|
يالعيد ماني خبرك العام يالعيد
بعدك جرالي بالزمن ماجرالي العام فيك ارقب على نايف الحيد وجي وروح بكل طرقه لحالي واليوم مثل اللي جرح ساقه القيد وثقلت يميني ماتعدل عقالي اسباب والاسباب نوب المقاريد ياعل مايبقى للاشرار تالي في شرها تبلى عيال الاجاويد مايذكرون اللي على الكل عالي عيونهم مثل السهم والعباريد يالله عساهن لرمد والخلالي ميعادكم في يوم فيه المواليد تشيب بامر الله عزيز الجلالي عجاب صالح الحنتمي |
انا همومي كل مغابت الشمس
تواردن قلبي على جولتيني والقلب من جور الزمن من حمس حمس يكفخ بصندوقه سوات السجيني عليه راجن ونعمس خاطري عمس وانا حزين وزادن الحزن فيني ياموتري قبل المرض نبعد الرمس عليك اغني لامشيت الهجيني واليوم فرقه فرق عن فايت الامس ثقلت قدم رجلي وثقلت يميني وثقل السان وصار هرجي على الهمس وقللت مسياري على الغانميني من ضيقتي غير افرك الخمس بالخمس ياليت يرجع مامضى من سنيني يوم اتذكر ماضين منطمس طمس مالومها لو تذرف الدمع عيني عجاب صالح الحنتمي |
طال النهار وقام ياخذ من الليل
سبحان من يولج بليله نهاره وانا ولج خلف الضلوع المناحيل همن مخلي خافقي تقل شاره مثل القذايف من مدافع اسرائيل اليا اقصفت مبنى تطاير غباره العين نمسح دمعها بالمناديل تقول فيها من سهرها ظفاره والحال حال اللي جرت له بهاذيل احيان مايقدر يسكر زراره يالله يعلام غيب المقابيل اطلبك باسمك في سريح العباره اجعل لنا من نور هديك قناديل في يوم بين ايديك صعب انتظاره مامن ورى بعض الخلايق محاصيل انجاس لو تظاهرو بالطهاره السن يضحك والضماير معاليل الطيب ياهل الطيب فيهم خساره الحنظله لو عرقها داخل النيل تزيد فيها كل يوم المراره عجاب صالح الحنتمي |
يالله ياللي مالغيرك عبدنا
يالواحدالفرد الصمد عالي الشان لك يااله الكون خشيه سجدنا نخاف يومن للعمل فيه ميزان من عرفنا للعرف حتى لحدنا عندك مسجل دون زودن ونقصان عليك في كل الامور اعتمدنا ونعوذبك من كل فاسق وشيطان برضاك يارزاق خلقه سعدنا يعالمن مايعلمه جن وانسان لنعمتك يامنشي سحابه حمدنا يامثبتن دينه على خمسه اركان يفارج الضيقات عجل سعدنا يامن عطيت الملك عبدك سليمان ومن خشيتك يخالق الكون زدنا لابد مانحمل على روس الامتان وكلن يقفي بالحد لرقدنا نسمع قريع انعولهم والوعد حان غير العمل واللي زرعنا حصدنا ماينفع الانسان ماله وخلان يسامع اسمع قولنا لاقصدنا ابيات تبقى خالده وسط الاذهان عجاب صالح الحنتمي |
مرحوم ياريف الجماعه ومن جاه
ياطيب الرفقه قوي العزومي سند عسى ربي من النار ياقاه ظاف الكريم اللي بخلقه رحومي راعي هلا والباب فاتح لمن جاه دمث الجناب وللمراجل يرومي عليه قلبي بعد قفن مطياه بين الضلوع العوج صاير يحومي والعين لاشافت بدربي حلاياه هلت غزير الدمع وغرق هدومي يالموت لاتاخذ هل الطيب والجاه عليك باللي مايسد الزومي كبير نفس ونظرته عند ماطاه ماله عزم مع طيبين العزومي ياعل مايكثر مع الناس حلياه امين يامنشي صدوق الغيومي عجاب صالح الحنتمي |
يالله ياعلام ماخفي من اسرار
يعالمن بالكون دقه وجله تفرج لمن يسهر لياقرب الاسحار عاف الحياه وكل شين يمله مدري بلا سهره تصاريف الاقدار والا البنات الفاتنات اغمزنله ماضن له فيهن هوا سر وجهار العمر مقفي والجسد فيه عله بلاه من جور الليالي والاقدار يالله ياللي كل عقدن تحله محتاج راعين المصالح والاشرار موتي بعز ولا حياة المذله ماني ضعيف عزوم ومعومس اشوار ابوي صالح ريف ناسن مقله وجدي سند يوم المغازي والاخطار كم ذود من دار المعادين تله عقيد قوم ومن بعيدين الانظار عيال حنتم لابتن مستقله عجاب صالح الحنتمي |
