|
ابدأ بذكرك ياكريمٍ وعالي = امرك نفذ فالخلق اول وتالين كل ما غدى غالي ويقفاه غالي = دنيا نعوها من عبادك كثيرين يالله يامعبود ياذا الجلالي = تجعل لها في جنة الخلد تمكين وتغفر جميع ذنوب يامن يسالي = وتجعل لنا من عقبها صبر ويقين وتعينها فالقبر وقت السؤالي = وتجعل لها برهان يارب وتعين يمه بعدك الحال عزي لحالي = فرقاك جرح وبالحشا قبل جرحين ما ارتحت يايمه ولا ارتاح بالي = وتاهت دروب وتوهتني عناوين يمه بعدك البيت فاضي وخالي = ماغير ذكرى باقية شافت العين تجمعو به فالزوايا العيالي = مع شايبٍ جاه الخبر طعن سكين الصمت خيم والحزن فيه جالي = واليا هرجنا قال نادوا لها وين هذا يون وذاك ببكاه طالي = شلال دمعه ترتويبه بساتين رحتي وفينا الهم بالحيل نالي = ولا نعترض حكم الولي فيه راضين له الامر فينا من اول وتالي = والحمد له في ساعة العسر والين وختامها عداد مالغصن مالي = صلوا على المختار وادعوا لها آمين |
ياراسم المعنى على لوحة ابداع = ذا فن لكن مارسمته يدينك متساوي الابعاد متوازي اضلاع = لوجيت باللوحة وجاء من يعينك من يستمع فيما تقوله لك انصاع = واثر على قلبه بكاك و ونينك لو ماتعجّل في استماعك ولا طاع = ولا غرته كذبة لقاك وحنينك يلقى علومك مالها فالسعه قاع = دون الحقايق مادها عارفينك مثلت والتمثيل تشبيه وخداع = والحق كيه وسمها في جبينك لوطال وقته بختلافات الاوضاع = يامسرع الايام نادتك وينك فكرك شرا والا القلم منه ماباع = لو دان حبره لا كتبته يدينك بحثك لماجستير لو منك ماضاع = ما تاه دربك في مخارج سنينك ياكثر مايشكون فالعالم اوجاع = وانته لهم كملت واعميت عينك شفتك غني فالناس لكن طماع = شين الطمع واليا تبعته يشينك ناوي تبيع لساير الناس نعناع = وخيّبك زرعك واغرقه وحل طينك اصبحت في مهنة جديدة وفنزاع = تلوم نفسك والعرب لايمينك ليتك على ماكنت يالابس قناع = بعد انكشف ماظنتي معتقينك ناديت لغرورك وهو جاك فزاع = وكَبرّت ويسارك تعلت يمينك |
هذي كذا الدنيا متاهات واحزان = كلن يدّور راحته مالقاها بالذات لا وضع الفكر صار حيران = والنفس ضاقت منت لاقي دواها تشوف حالك حال من صابه جنان = وتلفي عليك هجوس ماحدٍ دعاها ومشاكل الدنيا معك بعض الاحيان = تزيد حتى ماتلحِق مداها خذها نصيحة لك هدية ومجان = اليا قسى وقتك ونفسك حداها مهما يكن او كان بالنفس ماكان = اسلك طريق بعكس وجهت هواها جرب وبتشوف الامر شوف الاعيان = وابدأ معي حتى تصل منتهاها نفذ كلام المطلع عالم الشان = اللي عطى خلقه وكرم لحاها اقضى الحوايج في خفى الصمت كتمان = ونيتك وثق مع إلاهك عراها ولو ضاق بك خاطر ترى مابقى هان = اصحى بها نفسك تزود عناها دنياك بعد اللي سمعته ولك بان = لو مُرها زايد وفاق الحلاها يبيلها صبرٍ مع شوي نسيان = مع ضحكةٍ ترمي همومك وراها |
ترحيب يا رمز الوفا فز ناصيك = منك الغلا ماغاب والوصل جابه دايم على الحروة يلاقي حراويك = من يرمي بصفحة تغلف كتابه قلبٍ صفا بالود ياخذ ويعطيك = يبطي عظم غيرك ولاشي نابه جيته معزة مثل مافز مغليك = ماقام يسأل خافقك عن غيابه بالعكس همه عن ظروفه ينحيك = ماوده يكدر ضميرك عذابه قلبٍ ملكته بالغلا مايجافيك = بالعكس بلسانه نطق ياهلابه عاجز على طيبك بطيبه يجاريك = يا نّو يروي خافقه من سحابه مرة بعينه ذي واحيان في ذيك = واحيان فوقك قفل الصدر بابه يقطع وريده لجل من دمه يرويك = وروحك يسكنها معه في ثيابه خوفه كذا في دنيته مايوفيك = ويبخل فؤادك مايقدم عتابه |
ليه يابرق الشمال تلوح قُدم عيوني = لين يرعد شوق قلبي وانت مبعد غادي قال وانتا من جبرك اتشوف غُر مزوني = قبل ماتحتاط من جو الهوى لا سادي قلت ظامي وارتجي من وآبله تسقوني = لاتسبب لي مآساي ياغزال الوادي السهوم اللي بها في خافقي صبتوني = وش دواها يالخبير وفالهوى الاستادي نعنبو جو الهوى مايرحم المفتوني = لا رمى قلب الفتى بالود يالاشهادي لا تمكن في فؤاده عاش به مجنوني = قدّ مايمشي بدربه مايصل له مادي قال عطني للموده بيننا عربوني = قلت عندي للموده توعيه وارشادي كان في قلبك معالم بيّح المكنوني = تدري إني بعد شوفك ماطعمت الزادي مير عجل لا تكابر قبل لا ينهوني = المحبة والموده تحترق بفؤادي والله إنك فالخفوق 0وكم مايعنوني = من بروق تلوح قُدم الشوف عندي عادي ذي حقيقة والمشاعر دونها يقفوني = لو ببدلها 0الجوارح حاكمه لودادي |
يوم السعد مبطي بدأ في حياتي = من يوم شفتك عشتبك في سعاده مدري حسافه عمر قبلك وفاتي = والا الفرح بوجود مثلك وساده كم فالعرب عمره قضى في شتاتي = وهمه على صدره تعلق قلاده وهمي رميته وانتشأ طيب ذاتي = واشرب بك ايامي بسكر زياده ارم بهمومك دوم خلك سواتي = ودي اشوف السعد لك دوم عاده بك ينشرح بالي كذا ياغناتي = قلبي وعد قلبك وحافظ وداده ماهمني فالوقت اسمع وصاتي = فل الحجاج و وصل الفرح ماده اعمارنا مردها للمماتي = ماودنا فيها نعيش النكاده |
