يالرّبع قولوا وش يسبِّب سلوك السفاف؟= اللِّي يعمّ القرَيِّب و البعيد اقشِره
يسوِّي شجيعن من اصناف الخطر ما يخاف= تسمع صليله الى مرّك و صوت اكفِره
الموتر اللِّي اصْطابِه منكسر من خلاف= و يسوقه اللِّي يبا فعله يجيب اخْبِره
مغير يمشي و يلعب بالسكك طاف، طاف= و لا شاف له واحدن راكد قَرَبْ و احْشِره
يطوف يَمْنَه و يَسْرَه يَغِرْفِه بانحراف= و لو كان قدمه بعيرن باركنّ اطمِره
تقول يطْرَدْ من الاعدا و صابه شعاف= حتى على الخط الاسود من وراه اغبَره
و لو قلت له ليش تسرع؟ قال لك شي حاف= يقول: كان الْك نصف ريال خوذ اعشره
هو ما درى ان الرّكاده ما تحمِّل كَلاف= و توفر القاز و المجهود و الفرْفرَه
حتى و لو كلفه ساهر مئات الا لاف= مهوب مهتم لو نشّف لابوه اكمِرِه
يا الله يا واحدن دايم بعبده يَرَاف= تاقى الغلَيِّم و تكفي المسلمين اخطِرِه

الله الله الله
صح لسانك واعتلا شانك
والله قصيدة رائعه جمعتن انواع الشعر
ا نصيحه فكاكيه موعضه تصلح على اي شي
الموتر اللِّي اصْطابِه منكسر من خلاف

ولو كان قدمه بعيرن باركن اطمرة

حتى و لو كلفه ساهر مئات الا لاف


يا الله يا واحدن دايم بعبده يَرَاف= تاقى الغلَيِّم و تكفي المسلمين اخطِرِه