يافيصل نغيمش سلام وتحيه
سلام من عجاب من باب الاعجاب ياراعي الفزعه زبون الونيه يفوح منهاالود مع زين الاطياب هداج يامروي كبودن ضميه بالاجر فزت وكل شين له اسباب مدحك بشين فيك ماهو خطيه والله مادونه تخاذل ومجناب امدحك يافيصل بنفسن جريه الكفو يمدح وانت طيب وبك طاب شاعر وحقك يارفيقي عليه اشيد في طيبك مع اجناب وقراب والله مابغى منك شكر وهديه يكفي مجمل حرب مع كل الاجناب مجلسك لضيفان والاهليه فاتح وماحطيت من دونهم باب فيه الشبب والعود والشاذيه وسوالف الاسلاف بفويه شياب وربعك ليا عنو بنات العبيه وصاح الصياح وصاربه حزم كلاب مايذبحون الا عقيد السريه ولباسة الجوخ الحمر وقت الانشاب بني وهب ياما خذو من رعيه يوم المغازي بين مفلس وكساب ماقلت غير الصدق باهل الحميه بالقول لامنافق ولاني بكذاب عجاب صالح السالمي ///////////////////////////////// تسوقني دون القبيله حميه ماني من اللي لابدأ ماقفه غاب شاعر واميز وش عليه وليه واشوف قدري مع طويلين الاشناب والطيب افرح به واقدر مجيه واشوف باالثنتين ميزان الاصحاب وعجّاب وافي والمعاني وفيه راع البيوت اللي تميز باالاعجاب الحنتمي راع البيوت النقيه هديه جزله ومن راس عجاب وريث عود سيرته عالميه مثايله غنو بها اللي باالاصلاب تدري بها العربان ماهي خفيه ولياجهلت انشد من اصحاب الالباب عساه باالجنه وصحبه نبيه ويفوز باالصحبه بلا ذنب وحساب اهل الوفاء والعزوه السالميه دفانت الركبه بساعات الانشاب يوم الزمان مخيف والنار حيه تعرف مواقفهم على خيل وركاب ومدحك لبن عمي حميد السجيه ابو فهد سمح النباء عرب الانساب كفو كفو راع الكفوف النديه تنشر له البيضاء على راس مرقاب من دون ربعه وقفته حاتميه في ساعه فيها يضيعن الاطباب وقف ولاحسب لهاذي وذيه وكتب له التوفيق من رب الارباب هاذي علومي يا مدله خويه ويفداه من يعطي عن الخير مجناب اللي تواما باالسواف لحيـه من خلقته ما ادرك جماله ولاطاب وانا حبالي باالموارد رهيه ختمتها والقاف باقي ولاشاب الشاعر/تركي المحرول |
الله من قلبن تقل فيه قداح
لانامو السالين نومي شلافيح والكبد كن بوسطها شلف ورماح افز من نومي على الساق واطيح يوم اتذكر مامضى لي وماراح اهبي يادنيا غدت بالزحازيح من ضمنهم قفت بناصر ومياح ذباحة الحايل واهل هبت الريح اهل كرم ماهم مثابير وشحاح اكرام ساس اكرام ماهو مشاحيح ياعل براق الحيا كل مالاح على قبور اهل السخاء ينبت الشيح بالوقت لاسالي ولاني بمرتاح ياما جرالي بعدهم من سواميح ادفها قدام ودي بالارباح وترجع ورى وسهوم بقعاء ذوابيح ولقيت صبر المبتلى طب وسلاح يكفي عن التفصيل بعض التلاميح عجاب صالح الحنتمي |
ياشامخ الهامه وستر القصيره
تركي رفيع الشان قرم الاواليد شاعر وطيب يالمحرول سريره عن الصحيح وكلمة الحق ماتحيد حفيد فارس في نهار المغيره مايخاف زرق ارماحهم والعباريد اسمع كلام اللي نقاوي ضميره ياسيفنا يوم اعتراك القواصيد والله وسبع انعام باهل الزبيره اكبارهم وصغارهم دون تحديد ليه مع اهل الطيب خوه وجيره على النقى ماهي علوم وهرابيد وان صار لاموات المناعير سيره وذكرتهم ومفند الهرج تفنيد ماهي على الاحفاد عيب ومغيره يابعدهم عن الردى والمناقيد شايب وعاقل ياوجيه العشيره مالي فيي بعض السوالف مقاصيد يعني كلامي طيبين السريره زمل الحمول وناقلين البواريد واللي مسيري يختلف عن مسيره ان مرني خليت له كامل السيد الصدق