكـلام المصيبـي
وللمـدح باللـي يستحقونـه دروب=فعل اليمين وشيـل حمـلٍ صعيبـي
وانا حصلي موقـفٍ شبـه منكـوب=غديت كنـي بيـن الامـه غريبـي
ماغير اطالع مشرق الشمس وغروب=وضنيت زخات الهجـوس تغديبـي
قام الفكر يـدرج مساعيـه ويلـوب=وذكرت ملفي صاحـبٍ مـا يغيبـي
ملفي رجل وافي ورجـال محسـوب=وفـى وكفـى طيـب وزداد طيبـي
وصلني اللي جاب لي كل مشـروب=صافي عقب شوف الكدر والسريبـي
نصاني محمـد زبـن كـل منيـوب=وهـلا وناطحنـي بصـدرٍ رحيبـي
قال اترك الموضوع ما لك بذا صوب=رسالتـك مقرهـا وسـط جيـبـي
باذن الكريم اللي خلق خلقه شعـوب=لجيك فـي علـمٍ يسـر الصحيبـي
قال وحما ما قال ما فيـه عـذروب=وفـى الوسيـدي دون شـكٍ وريبـي
والمدح والتمجيد والطيب له ثـوب=ويستاهل اللـي لا نخيتـه يجيبـي
نعم الرفيق وعز من جـاه مكـروب=عليه فعل الطيب مـا هـو غريبـي
مـن لابــةٍ يثنون لا دخــن الـشـوب=على المهـار ملافحـات السبيبـي
عزوة هل البلهاء ليا جوك جنـدوب=في هيـةٍ يشـوش فيهـا اللبيبـي
يوم القبايل بين سالـب ومسلـوب=وديارهـم عنهـا الاعـادي تهيبـي
واليوم امان ولاش طالب ومطلـوب=فـي ظـل حكـامٍ تهـد الصعيبـي
في ظل ابو متعب ذرا كـل منكـوب=دستـوره القـرآن سيـفٍ صليبـي
الله يديمـه للمسلميـن منـصـوب=ولعل شمسـه دايمـه مـا تغيبـي
في جاه ربٍ عاد يوسـف ليعقـوب=يحمى لنـا ذخـر البـلاد العريبـي

لو كان نعلم ما يخفي لنا الغد=ونعلم عن اللي في لياليه يجينا
كان البحر يركد عن الجزر والمد=وأيامنا تمشي على ما بغينا
لكن نمشي يم أجالٍ تحدد=وأرزاق يكتبها الولي بالجبينا
قلته وأنا ليه من القول مقصد=وقتي مشيته في قساوه ولينا
وإلا أنت يا سامع كلامي توكد=وقارن مصيرك مع مصير السنينا
ان كان زان اليوم بكره تعقد=ذي السنين وطبعها اللي لقينا
وقبلي وقبلك كم شيٍ بها عد=كم عددوا لك مرخصين السمينا
أحد بها ناعم ومترف ومسعد=ويجني ثمر غرسه من المسعدينا
واحدٍ بوجه كل درب مسدد=وتعقيد وقته ما ذكر له وزينا
قلته وأنا يا صاحبي لله احمده=وليا عطانا الله شيٍ رضينا
وصلوا عدد ما كيل بالصاع والمد=وعداد ما طب الحرم محرمينا
على النبي الهاشمي خير من عد=صلوا عليه عداد وبل الغشينا

سعود بن صالح الحصني

الشاعر / سعود بن صالح الحصني

ابـو هليـل بالمجالـس فقدنـاه=وغيري رجـالٍ فاقدينـه كثـارا
انشهد انـه للمساييـر تنصـاه=وانشهد انه للكـرم شـب نـارا
القل صاطيبه ولا اخلف مزايـاه=كلمة هلا يا مرحبا لـه شعـارا
وش خانت الدنيا ولو قيل محلاه=حلاتهـا متعلـقـه بالـمـرارا
يومين تمشي لك على كل مشهاه=واليوم الاخر مشيهـا بنحـدارا
الموت حق وكل شخصٍ ميبغـاه=لكن مـا دونـه مـلاذ وفـرارا
مارالحظيظ اللي ليا كـب دنيـاه=عامل عمل لحساب قبـرٍ هيـارا
لحساب قبرٍ كل مدرك ما ينسـاه=هولٍ فضيـع وشـدةٍ وانحشـارا
ِلحظات ويميز بها كـل مسعـاه=إما ربح وإلا يشـوف الخسـارا
فيه الندم ما يفيد والحكم يلقـاه=يالغافلين اصحو لـدار القـرارا
اصحو قبل هدام تبـرك مطيـاه=تبـرك ويظلـم فيـه هكالنهـارا
هذي نصيحه للرجـال المسمـاه=اللي بهم للعـرف قـدر وقـارا
والا بليد القلب سـاري بعميـاه=ما سر نفسه لجل يسمع ويـارا
صغت البيوت وسقت قافي ومعناه=والقصد بيـن للرجـال الحـرارا
واختم كلامي يا سعد مثل مبـداه=والطيب والطيب ما حطه ايسارا
اذكر مواقيفه وامجـد سجايـاه=قريب والا مـن بعيـد الديـارا
وصلوا عدد من صام لله وناجـاه=على محمد خير من جاء وسـارا

