استهلت يوم لاحت بالهجوس=مزنة المعنا على زين الكلام
وارتوت كل المشاعر والحسوس= من خيار القول للجمع الحشام
مرحبا ترحيب صادق من نفوس=تبتهج بالضيف وتطرحله سنام
لا لفاها الضيف ما يلقى عبوس=فلة احجاج وقرى وكومٍ ضخام
والدلال الي تزين كالعروس=ماخطبها غير عالين المقام
باسم شيخ فالمكارم له غروس=منبتٍ طيب ويسقى من غمام
مرحبا ترحيب من جمٍ بجوس=مرحبا باللافي من يمنٍ و شام
قالها اللي سهيل له مقعد جلوس=قالها هليل و ربعه له حزام
ربعه اللي للخطر دونه تدوس=عزوةٍ كالشمس من فوق الظلام
عزوة ابن زويهر اللي له دروس=من قديم الوقت في شد وسلام
يوفي الوافي على الدرب الريوس=والجزيلة مدته بين الكرام
الزويهر خصمه الغادي خنوس=ماجهل فوقه خصيم ولا يظام
الزويهر ماشكا جاره مسوس=يجلي عن جاره مكاريب العسام
الزويهر ضيفه فاليوم النحوس=دسم الشارب وما لحق العظام
حرب ربعه داوت اللي به عموس=حرب ربعه فوق صدره كالوسام
حرب ربعه في يده نار قبوس=ما يخيب اللي تقلد بالحسام
وللقبايل كلها باس ضروس=كل قبيلة فيهم الشهم الهمام
قالها فواز وللمعنى فروس=بيته المبدوع له نهج ونظام
صيرفين صرف حرفه كالفلوس=والشعر ماثمنه غير الفهام
وعد ما مزن الحيا لاح برجوس=الصلاة الطاهرة لخير الأنام

المشاركة الأصلية كتبت بواسطة فهد ابن غانم (المشاركة 1348368) صح الله لسانك ولاهنت وسلم فكرك وبنانك دمت برعاية الله وحفظة

المشاركة الأصلية كتبت بواسطة تكفيني الذكرى (المشاركة 1348494) كلام جميل ورائع الله يعطيك العافيه