بك الفكر متشتت وبك إنشغال البال = قطعت المسافة (1000) كيلو بلا سكه اصل دارك وبيني وبينك تحول اميال = واقف عند بابك ويتخيّلي اتفكه ولا يا مُنى روحي وياسبة الغربال = متى عيني تشوفك وتجلي لي الضنكه اسرح معك واصحى على دقة الجوال = والاقيه غيرك واتعمد على تركه ويبعد بي الهاجس واقطع دروب طوال = على اني متجه جده واثرني رايح لمكه على فرقتك حالي معه ساءت الاحوال = وحصن الصبر في داخلي بُعدكم دكه على نشوة افراحي وشوفك وطيب الفال = اعيش الليالي والمشاعر بها ربكه واذا تعبت اعصابي اجر اللحن موال = واحاسيسي اشغلها تراقص على الدبكه والا يا مكاتيب الزمن والعمر وإن طال = عسى صاحبي هم الزمن يوم ماصكه |
ياطير لا تفرد جناحيك ياطير = بكره مصيرك بعد ماطرت تاقع مدري بها لك شر والا بها خير = والا تقع جايع كما طرت جايع الطايرة تقلع وتهبط لها قير = وانته بها تجهل لو إنك تطالع ياطير ياللي لون ريشك عن الغير = يفرق نهار اسود وبالليل فاقع عينك بصيرة لا تعاكس بك السير = وتصير في دوامة الوقت ضايع ياللي مساك بحزته حزة عصير = وليلك سكونه تشتكيه الوايع دنياك يالمقفي ترى مابها ضير = وتاريخها بين المخاليق شايع نسمع كما تسمع عن صوير وعوير = وانته كماهم بالفعل والصنايع |
بخيتان بخيت البشري = سلام فيه علوم للطيب تزهاه = من صاحبن بالود جاتك حروفه على بحور الشوق علوم تقفاه = بالصاحب اللي حادينه ظروفه مانعرف ظروفه حسب مافهمناه = بسبابها مانسمعه مانشوفه حتى المشاعر وين نايف فقدناه = قالت 0 وقلت ارسل ولاهي كلوفه مثلك عذر صاحبك ما اظن يخفاه = طوّل على سكة وصالك وقوفه خوفه على درب الوفا لك يمناه = شحت 0 ومن شرواك لاشك خوفه ما اوفى ولايدري إذا شي سواه = واليوم جردّلك معزه سيوفه على امل ردك يجيله ويقراه = ويلقى به المعنى حلايا وصوفه طيب و وفا على مثل ماتمناه = وإن غيرها نوخ مطايا حسوفه ومن صاحبه كشف المشاريه لاجاه = يبشر نكمل ما احتوتها كشوفه نايف مشوح العتيبي = يامرحبا ياراعي الوجه والجاه = عداد من رحب لاجوله ضيوفه وقام وتنقى له قعودن وذكاه = ولاتلفتّ في ثنايا خروفه بالصاحب اللي مبدأ الجدي مبداه = اليا نصيته ما تقارع دفوفه اخو وعزيز من الرجال المسماه = حرب العزيزة والفعول معروفه صاحبك وافي لك على ماتمناه = طيب ولو صكات بقعا تلوفه على علوم الطيب والعز تلقاه = مافيه معنى من المعاني يطوفه وإن كان صاير شي ولاعرفناه = صاحبك دونك لو يحني كفوفه بالدم لو يضرب جموعن بشلفاه = وتشيل عنك المدلهمه كتوفه يابو محمد عرف مثلك شربناه = والوقت جعل الله يبعد صروفه وإن كان قصرنا في شيٍ نسيناه = منك السموحه لو نعيد البروفه |
بآخر ثواني للزمن يوم حرك = فات القطار وفات موعد لقانا والله لولا العيب واخشى مضرك = قُدم الملأ لا اظهر بقايا خفانا اواااه ياحبٍ خذاني ومرك = يوم ارتجي وصلك ومثلك نسانا حظي مقفي وانت لك حظ غرك = ولا عاد ندري وين هو منتهانا العقل مدرك كل خيرك وشرك = ولاطاع قلبٍ للمهالك حدانا على ذكر عن طيّب الفعل برك = لاجات نزعة والحشا بك كوانا والود لك صافيه يازين سرك = انت الوحيد اللي صدق لك هوانا ودي عشق قدام ياصل مقرك = ومنهم شربنا كاسهم ماروانا وانته ولو لي ماحصل غير مُرك = يبقى غلا قدرك بعيني مكانا تبغى الحقيقة إن تبسمت ثغرك = فيه البروق تلوح فأعلى سمانا اصبحت في دوامة امواج بحرك = غريق ماكنك وكنه وكانا بستنشق لوردك وفُلك وزهرك = واعطيك ماغيرك تمنى وهانا الشوق مني بالوّله كان مرك = يهدي التحية بالغلا ياغلانا |
السلام عليكم ورحمة الله وبركاته
هذه القصيدة القيتها يوم الخميس 3/7 /1433هـ بقصر الظاهري بعسفان في حفل تكريم / د.عايش بن عطية البشري بمناسبة ترقيته العلمية الى استاذ مشارك بجامعة ام القرى بمكة المكرمة 0 بديت بسم اللي به العُسر يُسري = اللي حمى بيته بطير الابابيل سر ياقلم وانثر على البوك حبري = بحروف تضوي مثل نور القناديل انا حضرت وماقفي عنه ما ازري = حاضر بحاضر واجبي عنه ما احيل شاعر وليه حرف فالشعر مقري = واطوع القيفان باحلا التماثيل وابني من الجزلات ماطاب وادري = للشعر نقاده وللهرج تحليل وإن ماحضر في محفل الطيب شعري = وشرّف وقوفي بين كل الرياجيل ماله لزوم اشغل بالابيات فكري = إن كان ماترقى معي قمة سهيل من بعدها ترحيب للكل يثري = طيبه من العنبر وريحه من اكليل في ليلةٍ تاريخها ان قلت هجري = يومه 3 من رجب دون تظليل وإن جات للميلاد بالعام ندري = 12 بعد (2000) بعد انتهى ابريل يامرحبا بالكل من راس بشري = باللي حضر في حلة البن والهيل ترحيب ماله حد من نهر يجري = وزعه وقدر وطيب واعز تكميل لاهل الوفا نقريه من كل حجري = في حلة اهل الجود واهل المعاميل