يا مرحبا يالشعر مالك مهونه = محتاج لك وانته لشرواي محتاج
حقك علي البيت اعزه واصونه = والبسه من طيب المعرفه تاج
الشعر ين خاني وكحل عيونه = وان خاه لاجتني هواجيسي افواج
واقنع النقاد لاينقدونه = احط دون السور صبات وسياج
اريض المعنى واهجرس لحونه = به قسوة الصاطي وبه لين ديباج
تمسعو والشعر لاتفسرونه = الشعر تفسيره يسبب لي ازعاج
لي مقصدٍ بعض العرب يجهلونه = وللبعض الاخر واضحٍ كنه اسواج
وكان الهدف ما يقصر الرمي دونه = ابعترف بالحق وافخر بالانتاج
ورجلٍ يصون العقل عقله يصونه = يبعد عن الزله ويسلم من العاج
يهل البعير اللي تبا تا سمونه = الوسم في خد الجمل يلعج لعاج
ماهو بتاركم ولو تتركونه = يضوي ولو انه بدار العرب داج
هذا موالف والعرب يعرفونه = وسمه بخده قبل مرباع الافلاج
القيد لبليهان لاتفتلونه =باب الطمع دونه مسكر بمزلاج
والمطرق المنعاج لاتعدلونه =ليا انعدل ياخذ شويه وينعاج
لوان فيه من المرونه مرونه = مشعور راسه ومتعروج تعرواج
والوعل لوانه تطاول قرونه = لاواصل القمه ولاهد الابراج
والحق مثل اسهيل لو تاجدونه = يا اهل الهروج اللي تروج ترواج