للعاقل سلاح وذخيره والعقل نعمه يالرجال الصناديد عجاب صالح الحنتمي @@@@@@@@@@@@ يامرحبا عداد نبت البذيره بارض تساقيها مزونٍ رواعيد ما احضر نبات الارض في كل ديره وجاء للطيور بخضر الاغصان تغريد ببن الكرام اهل الوجيه السفيره اللي لهم مع كل جزله مواعيد اهل المواقف بالسيوف الشطيره دون الركايب وامهات المفاريد واللي يحاربهم يواجه مصيره علم صحيح ولايبا زود توكيد كم من حريبا ذوقوه الكسيره يوجس بكبده من سببهم لواهيد قبل يسود الامن شبه الجزيره والله يعز موحد الشمل توحيد و ياخو جزاء مافي كلامك معيره بعيد عن نقد العرب والحواسيد شاعر يابن حنتم وعينك بصيره ولافي كلامك يابن عمي مناقيد واللي يضيق وكل كلمه تثيره قله وصلك العلم لانقص ولاازيد خله بعكس الناس يشعب بعيره قدمه اسهال زاميات وجراهيد والناس تالي وقتنا مستطيره تبا تحط لكل كلمه رواصيد لكن عسى في تالي الامر خيره وما قل دل وكل شي بتحديد نيابه عن ساكنين الزبيره اهل البيوت اللي مثل زامي الحيد عشيره ياطيبها من عشيره لياجيتهم عندي مثل ليله العيد اهل الكرم يوم السنين العسيره واهل الدلال المكرمات البغاديد وختامها عطر يفوح بعبيره مورد من يمه الغرب توريد الشاعر / تركي المحرول |
الناس تفنى واليالي مقيمه
والرابح اللي فاز دنيا وديني رجال له بين المطانيخ قيمه ومدي حقوق الله في كل حيني وان شاف مجلس فيه ظلم وظليمه حطه يسار وقال دربي يميني عن الردى واهل العلوم الوخيمه ابعد وصلى للولي ركعتيني وعلى مجالس منكرين النميمه اشفق واحب مجالس الغانميني حربي وربعي حرب ماهي عقيمه افعالهم تثبت كلام المزيني قلوبهم بالجار دايم رحيمه فعل البلالي ماوجد له وزيني ونويشي اللي قص يمنا كريمه ومن غيرها سته بجنب البطيني عند الخوي ماهي دوافع جريمه ياطيب فعله في قديم السنيني وقال المطوطح يوم لشعر قيمه ابيات تبقى خالده للفطيني ياليت عنهم ماعطيت الخريمه وماهل بعد افراقهم دمع عيني ماجيب غير اللي عليها الوسيمه الكذب ماخلا الرديه سميني عجاب صالح الحنتمي |
الله يجمل حال شارع وراكان
ولافي ولد سالم عسى الطيب فاله وافين معي بكل حزه وميدان كلن يلبي مطلبي بالرساله اشهد شهادة حق ماني بغلطان رفقه وخلق وطيب ساس ورجاله ان جاء مجال لمدحهم ياهل الشان ذكرت مافيهم بصدق وبساله الطيب له بوجيه الاجوادعنوان ويصعب على من دوره في رياله من يزعله مدحت طويلين الايمان يطق راسه في شوامخ جباله جعله مايرضى لين يطوى بالاكفان راع الردى مايحب راع الجماله ماقل دل وزايد الهرج نقصان قلته وقبلي من سبقني وقاله عجاب صالح الحنتمي |
الراس شاب وماتحقق مرادي
ياعلها من عالم الغيب خيره علام مانعلم عليه اعتمادي حلال صعبات الامور العسيره يالعين لو عفتي لذيذ الرقادي والله مالومك مابقيتي سهيره شكواي لله ماشتكي للعبادي سبحانه اللي مالنا رب غيره الناس ماتعلم خفايا فوادي وانا مابوح لكل واحد سريره عن الملا رجال دايم حيادي مستور حال الله يديم الستيره وان صار لي بين النشاما منادي رجال عندي بعد شوح وبصيره الطيب ياهل الطيب دربه سنادي والهون دربه يالعوارف يسيره اللي زرعها طيب وقت الحصادي يجناه لو طالت عليه المسيره عجاب صالح الحنتمي |
ياما دفنا بالمقابر من رجال