القاف سقته كما العادة بمعنـى ثقيـل=اثقل من طويق واثقل من جبال الهـدا
روابعٍ بالحشى قامـت تحـط وتشيـل=قامت تصول وتجول وجوها مـا هـدا
ومن الهواجيس قلبي صار ميدان خيل=الا انتهى شوط الشـوط الاخـر بـدا
ميدان للحصن كل حصان يصهل صهيل=بين الظلوع المحانـي للخيـول معـدا
همٍ يشد الرحـال وهـمٍ تـوه نزيـل=كثرة همومي ولكـن ملحقتنـي مـدا
لو يكثر الهم كشف اسرارنا مستحيـل=وش عاد لو كان كثرنا الغناء والحـدا
الا على راعي الميقاف زبـن الدخيـل=اللي ليا كبرت القـالات عنهـا حـدا
والا انا اوجه كلامي للرفيـق الزميـل=اعطيته العلم رمـز ويعتبـر مشهـدا
حيثه محنك ولا جاهل ولا هـو هبيـل=وفوق الجبال الرواسي صار له مصعدا
والحر مثلك مواكيره بـراس الطويـل=تندا من الطيب كفـه والـردي مانـدا
يا سعود محدٍ كفل ميل الدهر لا يميـل=ولا كل من يطلب النجده يحصـل جـدا
صحيح قول المثل محدٍ يخـدم البخيـل=والهرج بالهمس يا رجال مالـه صـدا
صحيح وقتٍ تغير واصبح الراس ذيـل=وبعض العرب لو يسوي طيب يلقى ردا
يا معرب المنسبين الله يرحـم سبيـل=يقول وش خانت المعروف كانه غـدا

يا مرحبا بالرساله عـد بـرق المخيـل=من مدلهمٍ من اصبحنا وهـو لـه سـدا
برسالةٍ مـن دليلـه مـا يـدور دليـل=ما هو من اللي اليا ساق القوافـي غـدا
اليا وقف موقفـه بيـن البرايـا نبيـل=العارف اللـي بـدرب العارفيـن اقتـدا
والعارفة يا علي ما عاد يبغـى تعديـل=وحنا ترانا لكـم وقـت اللـزوم عظـدا
لو كانت رسالتك قدمي تقـل حـد ليـل=وحطن الافكار في صدري لهـن منتـدا
حسيت في وسط قلبي مثل قـدح الفتيـل=من الرسالة وشكواهـا وصـوت النـدا
حيث الندى من علي ذباح للضيف حيـل=يقول همه بصـدره والهجـوس تحـدا
سون بقلبه لك الله مثل جـرح المسيـل=وهجرس وغنى ويمـي بالمثايـل شـدا
وان كان همك من الدنيا مواجهـك ميـل=جميع مملك لعينـك يابـن عمـي فـدا
وان كانها ضدةٍ من نـاس فانـا القبيـل=انا اسنادك بحـال الـى طلبـت اسنـدا
وان كانها من هروج منفضيـن الزبيـل=اللي على غـرت الغافـل تسـوي غـدا
ارفع مقامك عن العـي البخيـل الذليـل=الحر يشهر جناحه كـان شـاف ازهـدا
العوشزه ما ذكـر للحـر فيهـا مقيـل=لا تصير عرضه لهرج الناس عيل وقـدا
اليا صار ما انته بحاجة نا كرين الجميل=خلـك بحالـك ولا ترقـب بزلـة حـدا
ذي دبرة الله بخلقه به هزيـل وجزيـل=ولولا اختلاف البشر ما صار طيب وردا
والا ترى راعي المعروف سيفه صقيـل=لابـد يظهـر لمعروفـه وطيبـه صـدا
ومن يفعل الطيب والمعروف ما هو هزيل=الله وخلقه اليـا جالـه مجـال اشهـدا
وهذا كلام الحقيقه مثـل يـوم الرحيـل=الله هو اللي على درب الصـواب يهـدا

