ياعناد زانت شبت النار ياعناد=عجل علينا بالحطب ياعضيدي
واشعم لنا وقده وزدها اليا زاد= بردٍ يقص العظم لوهو حديدي
واقلط على وارد مثامين بغداد= ماباعها بالسوق هندي وزيدي
ماهي دلال السيف لا يبن الاجواد= ولاهي ترامس قوم بابا وسيدي
وعطني وسمعني قصيد بن عواد=والا من العملاق والا الوسيدي
الشعر له في ساحة الشعر رواد=وعلى مناهجهم سريت بقصيدي
قلته وانا يهل التماثيل قصاد= واليا نضمة ازن معاني جديدي
ازن واسوق القاف والقاف ينقاد= قود الجمل لاقاد وقت المديدي
وانشد وانا عن حامض العلم نشاد= واسمع من اهل المعرفه واستفيدي
ياعناد كثر الهرج والقرق مافاد=مافاد من قاله ولاهومفيدي
لو قال انا كحيلان ولا ابن شداد= ولوقال انا البيطار رايي سديدي
للشعر شاعر ثم راوي ونقاد=ولولا الثلاثه طاويٍ منه قيدي
والوضع اشوفه صاير طلاب وجهاد= ويالله تجملني وترفع رصيدي
طالبك يامن يمك العبد لا عاد= تدمح وتقبل تايبين العبيدي