عليهم الخافق تقل فيه صالي اموات لكن ذكرهم حي مازال عسى لهم من ضل عرشك ضلالي وياما على كبد البسيطه من انذال ياعل مايبقى للنذال تالي لهم اقبلت دنيا المتاعب والاهوال وعطت قفاها طيبين الرجالي يارازق النمله وياساتر الحال اربط على قلبي نهار السوالي العين ملت نومها والسهر طال يالله يالمعبود تلطف بحالي اشوف دلوي بالزمن تصفق الجال معاد يطلعها طويل الحبالي الكبر وصدوف الزمن وشهب الال تخلي الاول يقولون تالي غنيت ماحسيت في جزل الامثال اخترت جزل القول من ماطرالي عجاب صالح الحنتمي |
الطيب ساس ومعرفه يابن صالح
وهبه من الله مايجي بالتصناع والناس ياعـجـاب صالح وطالح متخالفيـنٍ بـالـعـوايـد والأطباع والـلي يـرز نـفـيـسـتـه و يتمالح وده ينافس عالمٍ ذكـرهـا شاع والله يالو يلبس جديد المشالح . التـبـع يـبـقى طول الأيـام تـباع راع الردي بالطيب ماهو بفالح يـطيح مهما يرفعونه عن القاع وجـه مع وجيه الرجاجيل كالح لأنـه قـريّب شوح وقصـير ذراع ديني ودين أهل الطمع والمصالح . جـمـيع مـا بيني ومـا بينهم ضاع الأبـيـضـيـن المـوت سكر ومالح ما زاد منها بلجسد سبب أوجاع •• مخلف علي أباالميخ &&&&&&&&&&&&&&&&&&&& الطيب زرقت رمح محسن وشالح ماهو بضاعه بين شاري وبياع واللي نخيله جددت القنو بالح لايحتري فيه الرطب والتعب ضاع لاصار نبع عدود غرسه موالح ماهو بجانيها فواكه ونعناع بابن علي خلك بروس الوالح ياراس ماانته للمساكين مطواع ماقلت صح الناس حسب المصالح وفيهم رجالن توفي الكيل بالصاع اليوم اخير من الخلاف التصالح والبعد عن من قربهم هم وصداع اهل الوجيه البارده والكوالح ياعل ينزعهم من القاع نزاع افلح ترى درب الرجال الفوالح تمشي بها قدام مع درب الاسناع عجاب صالح الحنتمي |
ياحن قلبي حن خلجن ضوامي
مع كنت الجوزا على طية البير قبل سنه تارد عليه الحيامي واليوم مايملا فويه العصافير في قاعتة طاح الرشا والمقامي وجوانبه ماغير عج ومعاصير على زمان اهل الغنم والجهامي بدوٍ لهم في نجد هيبه وتقدير عهدي بهم وانا بسن الفطامي واليوم شايب والزمن فيه تغيير ليت الزمن يرجع بنا كم عامي خمسين عام حدودها يالمناعير لو اني اسرح ماب خرجي طعامي رزقي على رزاق عكف المناقير اخير من ضغط البلد والزحامي ومجلس ماتلقى به محبه وتقدير عجاب صالح الحنتمي |
عندي نصيحه والنصيحه من الدين
ياهل العقول الراجحه والرزينه تشرا من اول بالذهب والبعارين يوم النفوس بعهد الاسلاف زينه يالعبد كبر لاسمعت المواذين وصل الصلاه بوقتها في سكينه مع الجماعه صلها ياحمر العين لاتصير لشيطان دايم رهينه وخلك رضي بالوالدين الحشيمين ياويل من ينكر فضل والدينه وخلك على الاقراب ورد ورياحين من يقطع الارحام ذاق الغبينه والجار لو يسقيك سم الثعابين جازه بطيب ولاتجي منك شينه والضيف قوم بواجبه والله امعين عوايد اهل الجود يكرم بحينه وان شفت من يسعى بفرقاء القريبين خله يسار الدرب وانته يمينه اسمع مليح الهرج وعرض عن الشين لاتصير للهراج مثل الكبينه عجاب صالح الحنتمي |
ياموتري خذبي مع الصبح جوله
غربي من الزلفي شمال الثويرات ياعلها نون تطلق ثعوله على بطون الاوديه كل الاوقات علمي بها بحدود سن الطفوله وقت البداوه بالسنين القديمات واليوم شايب مايلاتن حموله الحيل فاتر والقدم فيه كدمات النفس فيها للبداوه ميوله ودي بها لوهي من المستحيلات ودي بشوف اهل الكرم والرجوله اهل النقى واهل التقى والصلاوات من مات يارب الخلايق قبوله والحي جعل ايام عمره جميلات مافات فات ومايجي بالسهوله وكثر الندم مايفيد في فايتن فات مرحوم يامن طاب راسه وقوله ياما على الجاهل يفوتن الافوات جعله من اللي قال عنهم رسوله بالجنه اللي عرض سبع السماوات عجاب صالح الحنتمي |
ذكر ت من بعد البطا ضلع سنار