هذه القصيده مهداه للاخ / هليل بن يوسف السليمي نظير ما قام به جهد
ـــــــــــــــــــــــــــــــــــــــــ

الشعر في واجبه ما هو خسـاره=خص في مدحة مداغيش النشاما
عشت يا راسٍ زمام الطيب كاره=فزعتك تروا بهـا كبـودٍ حيامـا
هكذا الوقفات يا نمـر النمـاره=يا بعد ناسٍ عن الفزعة صيامـا
يوم جوه الربع ما كثـر عـذاره=فـز فـزة مستذيـرات الادامـا
حط كفه فوق صدره في جـداره=وقال ما يفك اللحـام إلا اللحـام
وباشر الموضوع وعطانا قـراره=وانتهى الموضوع في وضعٍ تماما
اشهد ان عرفت مثل هذا تجـاره=ونعم بك يا الذيب يا نسل الكرام
يا بو يوسف خذ كلامي باختصاره=للجزيلة نلـت مـا فيـه كلامـا
رجل مثلك موقعه وسط الصداره=موقعٍ يجمـع عزيزيـن المقامـا
ودام راسك للحموه به صطـاره=تستحق المدح ورسلـك وسامـا
في بيوتٍ منتقيهن فـي مهـاره=ما عليهن درب نقـد ولا ملامـا
يا صلٍ يم السليمـي وسـط داره=وسط بيـتٍ دايـم فالعـز دامـا
وعرف ان الحر تكفيه الاشـاره=والاشاده واجبه وايضـاً إلزامـا
وطلب اللي فك طآها وسط غـاره=ناصل العليا على حسن المرامـا
والختام اقـول مطلوبـي زيـاره=حددوها يـا الرياجيـل الكرامـا
مثلكم نعطي على شوفه بشـاره=وساعةٍ معكم تساوي نصف عاما

يا بدر قلبي كـل مـا قلـت يرتـاح=طرى عليه من الهواجيـس طـاري
هواجسٍ يا بـدر تشبـه للارمـاح=تدق في قلبـي صبـاح وعصـاري
بعض الليالي اسهر الى حد الاصباح=وواصـل التفكيـر باقـي نهـاري
لاون دنيا البيـن مسـرح ومـرواح=ما هي بغبطه مـار هـذا اجبـاري
حصيلنا منها الشقاء قبـل الاربـاح=والا العفو واللطـف بيديـن بـاري
واللي كتب للعبد في ذيـك الالـواح=من عقب ما هو غيب يصبح اجهاري
لكن بسـل النفـس بيـام الافـراح=دام الشبـاب بشبتـه وزدهــاري
الله على ممشى صبـح بـارق لاح=في وسط خدٍ ما وطت فيـه اثـاري
ما فيه غير الطير خفـاق الاجنـاح=يلعب طرب بين الشجـر والخبـاري
نسيم جـوه بيـن الاشجـار فـواح=يبسط مزاج اللي مزاجـه اتجـاري
والنار شبوهـا رجاجيـلٍ اصحـاح=الكـل منهـم للمهمـات ضــاري
الكـل منهـم مـا توانـا ولا طـاح=كـلٍ بوجـه لرجـولـه مــواري
مع دلةٍ تجعل خوا الـراس ينـزاح=وسوالفٍ ما هـي لـك الله هـذاري
مجلاس معهم يجعل القلـب ينسـاح=وينسى هجوسٍ مثل ضرب الشباري
هذا هوايه يابـو صالـح ومـا راح=ما هو براجع لي وما صار صـاري
خذ الحقيقه صـدق مانـي بمـزاح=والله هو اللي في خفى القلـب داري

انا بكتب الاشعار والقاف توه حل=على ظامر حلوات الابيات مطلوبه
ابمش مع الخد العذي وسكنة ورحل=مثل ما سكن غيري وبمشي على دروبه
مدامه ربيع ابسكنه وتركه لمحل=ولي درب مع جرة صبا نجد وشعوبه
عشوبة رجالٍ قبلنا في لقاه ازحل=رجال تعرف الطيب وتعرف ما جوبه
عشوبة على خمسٍ مشوهن بعقد وحل=وصايا خذوها وتعبوا كل منجوبه
وصايا عليها طيب العرف ما يبحل=ولا ينقص المكيال وان جاك من صوبه
ودار الزمان وكل شي بدأ ينحل=وظن اخر الايام يقضن بالنوبه
يبي يحل وقت وقتنا ذا عليه بحل=علامات هذا الوقت بالكتب مكتوبه
وأنا إن شفت درب مزلقان وصبخ ووحل=اجنب وخل الرجل تمشي على دوبه
ولاجيب كحل وميل للعين لجل أكحل=عيون مريضه بزرق الماي مصيوبه
وأنا يا عضيدي يوم اشوف الجمال ارحل=إلي مقصدي يا صاحبي جال مندوبه
ترى مقصدي بالجدي والمشتري وزحل=نجومٍ تشع النور والشمس محجوبه
ألا ليت من صلى وصام وسجد تنحل=عقودٍ بقلبه مبرماتٍ ومقضوبه
علشان يهدي البحر في الوسط والساحل=وهو يستتر بين العرب من تحت ثوبه

كان انت يا الصاحب فهيم وبصيري=من يعترض لمقرد الناس غلطان
مالك بخلق الله طويل وقصيري=خلك على حقك حريصٍ وشفقان
ولا انته بمكلوفٍ بطرد البعيري=اللي وسومه كثرة والهدف بان
وهراجة المجلس ان طلب القريري=ما فيهم اللي يحتزم يقضي الشان
ولا تسير مع هرجٍ ان دور يطيري=ولا توجه اهدافك على غير برهان
والاذن ما ترخى لصوت الصفيري=والراس حاول رفعته قدر الامكان
أعطيك من قولي وكد قال غيري=أمثال ما تفنى على مر الازمان
خذ من كلام عبيد شيٍ يسيري=ابن رشيد اللي سكن قصر برزان
اللي فعل في نجد فعلٍ كبيري=ما هي هرابيدٍ عن فلان و فلان
وكد قال أبو سلمان* بيتٍ شهيري=( مانت الوحيد اللي عطاك الله لسان )
ومن قال أنا اكف الملاء في حجيري=تراه متكلف وضايع وخسران
يصحي مدام السيف وسط الجفيري=قدام لا يرقص على الباب شيطان
ترى إن طلب من كل دوله سفيري=سوالها الشيطان شعله ودخان
وقام يتهيايله صحيح وضريري=لشر طلابه وللخير عوان
وحنا ترانا يالسنافي نشيري=مادامها في يدك والعقل ميزان
وإلا تراي آقف بشري وخيري=الى طلبت الفزعه وطلب الهدد زان
إلى صار للفزعه قرار ومصيري=ما ينفهق عن ما قفه كود جابان
هذا اقتراحي لك يا ريف القصيري=والله على درب الهدى يقد الانسان
وصلوا عدد ما هاج بحرٍ غزيزي=وعداد ما عزل من المزن زبان
على الذي للحق سيف شطيري=سيد قريش المصطفى نسل عدنان

يا علي أشوفك تشعب الهجن والخيل =و ضايق و ضيقك ما عرف وش لزومه
تنعى الشعر والشعر جاله مخاييل =و غطت سمانا يا بو فارس غيومه
الجزل واجد والهزل كالسماليل=والاوله تقبل والأخرى مخزومه
والشعر هذا الشعر جيل ٍ بثر جيل=الركب ما شي والرجال محشومه
ومن واجب الشاعر لصوغ التماثيل=يحرص على بيته ويدرك كمومه
ويغلق مجال موجهين الدرابيل=اللي على الثغرة تشن الهجومه
الشعر جمرة والمشاكل محابيل=والنفس ما هي من خطاه معصومه
وتراء الثقة بالنفس رأس المواصيل=وانته من اللي معتلي في رجومه
خلك من الفايت وشوف المقابيل=وشهر مشاهير الحرار الصرومه
مدام راسك للمعاني مداهيل= أبدع وللغالي رجال ٍ تسومه
وترك هل التحليل والحط والشيل= مدام بيبان القصيد محكومه
وترا البحر ما هو مثل شاطي النيل=والسيف يدثر كان كثرت ثلومه
و مادمت جمال ٍ تشوف الجماميل=شوف الطريق اللي تحب وترومه
وكان إن حصرت بزاوية للعذاذيل=جتك القريحة خامدة ومهزومه
وإن شفت في وقتك غياره وتشكيل =شف وش حصل ما بين جلسه وقومه
حاول تعدل ما يلتها عن الميل=والصاحية لا تروح منك مهيومه
خل السحايب يسبلن الهماليل= على وطاء الأرض الجَلد مع حزومه
ولا حد ٍ على الجزلة يحصل مداخيل= الجزل شيك ٍ مبهمات ٍ أرقومه
و أنته دليله ما تبالك دواليل= وبحرك يغرق يا علي من يهومه