تكابر ياحبيبي والرضى في داخلك موجود=تحد وعاند وكابر انا ماني بمتحدي
تراها نقطةٍ سودا بصفحة حبنا المشهود=حرام تصير مع وقتي ومع باقي البشر ضدي
حشى ما اجوز منك ولو يقولون الأمل مفقود=ولَو تبين ضحكات التجاعيد بطرف خدي
حمول التنضحيه في الحب أظنك قدها وقدود=تحمل وادمح الزله ترى ما هيب من جدي
انا ادري غلطة الشاطر بعشره يانعيم العود=ندمت ومن قساوة ما حصل فيني ظهر سدي
واذا قصدك تحسسني بخطاي لكل شي حدود=دخيلك لا تعذبني تراني واصلٍ حدي
تأسفت وتعذرت وقبول العذر منك يكود=والى جيت اعتذر لك ثانيه ودي ولا ودي
ربوك اهلك على التدليل يا اول وآخر العنقود=وربَوني لعز النفس ابوي وخالي وجدي

ساعة جحيم ولا فراقه دقيقه=وناره علي اربع وعشرين ساعه
من ما الذهب سجلت ذاته حقيقه= بالذاكره محفوظ مثل الوداعه
الله جعل بالجنه ازكى حديقه=ومن حاز مثله حاز كنز القناعه
احساس مرهف والمشاعر رقيقه=لاهل الولع عز الله انه ولاعه
لقيت في دنياه فرحه وضيقه=قربه دوا قلبي وبعده ضياعه
الله جعل بين الخلايق خليقه=ود ومحبه واحترام وشفاعه
وخلاه بفوادي يشب الحريقه=وياخذ علي اقرار سمعٍ وطاعه
ويوم اصبحت روحي بحبه غريقه=اتلى العهد به يوم قفى شراعه
اقفى وحلقي ناشفٍ فيه ريقه=في موقفٍ ما تفيد فيه الشجاعه
منه النفايس بالضماير طليقه=ما وثقن بدار نشر وطباعه
خلاني آصل للكنوز العتيقه= واصب له صوغٍ يناسب ذراعه
واكتب عليه ابياتها بالسليقه=وانقش عليه إسمٍ يليق بوداعه

سجلت يا علي الهليل وثيقه= ان الفراق اقوى من الاستطاعه
فرقا الولايف يا علي من يطيقه= محدٍ عن الفرقا محاط ابمناعه
كم عاشقٍ من بعد فرقا عشيقه = حاله قضى كنه يعيش ابمجاعه