سقاه من غر السحايب هماليل وذكرت قرمن له مكانه ومقدار اسبيل الدباغ ريف المقابيل يوم المعيشه لايذه يشعم النار ونجره على صوته تجيه المشاكيل وصفر الدلال اللي بهن بن وبهار عوايده زين النبا ذبحت الحيل للجار والخطار من كل الاقطار قدام تقفي فيه دنيا التهاويل خلف عيالن كلهم كفو وحرار مامات من خلف سواته رجاجيل الميت اللي ماعنه ذكر واخبار مايشكرونه شاربين الفناجيل عجاب صالح الحنتمي |
اليا نتهاء عامن بدا عام غيره
من خلقة الدنيا ليوم القيامه العمر ينقص والمشاغل كثيره نسعى ومابه حي حقق مرامه يالله حسن الخاتمه والستيره لابد مايطوي على الجسم خامه الرابح اللي يوم يلقى مصيره مشهود له بالخير والاستقامه ماكل مجاته مشاكل تثيره بعيد شوح وفيه طيب وفهامه واليوم من يكفيك شره وخيره كنه مسوي فيك طيب وكرامه ماكل من كافاك صافي ضميره حلو اللسان وفيه خبث وغشامه اليا مدحوك الناس عقد نظيره دمه مثل دم الحلم والحجامه لو فيك يلقى عيب كبر الشعيره حطه كبر ضلعان وادي تهامه عساه فدوه لرجال الشهيره اهل المواقف والكرم والشهامه عجاب صالح الحنتمي |
ياوادي الجافي جفاني زماني
شوفي شجر والحال قامت تردا ابغى اتمشى فيك والحيل واني اليوم مالي عنك درب ومصدا من قبل عشري ماتعود ثماني امر عصر الاربعاء وتعدا مارتاح حتى افهق جميع المباني مع صحبت اللي بالخوي ماتردا يوم اتذكر يالله المستعاني اشرافة المرقاب صعب المعدا وصوت الورود وصوت حبل السواني مع كنة الجوزا على جال عدا يجض قلبي خلف هاك الحواني جضيض من ضدوه الاخصام ضدا الباقي المعبود والكل فاني واعرف ترا من جاب لك علم ودا خافيك لاتبديه يالمودماني وفي شور وفعول النشاما تقدا عجاب صالح الحنتمي |
سمعت بيتن شدني طيب معناه
للمقبلات البس جويد الحزامي يابعد شوح اللي من الناس غناه عندي وكلن له نظام ومرامي من قصر بدينه على شان دنياه ماحاش في دنياه يرجع حطامي ان ماسجد لله خشيه ومرضاه وحل الحلال وعاف كل الحرامي خسران لو كل البشر تتبع ارضاه وله قاودة دنيا الفنى بالخطامي الرابح اللي لاوجب فرض صلاه واستغفر الله عن جميع الاثامي وان شاف هراج النمايم تعداه دربه عن النمام والعفن شامي لو مايحصل قوت يومه بمخباه عزيز نفسه ومعرفه واحترامي بعض البشر قربه مغثه وماذاه ياعل مابيني وبينه اليامي عجاب صالح الحنتمي |
تنبيك يالنشاد حمر الطرابيش
وقصيده اللي في غياهب لحوده يقول جونا حرب وقت المغابيش مثل الخيال اللي ترازم رعوده بقياده الموقد على الخيل والجيش ياما انزعو من كفنا من بروده وحنا جنود الترك مع الظفر طيش والجيش معنا ماتحدد حدوده رحنا بعد ضرب العيال المداغيش شتات والقايد هرب مع جنوده يوم الحجاز ونجد حرب ومناويش وحنا كما شامخ عسيره حيوده يوم المغازي بالنمش والمحاديش كم شيخ نكسر بالمواجه حشوده واهل كرم قدام مايكثر العيش والجار ربعي ماتبيح سدوده وخوينا عليه غيم ورشاريش حنا عضوده لاتردة عضوده دنيا ودين ومابنا كبر مع طيش الا على طايش تعدى حدوده وماندور الزله بروس المناقيش ونبعد عن المنقود واللي يروده نفوسنا لطيب دايم معاطيش كلام ورجال الحقايق شهوده عجاب صالح الحنتمي |
يالنوم مابيني وبينك قطاعه
اسكن جفون العين لاتسهر العين معك عيوني بعد عجزي وداعه شايب وماحب السهر والسهر شين لاوي زمانه بعد قوه ذراعه لاما مثل ماتشوف يالله لي اتعين لاقل مال والا ضعيف جماعه ربعي بني حنتم صعوط المجانين كم سابقن بالكون جتهم قلاعه لاثار عج الخيل بين المثارين وبيوتهم لضيف وقت المجاعه سمن وسمين وطيب جيره اوافين امدح بني عمي رجال الشجاعه وفي مدحهم مايلومني غير مسكين شاعر وعندي راي ماني تباعه ومجهل سلوم اهل الوفاء والقوانين عجاب صالح الحنتمي |