اللابة اللي فالمواقيف تذري = للعرف باب و فالوازم حلاحيل تبقى العوايد ماعليها تجرّي = وبين العرب قانون ما فيه تبديل ولا فيه علة مالها علاج يبري = واللي خفى مكشوف من دون دربيل والطيب فأهل الطيب له فعل يمري = محفوظ لاهله فالليال المقابيل الذيب لو غدراء مساريه 0حذري = وظل الشجر لامالت غصونه يميل والعلم بأهله يرتقي كل عصري = ويزيدهم رفعة وقدرن وتبجيل وبعايش الدكتور يزداد فخري = ونسجله في صفحة المجد تسجيل شرواه له بين المخاليق قدري = بالخُلق واخلاقه لها ذاته يشيل كل ما اذكر انجازه وفالبال يطري = القاه في قمة هرم مجد ذالجيل للعلم يرقى وللمروات يشري = فالنايفة ويذلل الصعب تذليل والمدح في شخصه ينومس ومغري = وتفخر حروفي فيه يوم اكتب القيل يحماه رب الكون من كل شري = ويجعل دروبه كلبوها تساهيل كنت اتمنى اكتب الحرف نثري = واجيد فالتعبير من دون لا اطيل عُذري من التقصير وافي 0 وحصري = للحفل ولكل الرجال المشاكيل واعداد خلق الله بري وبحري = صلوا على المختار يا أهل المعاقيل |
يازائره في منتصف ليله ارجوك = خله يكمل بالهناء كل ليله لاعاد تطلع في سما ناس كرهوك = ولاعاد تسري عن عميل بعميله دورّ على من فالمخاليق يبغوك = وتلقى الذي ليله يناظر تجيله لاتحرك الافكار لوكان نادوك = وتقول لبى خاطري ينتخيله إلا إذا بتقول لاجوك ينخوك = قلب البنادم للبنادم دليله وتقول خلك مع غلا حي يغلوك = لو كان صدمات الليالي مهيله تدري بهم كم في غيابك تحروك ؟ = وياكم شالو هم محدٍ يشيله حتى على شانك وطو دونك الشوك = بهم المودة وصفها مستحيله اصحى تفكر يوم بالرخص باعوك = ودك شروه ولا شغلهم حصيله اللي في بحر اشواقهم بعد رسوك = خلك لهم غاية وحبك وسيله ودك يدارونه مثل ما يداروك = لو الزمن ما اسرج مع الوقت خيله ماهم سوات اللي بلا ذنب نسيوك = باعوه ودك في ثواني قليله غروك في ضحكتّ زمن يوم غروك = اهل العقول الفارغة والضحيله تسحبهم الدنيا مثل سحب سنبوك = في عاتي الامواج تايه سبيله |
إن جيت بحسبها على الوقت تاتي = وإن جيت بحسبها على عمري احصيت وإن جيت برميها على الحظ جاتي = وإن صابت المقسوم لاخطت ولا اخطيت لقيتها تركب بكل الجهاتي = قدام والا بالنظر خلف لديت هي هكذا ياناشدٍ عن حياتي = عايش بها مايوم معها تهنيت لجلي مسيّر عكس سير امنياتي = عيّت تحقِّق ماحلمت وتمنيت امشي على ماترسمه من شتاتي = ودوري جمعت اللي نثِرتِه ولميت منها الآسى والحزن جوفي يباتي = والمُر من كاسه شربت وترويت اضحك وقلبي فيه سوت سواتي = بالشكل حي امشي ومن داخلي ميت كل مآاقف بدرب الامل قيل فاتي = وارجع بسكة همها مثل ماقفيت صبري دفنته بالصدر بعد ماتي = مل وضلوعي له كفن بعد مليت وروحي لها منفى جعلته بذاتي = وقلبي تلقى بالعمر ماتلقيت احمل بقايا جرحها ذكرياتي = اوفت مآسيها على زود ماوفيت |
عد ما طارت طيور وكائنات وطايرات = وعد مانكتب حروف وعد مانقرأ حروف وعد ماينبت نبات وعد مايثمر نبات = وعد ما قامت صلاة وفالحرم صفت صفوف السلام من الثقات وماصله ياصل ثقات = وصلّه ياخط يدي دام تحدانا الظروف جعلها تكتب زيارة فالسنين المقبلات = للصحيب اللي ينومس له فعول وله وقوف من رجالن ساسها ثابي وتاريخه ثبات = والله انك ياسعد نوماس للكل معروف الرجال اللي منازلها برؤس النايفات = روس قوم وبابهم ماينقفل دون الضيوف يكفي انك شاعرٍ وقت العلوم الحاسمات = شوكة خصوم القبيلة هيبتك هيبت سيوف يازعيم المعرفة والرأي حسب الواردات = صادرك حسب المعاني راس تحماه الكتوف استمع قصة عيون جفونهن متقلبات = والنظر يقرب مداه ويبعده برقٍ خطوف الجِمال دروبها متوحده فالماضيات = صدق عُوج رقابها 0 ماقيل عمياء ماتشوف يصبح الجَمال زمله قاطرة بالطيبات = الحمول اللي كما صرف الذهب وزن و وصوف وزمل حاضرنا يابو تركي شتات وسايبات = والجمل يشكي من الجمال وحموله خفوف البضاعة ماتجمل عند قوم الغاليات = كل تجار المراجل قابلوها بالعزوف لو على شروى الرجال الغانمة ما كان جات = وسط سوق بضاعته ماتنترك فوق الرفوف مير لقّيت فيه يالحر السنافي عينات = الرخيص اللي يخارجها وتقدر به تطوف والختام المعذرة عسى الحروف مجملات = والصلاة على محمد مابها شيٍ كلوف الرد من الشاعر القدير سعد المحمدي مرحبا مثل العسل مدري تقل سكر نبات=عد سكان الكنانه والمدينه والهفوف وافيه لصحابنا تمشي على كل الجهات= مثل عقد الماس يابخيتان في عنق الهنوف ما عليكم زود ياريف الخوي حسن الصفات= ياعسى يفداك رجلٍ لاهرج دايم زهوف ان سبح في نهر دجلا ماسبح نهرالفرات= وكل ماكبرت هرب صوب الملاجي والكهوف كان كتبة لك زياره ياطبيب المعضلات= لك تسجل في سجلات الوفي وسط الكشوف ابشر بحلو النباء ودلال صفر مبهرات=وقبل تعطينا علومك قطعة ارقبت الخروف في محلٍ فيه ماتلقى علومٍ نازلات=مجلس بالطيب والمعروف والعز أمحفوف بين ضلع طويق يابخيتان وجبال السرات= ليه ياشمس الصحى بين التوهج والكسوف كل ماقلنا عليها شفت عشر ملاحظات= يعترض بالدرب عميان البصيره والضعوف بعد نقطه فاصله جبت العلوم الباقيات= الحرير انميزه مابين قطن وبين صوف صعب حل السالفه من بعد ماراحة شتات = مير راع الكور مايرضى المسامه والردوف مالنا بصر وبصيره بالعلوم الشايكات= لو نعدل حمل نايف من يعدل حمل نوف |
ياعويني طُرقةٍ ما انته معي فيها خوي = سقت عذري قبل لا فكر لها حثتّ خطاي انت لا خاويت حظي ماتردى بأجودي = سايره وسراه مااخلف سايري والا سراي مع وجودك فالمواقف ماقفي عزمه قوي = انت خُصله للبنادم كسبها غاية مناي من جعل طبعه سماتك فالعرب يمشي سوي = واتخذتك طبع فيّه كل ما اشيدّ بناي ياعويني إنت صدق القول بك ماينطوي = وانت نية صادقة في داخلي تكسي خفاي فيك درب الخير لايمكن يميل ويلتوي = مستقيم وماده الحق لو تصدّو له عداي كم جاهل بك رجال العرف يكوونه كوي = ما تبعت اللي فقدك ولا فقدته في عزاي الرجال اهل الوفا تحوي مفاهيمك حوي = ارضك الطيب ونباته لي مروه يا غناي من يبى يعرف عويني مبدئه ما ينزوي = الوفا والطيب والمعروف يصرفها دواي قلتها واقولها للي لوى دربه لوي = والله إنه لا تبع ما قلت ما خيب رجاي والصلاة على محمد عد ما اسمع من دوي = للرعد واعداد مالاحت بروقه في سماي |
لا تجرح شعورك وتكثر حروقك = فسر معاني ماتبي مثل ماتريد هذا ترى عادي من ابسط حقوقك = وكل ماتشوفه ناسبك سوه وزيد دوام لا تخذل جوامح خفوقك = بعض العرب في عقلها دوم تبليد لاتلومهم لو شفت ما لا يروقك = تبقى صحفهم ماحوت علم تمجيد لا تنحني قدام تروي عروقك = خلك على كبح الظمأ دونهم سيد لو حاولوا ما حددو لك فروقك = غالي وتجار الغلا للغلا تشيد تسكن حياتي في خفايا شروقك = مدري فهمت الدرس ولا تبا اعيد |
واجب تكون الاجابة صادقة للي سئل = يوم نفسك سولتلك بك هواها يلعبي الاجابة غط نور وصابها خيبة امل = ذاك شب النار وانته شغلتك لم حطبي تنقل الفتوى لخلق الله ولاصابك خجل = وتنتسبها لغير اهلها لاجل تحمي مذنبي الله اعلم كان ماتدري وعالم ماحصل = تتبع الباطل ودرب الحقّ عنه تجنبي الغريبة فيك عاقل تاقف بصف الجهل = والمصيبة كيف ترضى بالحقايق تكذبي لاعشقت اعشق قمر ولاسرقت اسرق جمل = لاتبيع وتشتري وانته مع التاجر صبي انت صايم فالنهاية يفطر بحزمة بصل = تالي الازمان حولت النسب والمذهبي جاك مبعوث الملأ لكن فقناعك فشل = في محيط الدايرة خلوك حارس مكتبي امس قدمت ابتعاثي واعترضته يالخبل = والخبر جاني من اللي رحت له تتقربي ضاربٍ كيبل بتفكيرك وسبب له عطل = مالها مخراج فيك ومالقيت المهربي فيه حكمة في زمنا ثوبها يزها الهُبُل = من جرى خلف السراب محال يلقى مشربي والمثل لو جيت اقوله فيك عنوانه سهل = قيل من شاهدك للثعلب وقال ايه ذنبي |
الا يالغالية وإن قلت يالجورية البيضاء = انا ادري عن وفاك اللي تملّك كامل اشواقي وفاك اللي عزومه شفتها فالليلة الظلماء = وصمتك فالعسر غطى سماء فقري وآفاقي وفيتي في حقوقي لو حقوقك تاصلك عرجاء = ويضيق الكون في عينك لو ان الصدر بي ضاقي لقيتك نور في دربي بذيك الليلة الغدراء = لقيتك نهر حب و ود يجري دوم دفاقي تراعين التعب لاجيت بالرقة بلا ضوضاء = والاقي جو هيأتي معه جو الهنا راقي رعيتي بيت واولادي على الملة بلا استثاء = وصافحتي محبتنا بنهج اسلوبك الراقي تبين الصدق لو غبتي حياتي تعمها الفوضاء = تربعتي على عرش الغلا في داخل اعماقي |
( ترى مابها خوف ) ياللي شكى علة ترى مابها خوف = حبل الوصل مني عليها تلوى العطف ماينفع بلا واو معطوف = واليد وحدة صعب تصفق وكلا الصفق باليدين محتاج لكفوف = وبالصبر ماخابت قلوبٍ تحلى والعين مافيها النظر قيل مخطوف = والرجل ماتمشي بعد ماتشلا ارتاح والايام لازم لها صدوف = الله يكفينا صدوفٍ تولى الله يجبر خاطرٍ حيل مشغوف = ويبدله ود وحنان يتجلى خلك على عهد الذي راح ملفوف = من بعد ماثبى القواعد وقفى اللي على رأيه مشو خلفه صفوف = ولا يوم يترك ماقفه ويتخلى وصلتّ علمي لك وعيونك تشوف = والنفس حذرا فالمواقف تملى |
( الحمول خفاف ) ترحيب ما اطرأ عليه خلاف = استقبلِه كالمطر مدرار الطيب والود فيه اصناف = مايوم بك تنطفي له نار له ضيف وعيوني المضياف = لاتشغل البال والافكار انا جبل والحمول خفاف = ثابي وساس الجبال حجار ودام الصخر مع بعض ما اخاف = تهزني ريح والا اعصار يزيد في قوتي اضعاف =دام الصخر مجتمع ما انهار ماينفع كتاب دون غلاف = ولايمكن يكون شكله سار انا عليكم ذرا ولحاف = لسدكم مالفت الانظار ومن خاطري مايجيك اجحاف = لي في خفايا الفؤاد اسرار إن كان تسعى ورى الانصاف = العذر يغنيك و المعذار ترى علومك على مهياف = للي نحتبه بعيد ديار عفوت عن كامل الاطراف = ولاعاد ياتي لها تكرار |
( ما غوى خال البناخي ) ما غوى خال البناخي لو طغى وقت الشدايد = وفالبقية الباقية للخال في بناخيه باقي إن بدا فالجو عج اليوم بكرة غيم سايد = والعواصف كم تفاجَئنا بها لا الجو راقي والسعد لو طال ليله يعقبه صبح القرايد = مير تجلي لو نشوف الحمل كايد مايطاقي والليالي ما اخبرتّك ولا اخبرتنّي بالكوايد = علمها فالغيب والمكتوب له موعد نلاقي ادري ان المعرفة مفتاح بابك والعوايد = والصناديق الصدور اقفالها بك ماتعاقي وادري انك حر شامخ كاسبٍ كل الفوايد = ماتهزك كل ريح 0يسوق مثلك مايساقي والخواطر لو تأثر والكدر بالحيل زايد = يالبناخي منزلك فالعين لو خاطرك ضاقي والفرح لابد يقبل في لياليه الجدايد = والوعد بقدومها يحيي مسرات التلاقي |
بين( الاقواس ) عديت بالرجم الطويل اليماني = هوجاس عدابي وقضيت هوجاس مدري وصلت لقمته في ثواني = والا هجوسي بينها الوقت مرواس اجلس واتكي نوب واقف مكاني = ارفع قضية والعقل ميّز وقياس مع حظ نايم منه قديش جاني = الهم معه الغُلب والثالث الياس لو ماعثر مرة في مرات شاني = عِده كما اللي فالمخاليق هلاس وقمت اتهيض وافتكر فالزماني = زمان به ولد الردي شيخ فالناس ويلقى الوفي فيه الشقى والهواني = مابين قلع اضراس لا حد الامواس مجني عليه وصار محسوب جاني = لو القضية فالاصل مالها ساس العمر رحلة فوق مركب اماني = بحره سنين ايامها امواج الاتعاس انا ادري إن العمر لاشك فاني = ويبقى النصيب إجابته بين (الاقواس ) |
( لاهل المواقف ) ابدأ بذكر اللي تعلى السموات = خالق شعاع الضو وخالق لطيفه لاهل المواقف فالمواقف علامات = مثل الجبال الشامخات المنيفه عزوة معك لاواجهتك الصعيبات = ضرباتهم وقت الملاقى عنيفه ولاجبت طاريهم رجال المهمات = طاريك معهم مكرم الجود ضيفه لجلك يابو صالح زبون الثمينات = بأهل الوفا واهل القلوب النظيفه رايتك بيضاء ياصحيب المروات = والعرف والمعروف عندك وظيفه لك في ميادين الشجيعين بصمات = والفت للنخوه وهي لك وليفه قول وفعل ماهي تلافيق فابيات = المدح فأهله ماحوى العلم زيفه راع العلوم الغانمه مايبى إثبات = وزيف المنافق فيه مافاد زيفه الحر لو ميت به الذكر ما مات = وياكم حيٍ ميت الذكر ريفه انا اشهد انك يارفيع المقامات = للطيب درعه والوفا حد سيفه ساسك رجال محتوين الجزيلات = اللي لهم فالمجد اسم وصحيفه بشر الكرم من روس حرب الطويلات = اهل القنا واهل السيوف الرهيفه ابيات شاعر مايزور ملفات = الصدق عنوانه والابداع كيفه وختامها عداد ما نسمع اصوات = ياهل النفوس الطيبة والعفيفه صلوا على من جاء بختم الرسلات = وزيدو ترى ماهي عليكم كليفه |
حنا على ملة ومنهج ودستور = وعادات نارثها من الاب والجدّ التهمة اللي تاصل الناس بالزور= الواجب إن الناس منها تاكدّ لو كان جاهل يمكن نقول معذور = ولو من بعيد لهرجته مانتفقدّ الغدر طعنة بالقفى تقصم ظهور= يالله لاتبلي بها عبد يسجدّ لاجات من غالين نحفر لها قبور= تدفن ولاغالي من الناس نفقدّ والصبر بين الخلق طيبّ ومذكور= ماهي ضعافة بس للطيب ما اجحدّ مرفوع راسي للوفا ساس مخبور= ارقى ودربي عارفه زين مالدّ دايم ولي منزل رفيعٍ ومعمور= ولي عقل اميز به ولي شوف يرصدّ ضاقت علي صدور وصدور وصدور= وصدري جعلته لجلهم يتسع ودّ ياصاحبي خليتني منك مذعور= حتى الوسيعة كبرها صار كاليدّ شفت الظليمة ماغشى دربها نور= وصفق لها الجمهور من دون ينشدّ هرجتك ياللي للخطا مثّل الدور = بيت الخطا لو ينبني سهل ينهدّ لكن طبعي ما الحق كسور بكسور= حرن ولد حرن وساسي مجودّ امشي دروب العز مالف وادور= والطايشة عن سمعها إذني اسدّ لي قدر من يجهل بقدري فهو ثور= واصبر على الصعبة ولو زادت اصمدّ بعض العلوم تخلي الرجل مجبور= يضرب بسيفه لاوصل حده الحدّ ابو محمد دامه الحمل مقدور = يمناه ماتقصر ودايم لها مدّ تقدير من جاني ولاعنه مقصور= يبشر واحل حبالها عنه ما اعقدّ |
سلام يا الديرة اللي في عيوني غالٍ شوفها = وفالقلب تبقى محبتها على طول المدى غالية كله على شان من له شان عندي ساكنٍ جوفها = يبقى وتبقى المكانة العالية عندي لهم عالية خوفي على خوف من خوفه يخوفها على خوفها = الليلة اللي بها كل النجوم الطالعة جالية نهار شمسه مع الايام طافت وانتهى طوفها = في عمر من لاجهل بالفانية وايامها البالية القى هجوسي في بعض احيان تسرح لا كِثر حوفها = يقوله اللي حروفه تنتقل للفقرة التالية اغليك ياللي سلامي ديرتك يمسي على كفوفها = ختامها شابت عيوني بعد غيبتك وحالية |
لا جات من عاقل ومحسوب رجال = ضيّع حساب رجال به حاسبينه وانت الذي رجال اعزه ولازال = رغم الذي خبط لكم بالمكينه سويت فيك الطيبة قدر وإجلال = ومشّيت في العايبة والمشينه غايب وذكرك لا حضر ارفعه عال = وجازيت ذكري بالعلوم المهينه المعرفة لمت على طيّب الفال = ونفرح على شوف الصداقة المتينه لقيت مني وزعة رجال لرجال = وهزل علومك قام يخلط سمينه منزال لك عندي على الراس نزال = والا الردي يمناي تسفه يمينه ما ارضاك لذناب الرياجيل تمثال = في كل مرة في يديهم عجينه حبيت اوضح لك على كل الاحوال = عانك عليّه إبليس ياللي تعينه استقبل رسالة في تنويه الارسال = حتى الوفا لايشتكي بك حنينه اصحى تفكر يوم حطيت الاقفال = اخفيت ماحطيت جوف الخزينه انكسّر اقفال المعاني والامثال = ومفتاحها ما اشقى العقول الذهينه ما نبدّل الطيّب على الطيب بطّال = لك عندنا السيرة الحسينه حسينه اللي منول ما اخلفت حالك بحال = تلفي كما نخبر على الطيب زينه اللي على درب الخطأ تاقف محال = اليوم لاوزار الخلايق رهينه من يمنا دام المقايبل فأقبال = باب الوفا مفتوح وتشوف عينه غير الوفا ياهيه ما اطرأ على البال = لاشك نحقر من تربها ثمينه |
مافيه شك خفيّف العقل رجال = اسمه 0لراعي الميّز ماهو مسمى قيّسه مقاسه عن قياسه معه مال = وسحب من اوساخ الوسيعه ولمى اللي من اول مانعرفه 0بذا الحال = جاهل 0 صبي ما اشغل ولا طفل همى والثرثرة مايوم حطوا لها بال = اللي كمانا بالشجاعة تسمى رِجال شرهتنا على رِجال عقال = لا افكارها قامت تفك وتخمى نِهد بالافعال لقصور الاقوال = اللي بناها لجل فيها ينمى غفلة معه يالله عسى ضلها زال = وراع العلوم الغانمة مايذمى ياللي عن احوالك تبدّلت باحوال = امسيت لابس ثوب من دون كمى ترعى وترعابك رعية لجهال = تعطي وتاخذ علم من لا يظُمى من بعد لك وزعة وقيمة ومنزال = منا قبل لا فيك 0 شفنا المطمى نخشى على صابرك ينداس بنعال = ترضيك 0ماترضي بك عيال عما اشغلت نفسك عزتيلك بلا اشغال = وخليت نفسك للنفايات مرمى إن جيت يالحارس تبا تصد الاقوال = انصحك لاتبقى للاهداف مرمى |
ادري غرابيل الزمن بك تشيّب = ويحوق حظك فالبهاذيل لك حوق مرة معي حاضر ومرة مغيّب = وجوك يغيم والسما صافية فوق واعرفك بين الناس نية وطيّب = وانتيكه اخلاقك وفي مظهرك ذوق وزهرك على شط المودة تسيّب = وترجع بعد يروى وّله تجني الشوق محبوب طبعك للحبايب حبيّب = وسوى على درب الغلا حولهم طوق بعيد لعيوني لقلبي قريّب = مشاعري ساقت محبتك لي سوق وإن جيت للحق نظرتي ماتخيّب = ولا يوم بك خابت ولا شفت بك بوق وإن جات لي بعض الخلايق تعيّب = ماصابني مما يقولون بك عوق |
طعم السعادة ذقت فيه المراره = ومُر الشقى طعمه تعودت مُره كل ما الزمن وقّد على الروح ناره = تاطأ عزومي في لظى حر جمره وإن صابها زرف الحزن من عياره = اضمد جروح الرمي في كل مره كل ما انحرف دربي وغير مساره = يترك على سنين المتاهات جره حظي على روس الغرابيل داره = كل ماسرى سود الليالي تغره كم جاه جيش من المآسي وزاره = والسعد غاب ولايفكر يمره عيا الامل يمي يقرب دياره = والياس دونه كل ماسار جره عقلي يقديني وبتبع قراره = دام العمر ماكل ماشاف سره الصبر من يلاه يجني ثماره = واخترت صبري دام مابه مضره |
السلام عليكم ورحمة الله وبركاته صدري منول يتسع للبسيطة = واليوم ضيقه مايسع شربة الما اول ماتتعبني حدود الخريطة = وتالي ماعاد ادري بها وش تسما تداخلت ودروبها اللي محيطة = متخالطة متناثرة ماتلما تخالطتّ والخلق فيها خليطة = الهم عِدِل وعِدل به 1000 هما فالدايرة منهم خلايق عبيطة = والبعض منهم صدق مافيه دما والبعض حر وبعض منهم ربيطة = والبعض يطلع بين خالٍ وعما والبعض متسلط وغيره سليطة = والبعض ماش فعول ماغير فما جو الفكر فيه البرودة سخيطة = ومرة سموم القيض جوه تعما كم ينفتق ثوب المعامل واخيطة = وكم ثوب جاني للحيا دون كُما محتاط وآخذ بالتدابير حِيطة = ودربي مقادير الليالي تُظما غنت مقاسيم السنين الوسيطة = ولحونها كم تقلب الفرح غما ماعاد عندي للبقايا خطيطة = ولاني بمتحسف على حاجةٍ ما انشط ليا شفت الاوادم نشيطة = على المودة دوم فيما يتما |
ياوقت ياوقت لا اعيبك ولا اسبك = ولو بشتكيلك تبا تبكي على حالي واليا بغيت اشتكي بشكي على ربك = شكوا لغيره مذلة بكل الاحوالي دام المقادير جابتني على دربك = اسلك طريقي معك واروح طوالي بعيش بالعزم لو جنبي على جنبك = وارقا المصاعب ولو زودتّ غربالي ماقول في يوم حسبك يازمن حسبك = بتبع ضميري ويفرج همي الوالي لعبت عليّه الليالي يوم انا العبك = يجريبي العمر ماحسبتّ للتالي ماكرهك لحظة وفي لحظات ماحبك = دام الفرح والحزن ترسي على جالي ياللي تركت الوفا ترى الوفا كبك = وغنوبك اهل الردى فالوقت موالي كم طيّب الذكر عن مافيك له نبك = وانته عن الطيبة معطي خلا خالي ما اقول في حزة الميقاف وش خطبك = للي نصاني ولا اوجه له سوالي اقول عونك ولك مايحتوي قلبك = غصن الوفا معتدل والطيب مامالي لو كان جرحي شكا مافادني طبك = في يوم خابت ظنوني فيك وآمالي الكيف حاول تصبه واحسب لصبك = يمناي بيضا ولا تكفاه فنجالي لاشفت مااربحك بالجزلات واكسّبك = امسي جمل للحمول وصبح جمالي |
السلام عليكم ورحمة الله وبركاته
جات الحروف تقول يابن الرياجيل = جيتك ولك فالشعر يالقرم رسمات دُر المعاني منك تكتال وتكيل = وبنات فكرك عِدّ عذب الجزيلات حس المشاعر بالمعاني محاميل = واصيغها لك شعر تحفة من أبيات يلقى بها متذوق الشعر تحليل = وتصوير له بالذهن بصمة و وقفات قلت ابشري والفكر لك وبله يسيل = غاية وسيلتها القلم يا ابجديات واقع عُمر ببدأ معه واكتبي قيل = ماقلت عن واقع حياتي في صفحات ابدأ من آخرها على حاضر اغتيل = مابيننا تربط علاقة مواسات من حظ يرقى بعض الاحيان ويميل = اليا رقى مرة معه عشر ميلات الهم واحة داخلي شوفها مهيل= وغروسها غُث الزمن يثمر آهات ومكنون غيبه بين عاجل وتاجيل = كم يقلب احزان الليالي مسرات شربت من فنجال كيف الغرابيل = وسجلت من بث القلوب الصحيحات لقيت بين الناس فالود تبديل = وفأهل المحبة سابع المستحيلات هذا الهوى موجود جيلٍ بعد جيل = وده نعيم ونار 0 لاهل المودات صد وهجر 0 واقسى فنون البهاذيل = وفرقا وحرقا فيه وقلوب فشتات ودرب الوفا دربي وانا عنه ما احيل = دربٍ ينومسني ولا فيه هفوات والخوف من ذيك الليال المقابيل = يالله عسى فالخاتمة خير لي آت ساعة بها يكتب لنا امر ترحيل = فالغيب 0 والمحصول مجهول لاجات الخوف لو مالقى لبكرة محاصيل = وحصيله المسلم معه زاد لا مات ويالله يامرسل طيور الابابيل = حسن الختام ومغفرة كل مافات مافات ماضي مثل ما احط واشيل = حاضر0 به التقصير رمز وعلامات صرنا وراء الدنيا هياكل تماثيل = باجساد نتبعها 0والارواح هيهات ذللت لك يالابجديات تذليل = بعض الصعاب اللي حوتها الملفات وعداد مايطِحن ويشِرب من الهيل = على النبي ازكى صلاة وتحيات |
السلام عليكم ورحمة الله وبركاته
طيب !!! لكن النحس ملعون خيّر = يقسا ويظهر للمخاليق طيبه لو الفرح يمي يشوفه مسيّر = قام اعترض دربٍ عليّه يجيبه ياوقت عمري منك لغزه محيّر = وحظي معك ياما تردى نصيبه خليتني فأمري أعزّم واخيّر = حبل الرجا ياسي معك ملتويبه ذاك الامل باصه عليّه تحيّر = وعمري على دربه سنين تخطيبه معذور مايسمع ولافيه ضيّر = طويق لو راسه عوى فيه ذيبه عطني جوابك كان بك عقل نيّر= على فؤادي لا سأل ياطبيبه جاني على شط المودة مخيّر = ودك وقابلته حبيب لحبيبه ليه الهوى بعد اختلف بك تغيّر = ماكنت اصدق يوم تشعل لهيبه منك المجافئ لي وانا اللي تخيّر = لك شوق دمعي منه ماصك شيبه منك العنا شيكه يجيني مجيّر = كل ما ابعث الاشواق لك تلتقيبه ماكنت افكر يوم مادك قصيّر = حسبي عليك ومادك الله حسيبه يبقى البنادم في حياته مسيّر = ومقتنع شي انكتب له يصيبه |
السلام عليكم ورحمة الله وبركاته الشعر بندق والهدف رمي نيشان = وباروده المعنى على الشاح ركز حسلان جيران العرب صدق حسلان = بذنابها تومي وبالروس تهتز انذال لكن العرب عندها اقنان = تقدّر الجيرة وللطيب تكنز عمر الجبل مايشتكي دحم الامتان = وعمر الردي ماقيل للطيبة فز الناس تسموا بالفكر دون الابدان = واجسادها ماياصله فالملأ فرز العام ثعلب يستشير الذرنبان = بيورطون الذيب في نعجة تعز والذيب ذيب ليا سرى صيده سمان = يترك لهم حبة دجاجة مع الرز يامحتسي من جمرة النار دخان = تحسب يثيبك فالعرب يوم تلز ؟ راع الخطأ حوله 30 شيطان = تمشي وفي راسه من البُطل تخرز حنا الوطن نفديه في كل ميدان = وفي كل عليا دمنا له علم رز المنحرف في كل الانظار طفران = يبقى رصيده سالفة لغزها طز تشره عليه عقول فاضي ومليان = لاهو محيرهم ولاهو لهم لغز مكشوف بين لو خفى كل خوان = والعز يبقى مزبنه ديرة العز |
السلام عليكم ورحمة الله وبركاته سلامي على الطيب نهجه ودله = وراع العقل يسمعه مايمله = فيمناه سيف الوفا قام سله = بينحر جيوش الظنون اللعينة = ولا ياهجوسي تغني وقولي = وجلب المعاني معك لا يطولي = ولاشي بيني وبينك يحولي = ومن هو على الله توكل يعينه = لقيت النعامة بلون وعلامة = وشفت الجمل قام ينهش سنامة = ولاهي علامات يوم القيامة = على ماتظن القلوب الفطينة = لكن الله اعلم في تال الزماني = ودار الفلك ياسهيل اليماني = ولا لك مع البدو لازم وشاني = لقو فالتطور بدايل ثمينة = صحيح الليالي تسابق توالي = وقالو منول وانا اقول تالي = متون العرب ماتهد الجبالي = ولاعاتبتها العقول الذهينة = سمانا سحابه بروقه تلوحي = وقدر المعزب لضيفه يفوحي = ودن الرعد فوق روس السفوحي = وسيل الشعابة خلط ماه طينه = عجول الاوادم ودنيا عجولة = ووجه الحيا منه ماهي خجولة = ومن نظرته دوم ماطئ رجولة = تخبزه لياليه خبز العجينة = اودام وناسة ومن جد فلة = وبعض الاوادم كما قيل علة = زرايع تفرح ومن غير غلة = وسر المراوح في سير المكينة = وبنصحك ياللي على غير قني = لك العلم مني ومركوز عني = انا الذيب واشوف حلياك جني = مع الذيب يلقى النهاية مشينة = ثبوت الحقايق بها الجو رايق = قبل لا نوايق نزيل العوايق = ولاياصل الماد فالناس بايق = ولا يشكي البحر حمل السفينة = وبختامها عد وبل الغمامي = وبعداد من صام شهر الصيامي = على المصطفى دوم سيد الانامي = صلاة وسلام بحضور وسكينة = |
ياسامعني تعال وشوف مثلي دورة الايام = في حاضرها وماضيها وسارحها وضاويها عجلها بالشهور يعد 0 يجمع بالسنين اعوام = احد يلقى منافعها واحد صوبه بلاويها بنستطلع نتايجها حسب ميز العقل بالمام = علينا نكشف اولها قبل ينعاف تاليها بنلقى فالدروب دروب فيها للشتات ارقام = ونمشي فالطريق ولآ نحاول نلتفت فيها ذخرنا عشبة الامال بنداوي بها الاحلام = عساها تعالج الآم الاماني قبل نعفيها على ماقيل للحكمة حسب ماحاطت الاقلام = حقايق طابقتها ماتكذب قول حاكيها علينا نختصر منها المهم ونحوي اللي هام = ولو خربت نتايجها دعينا الله يسويها ترجح كفة العقال لو كفة عليها اجسام = عشان اهل العقول عقولها دايم تقديها لجل راع الوفا والطيب والمعروف ماينظام = يحشم خطوة الوزعة على دربه يداريها يميز بالصفا مشيه ويعلم للظروف احكام = وطبعه فالحياة ظروف خلق الله يراعيها وقيل ان الردا قصره يعود من بناه حطام = ونية صادقة يفلح بها من كان ناويها وسوق المخطية لو شفت بين الناس فيه ازحام = يقولون اتركه واصحى بضاعة منه تشريها ياسامعني لقيت هجوس 0 شعري في سماها حام = يوايق فالزمن والناس وافكاري يسليها |
ليه ياكبد الجريح وليه ياطب المداوي = ماتداوون العليل اللي جروحه مدمينه الجريح اللي مابين الناس لكنه جلاوي = الليالي في وحوش ايامها ياكم رمنه كل مالدت عيونه بينهم وانه خلاوي = تل روحه من جسدها حي فيهم يفقدنه كل ماهاضت هجوسه احتوت 20 حاوي = فوق روس النايفات وهاض باله يوم جنه واوجوده وجد من صابه بها 20 لاوي = كل ما لاوي لواه يداوي الونه بونه كل ماينوي على النية لقى 20 ناوي = والله اعلم بالقلوب ومطلع فيما نونّه الله اكبر يا زمن بين الهواية والهواوي = كم رياح الوقت هبن فالطريق وغربلنه الهواية جوف دنيا لاتفيد ولاتساوي = والهواوي كم ظروفه لابغى جن وحدنه |
السلام عليكم ورحمة الله وبركاته اللي فقدته بآخر ايامي البيض = بعد فراقه سود الايام جتني عنا غيابه حرض الكبد تحريض = ذكراه ما مرة نسيت ونستني اخذ الحزن بعده من الروح تفويض = يبقى بها فالعمر لو عذبتني ماحدٍ بهالدنيا يجي فيه تعويض = واحلا الليالي فيه ماعوضتني عيني عليه تفيض لليوم وتغيض = على الخدود دموعها شاركتني الله عسى برق الحيا فوقِك ينيض = يامقبرة تحضن لقبره بلتني ويهل وبل يخفض الحر تخفيض = ويهنأ برحمة فالمنام اسعدتني بالثلج والماء والبرد جعل تبييض = لذنوب من لافرقته ريحتني ويالله سألتك قبل لاروحي تفيض = اسكن جواره لا المنية خذتني |
السلام عليكم ورحمة الله وبركاته انا اشوف فالوقت سر وسريرة = والسير فيها مسار ومسيرة= زمن سيرته بالمخاليق سيرة= وربه خلقنا وحنا عباده= وماضي بسيطٍ وناسه بسيطة= على طيب عاشو سوى فالبسيطة= وعاشو برغم المصاعب محيطة= بلين وعزم جنب صبر وجلاده= انا لا ذكرته تهيج القريحة= وتحيي جروح القلوب الجريحة= وروح الشقي ليتها مستريحة= على مايقولو ماشفت سعاده= سنينه علينا سهيرة بصيرة= ولاطب فينا ولا به بصيرة= ومابيننا من مسافة قصيرة= بها العمر يجري ولا وصل ماده= حروف القصيدة في صدر الجريده= ورمز المعاني حروف القصيده= وغنّا بها القاف لحن النشيدة= راسه فراشه ورجله وساده= زماني حداني وانا ماحديته= رماني بجور العنا مارميته= وهمي رسمته ودربي مشيته= وسادات الايام للعمر ساده= |
طير الفلا فالشيح سواله عشوش = والحر وكره فالحيود العلية والفرق فرق جنيه عن خمسة قروش = في عملة الصراف للصيرفية اهل الوفا والطيب للطيّب تجوش = ولا تلتفت لاحاد فالدرب عية قن العرب ماقيل فالعية تهوش = يزيد لو يلقى ثمانين كية كلامهم كنه على صخر منقوش = وقالوا عن العية ومنهو حلية لا ياحليله لابس اليوم طربوش = مدري شراه الفكر والا هدية مافيه واحد بينهم منه مدهوش = فيده تبارك له على الجامكية يمزح مع الاطفال يضحك وفرفوش = ولافيه فالعقال مثله وزية مايخصمه في جابته كل مربوش = لاذيك ضيعها يعودّ لذيه العرف ماجابه بحيرة ودنبوش = جابه من دروس الردا والخطية يزرع بفكره قطن ويحصد منفوش = لاباع سية يشتريها بسية دايم فراشه للمعازيب مفروش = وللضيف من حرصه ثلاثين نية له رأي في وقت المهمات وجيوش = يهزم بها قوم العقول الخلية يظهر لنا في ظلمة الليل بشبوش = وتظهر لنا العقرب لو الشمس حية واليا لقينا الدرب به شوك مطشوش = نشوف لو تحته مع الداب حية |
الساعة الآن 04:08 PM |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir