يقوله اللي ساكن اليوم داره=غنى المثايل بعد ماعمر الدار
الزند مايقدح بليا شراره=والبيت مايصلح بلا ساس وجدار
وغرفه وحوش أخير لك من عماره=إن كان ماهي ملك مستاجر آجار
الملك مامثله ولابه مراره =ولا الإيجار يجرعك كاس الأمرار
راعيه ما يهدا ولاله قراره =يونس على كبده كما واهج النار
يشد من حاره ويسكن بحاره =يحسب لجيرانه ويحسب للإجار
ولا أحد تجي دنياه حسب أختياره =غير اللذي حضه معه وين ماسار
والمشكله لاحضت والعلم شاره =ولاني بحق الناس ظالم وجبار
وسط العماير والشقق ياخساره =ماكن للجيران حشمه ومقدار
الجار ماياتي زياره لجاره =لو المسافه بينهم عدة أمتار
إن قابله قدام يدخل لداره =سلم عليه وقفل الباب بازرار
مدري البلا بالناس ولا الحضاره =شي (ن) يخلي صاحب العرف يحتار
حتى نهار العيد بــاول نـــهاره=لا معايد جاني ولشفت خطار
عزي لرجل ماسكن له بحاره =فيها جوارينه على كيف ماختار
تفرح معه وقت الفرح والبشاره =وتفزع معه لو جالها وقت الأسحار