النوم للعين الحزينه علاجي
مير البلا من نوم عينه شلافيح وقتي معكر كل ليله مزاجي لو الحيا لرقب على الرجم واصيح تقول قدامي وخلفي سياجي ضاقت وانا ضاري على هبت الريح وسجت خلا مابين ضلع وزراجي في نجد ياجعله صدوق المراويح انشهد انه سلوتي وابتهاجي عن شوف ضيان البلد والفلاليح ماتقل يادار الاهل فيك داجي حي ٍ تبني فيك سود ٍ مداويح لضيف والجيران مثل الملاجي وسوالف ٍ من دون غيبه وتجريح لله سبحانه عن الخلق راجي مال السعاده عند غيره مفاتيح اجعل لهمي بالزمان انفراجي مدك ولا مد اليدين المشاحيح عجاب صالح الحنتمي |
يابو حمد ياشين بعض المواعيد
وانا احتري واقف على عظم ساقي عن المصدر لانشدت المواريد ماعلموني شام ولا عراقي الصدق ياقله وياموسع البيد للي يدور عن عميله متاقي اليوم حتى العيد مانحسب عيد ماعاد به فرحه ومابه تلاقي اهبي يادنيا الشقى والسراميد تخيبين اللي بك الخير هاقي ياليت لي قدره على نايف الحيد عليه اعدي كل ماصدر ضاقي مير البلا فيه عن اشرافته قيد الكبر عن عاليه لرجل عاقي يوم اتذكر يالرجال الصناديد هاك البيوت مرفعات الرواقي اون ياوجيه السعد والاجاويد ونت كسيرن غاب وعيه وفاقي عجاب صالح الحنتمي |
يالمال لا ترفع عفون الرجاجيل
تكفى تنزل كل واحد محله يستاهلك حلو النبا والمعاميل بالمجلس اللي كل طيب يدله غير الشبب والهيل حلو التعاليل علاج من غثه زمانه وعله مثلك يابو راكان ريف المقابيل كريم واهل الطيبه ماتمله مالك حلا بجيوب ناسن مباخيل لو زدة زودك نقص والعالم الله راعيك نفسه لاقبضها ازرائيل جاك الوريث يسابق العصر ظله حفظك قبل يموت حفظ المباخيل وغيره بناله منك بالحي فله والفقر عوق لكل نادر وحلحيل كم طيبن خلابه الوقت خله بالفانيه كل الخلايق رحاحيل يالله عفوك مع بياض السجله عجاب صالح الحنتمي |
عساك يام نقي مع طلعة سهيل
يسقيك نون بارقه له رفيفي يسقيك من فضل الولي تالي الليل والسيل له مع كل وادي وحيفي شهرين فوقك كل ليله هماليل ماطرك لاجارح ولاهو خفيفي دارن لعشاق البداوه مداهيل في برد ولا في لواهيب صيفي علمي بها يوم الرشا والمحاحيل وانا صغير وللموده رديفي واليوم ياربي عليك التساهيل من الكبر بالدار مثل الكفيفي يادوب ياروس الرجال المشاكيل امشي على الاقدام جنب الرصيفي اهبي يادنيا الشقا والبهاذيل تخلي الرجال مثل العسيفي ياعل ماتلقى عليه مداخيل سود النوايا والسان الرهيفي لو كان ماني مطمعه للمهابيل قوي باس وراس ماني ضعيفي عجاب صالح الحنتمي |
عديت من قور الزبيره بقاره
بعد العصر قدام وقت المغيبي والدمع من عيني سريع انحداره والقلب من ماشفت مثل الصويبي العود يابس من سمومه خضاره والارض توحش قورها والشعيبي ومشيت قبل الليل يسدل ستاره كني عليها في زماني غريبي يالله يامولج بليله نهاره تجعل لها من غر سحبك نصيبي يقبل من المنشاء ويسكن غباره واليا توسقها يجيله صبيبي ديار حلوين النباء والطهاره جمع الوهوب منزحين الحريبي يوم الجزيره بين غاره وغاره فوق النظا وملافحات السبيبي ياما غزو شيخن بعيده دياره وعليه خلو للعذارا نحيبي وقصيرهم لو شان يلقى وقاره في وسطهم مايشوف علمن مريبي اكرام ساس اكرام ماهي عياره الله على ماقول فوقي رقيبي عجاب صالح الحنتمي |
ياونتي ونت عليلن يكوا
