المشاعر والبيوت اللي من المهجة شرايد=والورود اليانعات وماحفظته من عددها
والبلاغة كلها من نثر واشعار وقصايد=عنصر التشويق واسرارٍ تخالج من قصدها
وسحر اساطير المحبة بالشعوب وبالبدايد=مثل قصة شهرازاد وذكرياتٍ في بلدها
واربع وعشرين صنف من الجواهر بالقلايد=والسعادة في عيون الطقل وافراحٍ وجدها
ونعمة الصحة وطعم الفوز من عقب الشدايد=ولهفة الوالد على شوف الصغير ومابعدها
كلها عندي مثل لمح البصر والشوق زايد=للتقينا ورسمت لي بهجة الدنيا بيدها
منتهى ذوق القصيد ومملكة كل الفرايد=معجزات الشعر تركع قدمها حتى تعبدها
ماتوصلني هواي بوصفها والوصف كايد=البلاغة وابلغ التشبيه مايوصف جسدها
قلب غاليها عليها بالغلا الفياض جايد=مثل فيض اللي عقب طول البطاء شافت ولدها
قال هاك الروح زدها شوق من عقب النكايد=قلت بالله هاك روحي من صدوق الشوق زدها
غربتي كانت غياب الراحلين وجيت عايد=والغريب بغربته يطلب كنوزٍ مافقدها
بين حلمٍ مستديم وبين تدبير المكايد=ساكتٍ يرجى الليال المقبلة تبدي سعدها
صابرا صبر الفقارى في رجاء جمع الفوايد=مثل من غاص البحر للجوهرة حتى وجدها
جت وحدها ماسبقها الا الحديث من القصايد=واستذلت واستحلت خافقٍ واحد وحدها

قال هاك الروح زدها شوق من عقب النكايـد=قلت بالله هاك روحي من صدوق الشوق زدها