انا براسي قصيد يزيد وايضا كل ماله يزيد=واحاول اخفف الثوره من احساسي واهدي بها
لكنّ مارد قصيدي مايرده شي راسه عنيد=ليا نوى يكتب ابيات القصيده ما يراويبها
استغفر الله أنا مسلم وعبد الله ضمن العبيد=مؤمن ونفسي في الأيمان والتوحيد ياطيبها
الشعر خلاني استعبط واحس انه بدم الوريد=يسري بفكري وحتى اوراق شعري نوب يسريبها
كن الورق للقلم يقول انا مشتاق هل من مزيد=سجل على صدري ابيات القصيده لجل اغنيبها
احيان ورد وزهر واحيان سيفٍ مثل سيف الوليد=يمشي معي مثل ما ابغى والدُرر من قاعه اجيبها
والا انت يالغاوي اللي تحسب انك حزت منصب عميد=انت الجُملْ مع بعضّهاَ مانت عارف كيف ترتيبها
وأنا ليامن ضربت اضرب بكفٍ باسها من حديد=واللي يحاول معي يعبث ترا الضربات محريبها
ما اقول:انا شاعر لحالي في الكون ولساني وحيد=شاعر وغيري من الشعار من تنشاف اساليبها
شعار يصلون للي يرغبونه من قريب وبعيد =والا انت ماتقرب الهضبة ليامنه عوى ذيبها
الخيل غارو بها الفرسان باليوم العبوس الشديد=وانته ذلولك بعكس الدرب تعطيهم عراقيبها
تطفو على السطح وتحاول تقرّب من بحور القصيد=ماتشوف دوْامتاً ماتنتبه غير انت غاديبها
معجب بنفسك وزاد الطين بله ناسٍ تقول:عيد=شلة بعكس أتجاه القبلة اشوفك تصليبها
وتشوف نفسك بعينك وين من قدك لو انك بليد=والسبحه اللي معك في كل مجلس ليه تومي بها
خذها نصيحه لعلك من نصيحة ناصحك تستفيد=من راعي اللحيه اللي مابعد بيّن بها شيبها
صغير سن وفي الشعر ان تكلم قيل رايه سديد=اسمع كلامه وخوذ الكلمة اللي مايهذريبها
خل القصايد وخل الشعر ما انته واصل اللي تريد=ارفق على روحك وريح ضميرك من هناديبها
أن ماحبكت وكتبت من القصايد جزلها والفريد=قصايدك خفّها لحدٍ من الشعار يدريبها
ماكل طيرٍ تهده يلحق الجول بنجاح ويصيد =بعض الطيور الضعيفة تنكب اللي راح غازيبها
نصيحتي وانت حر وقول ماقاله فهد ياعنيد =أن ماوقعت أبـ بحورٍ تشذب العايم شواذيبها
يعني في المختصر لاعاد بعد اليوم تكتب قصيد=لاتاقع بغبتٍ ماظنتي تحّمد عواقيبها

المشاركة الأصلية كتبت بواسطة ساري الغدرا (المشاركة 186353) 0 0 0 ابو سعد بيض الله وجهك يامبدع في ملتقى الابداع والجزاله ... انت مكسب للقبيله والملتقى ... وتستحق الحفاوه والتكريم من الملتقى ( وسام تكريم الشاعر ) لمشاركاتك الجميله والتي نفخر بها بتواجده معنا جعلك ذخر يابو سعد 0 0 0 تحيتي