مريض ماله بالمشافي علاجي من كاس صكات اليالي تروا بعد القراح العذب شربه هماجي اليا ذكر مافات قام يتطوا ودنياه صارت كنها بطن صاجي يامل قلبن بين الاضلاع هوا تقول فيه الصبح لجة حراجي يوم اتذكر ماضين تقل توا بالحلم والا العلم دونه سياجي افضل العزله عن عيال حوا لاشفت مالي بالمجالس خراجي وعن قول سوا فلان وفلان سوا وهرجه تعكر خاطري مع مزاجي عجاب صالح الحنتمي |
دايم يجاريني نضيف السريره
من التواضع والتواضع من الدين تركي حفيد اللي يصد المغيره يثني ورى البل لاغدى الجمع جمعين عقيد يبعد بالمغازي مسيره ماهو تباعه يتبعونه شجيعين نقا لياعدو زحول الجزيره ذكره ينومس حرب ماضي وهالحين قولن بدون اثبات عيب ومعيره ونا على ماقلت عندي براهين واهل الحسد ياجعلهم بالسعيره بعيد والا من جبرنا قريبين يابن نجر يوم الرحا مستديره لك ماقفن ماينكره غير مسكين الحسد محرق فيه سلك الظفيره لاسيرتن زينه ولا منطقن زين خيال وقت العافيه والستيره وان صملو باراي ضمن النساوين الطيب كايد والمواقف كبيره كلام صادق ياحفيد المسمين اسلم سلمت ودمت ذخر وذخيره ياسيفنا يادرعنا ياحمر العين عجاب صالح الحنتمي /////////////////////////////// واصل يابن حنتم وحث المسيره شاعر ولك باالمجد ساس وعناوين عقب الرجال اهل الوجيه السفيره جدك وابوك اللي على الطيب ضارين سند عريب الساس ستر القصيره نعم ببو صالح زبون المخلين ضف الطروش الوارده والصديره واغناء الفقارى وافقر اللي غنيين ولحقو هل اللبل يوم جاهم نذيره وشافوا وراحوا من طبلها معيفين وصالح عسى الله من عذابه يجيره راع الوفاء والطيب والمنطق الزين واللي تصيبه من قصايدك غيره يشرب بحر والا نحده على الشين وانا معك باالكايده والصغيره واللي يعاندنا يذوق الامرين لانرجي الخايب ولا نستشيره حنا هل الوقفات باالعسر واللين تركي المحرول |
يالله بنون يسر العين براقه
يسقي مداهيلنا ويعم الاوطاني شهر بكل الحبيبه تشبع الناقه وتجار الاعلاف دوب تقول مجاني لو ان مالي على سج القدم طاقه من بعد مقطع بعيد الدار وحداني النفس للماضي المانوس تواقه حب البداوه جرا مع دم شرياني حرارة الشمس تعطي للجسد طاقه مايهمني لو سرحت الصبح حفياني ومكيف البيت الاسود رفعت ارواقه والتدفيه بالحطب والزند صواني والماء بقربه وربي قسم ارزاقه علام مايدور في ذهنك يالانساني واليوم نفسي من ادنا شي زهاقه وانا من اول وسيع بنود وبطاني عجاب صالح الحنتمي |
لاصرت ماترجى ولا منك ينخاف
عزي لحالك يارفيقي باهل الجيل ييتن سمعته من على وقت الاسلاف اعجبني المعنى ودق التفاصيل واخذت لي مع هجعت الناس محراف اسامر نجوم السماء والتماثيل القاف ياهل العرف مبني على القاف شاعر بيوتي بالمعاني محاميل من شان مايلقابها كل مزهاف علي درب ويرقب الضلع ويميل من قام يرقب للخطا كل مهياف لابد ماصلف الهبايب له اتشيل نصيحتي ياهل المراجل والانصاف باليله السودا سوات القناديل من عاش بالدنيا بلا دين واهداف مايفقدونه بعد موته رجاجيل الطيب ماهو عملتن عند صراف الطيب عمله بين روس المشاكيل اليا عطوه اهل السعه عرض الاكتاف نلقاه عند رجال ماتبخص الكيل عجاب صالح الحنتمي |
يامتعب ابن حمود يامعدن الجود
ياطيب الرفقه وسيع البنايد سلام تسليم الوفى ماله حدود ماغرد القمري بخضر الجرايد ياطيب الفزعه ذرى كل مضهود تستاهل البيضاء وجزل القصايد عليك يابن الخال حليا من العود الشايب اللي طيب راس عوايد رجال عرف وماوطا كل منقود يشكر ويذكر في نهار الشدايد طيبه مع العربان واضح ومشهود تشهد على جوده وطيبه بدايد ذكره وفعله بين الاجواد محمود في حال ياهونه وفي حال كايد عجاب صالح الحنتمي |
يامكيف الفريون عندي هوا نجد
اخير وابرك من هواك الصناعي عليك وقتي حدني بالزمن حد خلاني امشي طوع ماني مطاعي مابيني وبينك عداوه ولا ود الود لدار البعيد الرفاعي عن زحمة الشارع وشوف المقرد وكثر الكلام اللي يجيب الصداعي على فراشي عتمت الليل ممتد والعين لنجوم المجره تراعي وعلي يذكر يوم نارد على العد وهاك الديار الطيبه والمراعي يوم القلوب انظاف ماتعرف الحسد واليوم ياستار مثل الافاعي عجاب صالح الحنتمي |
ياما بهالدنيا جرت لي تكاليف
وزريت اميز وجهها من قفاها ساعه تقابلني بورد وغطاريف وساعه تكدر خاطري من غثاها ماني عليها من كثير التحاسيف اخترت عنها الاخره من رداها ياحن قلبي حن خلجن مواليف على القليب اللي طويلن رشاها وردن عليه الصبح في جمرة الصيف لقاعتة غاير من القيض ماها داجن عليه مقوسات الغضاريف وماتن ضما والشمس بوسط سماها على زمن مافيه حسد وملاقيف والناس طيب قلوبها من رضاها مافيه لاغيبه والا فيه تحريف لو صعب كل الناس تكسب رضاها واليوم وقت مفرقين المواليف ياقل طيبها وكثر اسفهاها عجاب صالح الحنتمي |
يامن خبر يحذي وهو مالك شين
هذاك ابن ناحل بماضي سنينه بيت اشتهر لعبيد حرز الذليلين ياطيب معنى عبيد يسامعينه قدام تجار البلد والملايين يوم ان كلن نجدته من يمينه هذاك هو وقت الكرم والكريمين يوم الفتى تدمع من الجوع عينه رغم الظروف الخانقه والمعاوين راع الكرم والجود ربك يعينه يجود بالماجود نسل العزيزين لو الفقر والجوع واسم جبينه هذا الكرم يفاتحين الدواوين يعازمين الضيف ومصورينه قدام مايقلط تشوفه ملايين لاعاد يومن فيه يعازمينه دروبه الاقصين قبل القريبين بالضيف وبسلوم الرجاجيل شينه عجاب صالح الحنتمي |
انا علاجي شوف جرد الصحاري
قبل الشتاء والقيض مقفي حسابه تو المطر مالي جميع الخباري وتشوف بالمنشا نواشي سحابه وقبل الظهر قدام وقت العصاري عم الديار جبالها والشعابه مافرقت نوه هبوب الذواري سبحان خلاقه عظيم المهابه قدام ماتجري علي الجواري وتركز على قبري طويل النصابه ابغى اتونس مع وسيع البراري وعيد للقلب المولع شبابه قدام ماسكن في هذيك الحواري وانا بدوي وسمع قنيب الذيابه واليوم ماسمع غير صوت البواري والطرق زحمه والبلد يندعابه عجاب صالح الحنتمي |
يجود بالماجود نسل العزيزين
لو الفقر والجوع واسم جبينه هذا الكرم يفاتحين الدواوين يعازمين الضيف ومصورينه ياسلااام صح ذوقك ياسعد المحمدي ملايين صح كلك هذول بيتين كل بيت يحكي قصة جيل صح لسان قائلها وسلم بنان من أتى بها وامتعنا بقرائتها لاخلا ولاعدم |
طال النهار وقلت وين انت يالليل
عسى سواهيج الكري تشرح البال اثري ظلام الليل هم وبهاذيل على عيوني يوم مريت الاطلال بالحلم سجيت القدم بالمداهيل باول شبابي يوم لزمل جمال وبطرافها شبيت ضو المعاميل وسويت لي من طيب البن فنجال ولي اشتكت قل المطر والمواصيل وبعض الشبوك اللي من الجال للجال قلت الوصل مفقود جمله وتفصيل باللاف مانطلع ثلاثين رجال اما الشبوك اللي سوات المحابيل مالي بها حيله وانا رجل رحال وصحيت من حلمي ودمعي هماليل بعض الحلوم تقول من واقع الحال عجاب صالح الحنتمي |
بالحلم سجيت القدم بالمداهيل
باول شبابي يوم لزمل جمال وبطرافها شبيت ضو المعاميل وسويت لي من طيب البن فنجال روووعه وربي روعه واكثر صح لسان قائلها وسلم ذوق وبنات ناقلها الشاعر القدير سعد المحمدي صح كلك ملايين لاخلا ولاعدم |
الساعة الآن 07:11 AM |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir