|
البارحه جفني من الهم مابات
النوم حارب من عنايه عيوني والنفس طابت من جميع الملذات وقلبي من الدنيا جديد الطعوني لو ذكر ربي بالخفى والصلوات سبحان من يعلم بحالي وشوني لانوح نوح الورق في كل الاوقات ماهو هوا للبيض شقر القروني بلاي من وقتن به الدين بالذات شوه من الارهاب واهل المجوني حتى البنات الطاهرات الستيرات اهدافهم لحجابهن ينزعوني الدين ثابت ماتشوبه خرفات يامحرفين الدين ماتقدروني ماله علاقه بالزمن والسياسات يابايعينه رخص لول زبوني يخادم البيتين مني تحيات عساك تسلم من جميع الغبوني يكفيك صوت الحق عبر المنارات بنحا الحبيبه لندى يسمعوني عجاب صالح الحنتمي |
عجاب من دنيا الشقى ضاق باله
جرب وشاف وعاف واقفى امعيفي قاس الامور وكل طاري طراله وارقب على راس الطويل المنيفي شامخ اليا ميل عليه ظلاله جوه لطيف وكل مابه لطيفي لوهو بعيد اشتاق له وعناله ماني ضعيف عزوم ولا كفيفي وذكرت في عاليه منكر جماله لو تدفنه بالطيب عجل النكيفي ينكرك لو مالك رفع راس ماله غير الطمع والمال ماله وليفي لاحتاج يشرلك ويرفع عقاله بعيد ويحطك قريب وحليفي واليا بغيته مايساوي نعاله يموج ياجعله بحد الرهيفي عن الرديه مايكرم اسباله يوم الثقال اثقال وزنه خفيفي وجدي على قرمن عمامه خواله اليا نخيته جاك يوحف وحيفي يشيل ماشال الجمل لارتكاله عزمه قوي لو ساق رجله نحيفي عجاب صالح الحنتمي |
نامت عيون اللي من الهم مرتاح
وانا لذيذ النوم عيا يجيها تقول وسط جفونها موس جراح والكبد كن مشنشل الرمح فيها من هول دنيا مامشت لي بالانصاح عجزت اميز سرها واحتويها ارقبلها من صبح في راس لولاح واقفت وانا بعد البطا محتريها ياما طردنها لما سدنا باح واليوم نبغى الاخره مانبيها ماعاد باقي بالعمركثر ماراح ابيعها برخص ثمن ماشتريها منها السلامه خير من بعض الارباح مدام نفسي موتها مقتفيها الصبر والتقوى مفاتيح وسلاح ومن لايعرف صقورها يشتويها عجاب صالح الحنتمي |
البارحه لين اذن الفجر سهران
اراقب النجم المسمى الرقيبه اتعبني التفكير والجسم هزلان والقلب للهوجاس مثل الضريبه لاعاشق الدنيا ولاني بطربان ولاهو هوى لمشطات الذويبه بلاي فاقد لي قرايب وصدقان ياصعب فرقاهم وطول المغيبه غبر السنين اللي تقل ريش غربان كم فرقت بين الصحيب وصحيبه لابد ماياتيك للعمر ديان شباب والا كاسي الراس شيبه الموت حق وماعن الموت مزبان للاخره يالعبد حث النجيبه يوم القيامه بين رابح وخسران مايضيع عند الله حبة زبيبه كلام يصغي له من الناس فهمان قاس الامور الهينه والصعيبه عجاب صالح الحنتمي |
بعد الاشاعه ياطبيب العيوني
ماشفت صوره راصخه في خيالي صوره قديمه من سببها حزوني عن ماضين عشته قديم الليالي انسخ لي الصوره عسى ماتهوني ابغى القي النظره على مامضالي ياعل مابين العرب والضعوني اشوف زول امي وديرة خوالي واحطها مابين جفني ونوني هذا علاج العين ياهملالي ان مت شيلو جثتي وادفنوني في جنبها لو دونها البعد حالي وان صار عايق هللو واذكروني في خير والدنيا مداها الزوالي عجاب صالح الحنتمي |
يازيد توعدني عسى الله يعافيك
وطاف الوعد وانا اتحراك يازيد طرى عليه يوم انا جبت طاريك مثل قديم يرددونه وانا اوليد يجيك بالليل الغزيل ويزيك اثري علوم الليل كذب وهرابيد واليوم ياهذا الزمن من بلاويك الناس تخلف بالعهد والمواعيد كان الطريق اللي يجيبك يوديك واليوم لو وداك يعكس بك السيد حتى الصديق اللي تعزه ويغليك لاتامنه يرميك من عالي الحيد الطيب خله يافتى من مباديك لناس من خلقو سلوم وتقاليد عجاب صالح الحنتمي |
لي لازمن عيا يتهيا من سنين
حاولت به والحظ عيا يجيبه ركضت له ركض النضا بالميادين وسامرت له بالليل نجم الرقيبه واللي مايكتب يالرجال الفطينين لو البشر تفزع معك ماتجيبه وكلت بامري من خلقنا من الطين حلال صعبات الامور الصعيبه سبحان من نرجيه بالعسر والين النمل يسمع جل شانه دبيبه ماني لغيره مشتكي لو بعد حين شكوى لغير الله ذل ومعيبه من عادتي ماطمن الراس تطمين ولي نظرتن بالوقت ماهي قريبه عجاب صالح الحنتمي |
تكفيني ذنوبي عن ذنوب غيري
مالي ومال الناس حضر وبوادي عن الخطا والظلم حبلي قصيري وان شفت ضول الناس عنهم حيادي رجال عارف وين وجهة مسيري وماغيب لانادا علي المنادي وخشى عذاب الله عالم مصيري في يوم تبعث به جميع العبادي يالعبد ماينفعك مال وعشيري ماتزرعه تلقاه وقت الحصادي الشيب للعاقل يسمى نذيري ياالله تهديني طريق الرشادي ايامنا مثل الرحى تستديري ياضامن الايام تايه وغادي عجاب صالح الحنتمي |
لي جار من خيرة عوارف عتيبه
دايم محله للرجاجيل مدهال فوق السنه حطو عليه النصيبه يامال فرقى العين ياغاب رجال مريت متعدي مدور ذهيبه وذكر عليه راعي المعدن العال ومدهال وضحن للمناعير هيبه تقول ناقيهن من امراح فنجال لاصاح لولهن براس الجذيبه جنه هجيج تقول راكبهن اجفال امراحهن يقنب من العصر ذيبه بعد وفات سعود شيال الاثقال مرحوم ياللي من شبابه لشيبه رجال ماهو من هل القيل والقال ابكيه لو ياناس ماني قريبه الكفو يفقد بي حال من الاحوال يافهد بعد ابوك حالي كئيبه من وادي الجافي تقل في ولوال فرقاء مثل والدك عندي مصيبه ماحب فرقاء اللي لهم قدر وجلال عجاب صالح الحربي |
البارحه يوم الخاليق هجوعي
ماعندهم من طاري الهم طاري والقلب خلف مقوسات الضلوعي تقول شريانه على سلك عاري اليا ذكرت الباديه والنجوعي يوم ان نتنقل فوق سفن الصحاري وان لاح براق الحيا له نزوعي لاقال عساسه ملايا الخباري تذرف على مافات غالي دموعي والكبد يصلاها تقل حضو ناري مافات مايرجع لو احب كوعي سبحان من بامره تهب الذواري وين اصدقاي اوين غالي ربوعي غدت بهم دنيا الشقى والعزاري ماهو غريب ان صرت فيها جزوعي والحال باريها من الهم باري يالله تهديني طريق السنوعي انت الوحيد اللي بالاسرار داري عجاب صالح الحنتمي السالمي |
المرجله ياهل المناوى كليفه
قمة جبل من دونها يقصر الحوم على الردي واللي عزومه ضعيفه متصنعين الطيب والفعل معدوم ياللي بنفسك شايف اليوم شيفه برطمك لو تنفخ به النار مشروم لاصرت ماترجاء والا منك خيفه تصبح وحيد وبين الاجواد مذموم ياهل الوفى واهل القلوب النظيفه مايلحق اهل الطيب والمعرفه لوم ان سولفو جابو علومن طريفه ماهو على ماقيل نقالة علوم طالبك ياربي بياض الصحيفه للتف ساق بساق في يوم معلوم نفسي عن الطفسات دايم عفيفه وشوحي سما والعبد معطى ومحروم عجاب صالح الحنتمي السالمي |
عزالله اني بالزمن شفت ريبه
يشوفه اللي فيه لدين غيره اغلب مجالسنا نميمه وغيبه ومن الصغيره يصنعون الكبيره من شاف عيب الناس ماشاف عيبه عينه عن الدرب المعبد ضريره الناس من بعض الوبا مستصيبه يالله طالبك العفو والستيره حتى البنات امشطات الذويبه ياقل من فيهن على الدين غيره متبرجات وماعليهن رقيبه في وقتنا اللي حايس الله مريره وليهن ماله مكانه وهيبه ماشوف فيه اصبحت بالفين حيره الظاهر انك يالقيامه قريبه الوقت جاير والرحى مستديره القلب زايد من همومه لهيبه والحال حال اللي عظامه كسيره وده بسجه بالديار الرحيبه مير الزمان الشين غير مسيره عجاب صالح الحنتمي السالمي |
يالادمي عمرك مقدر ومحدود
لابد ماترحل مع الراحليني كم واحدن ميت رعى جسمه الدود وذكره مع الاجناب والاقربيني وكم حي لايذكر ولاهو بمحمود تقول ميت من قديم السنيني ان كان ماطيبك مع الناس مشهود رجال عندك بعد نضره وديني تبقى حياتك بين جاحد ومجحود مالك ذكر لاعدو الطيبيني يالله يامعبود ياخير معبود لامت تحشرني مع الصالحيني زاهد بدنيا كلها هم ولهود من جورها ياما نزل دمع عيني ان ادبرت تلت بك الحبل معقود لو حبلها بيديك قالو متيني واليا اقبلت لاقبلت تفرش لك اورود كلام من واقع تجارب فطيني عجاب صالح الحنتمي السالمي |
الله من همن ضرب قلب عجاب
ضرب السيوف المرهفات المحاديب لاقلت ياقلب العنى ويش الاسباب في داخله حسيت مثل الكلاليب وقنب قنيب اللي على راس مرقاب عن العشاء عدوه قومن معاطيب والكبد ينزف جرحها مابعد طاب فيها مثل بالليل جمر المشاهيب على خيار الناس صدقان واقراب اهل الوفى ومكملين المواجيب حال الثرى من دونهم والونس غاب عسالهم بحبال ربي مقاضيب واليوم خايف من زماني ومرتاب يطعنك فيه اللي مغطيه بالطيب مايضيع عن اللي خلقنا من اتراب مثقال ذره يوم فتح المكاتيب عجاب صالح الحنتمي السالمي |
العافيه والرزق من خالق الكون
مال البشر فيها تصرف وحيله لو برصدتهم مال كسرى وقارون تبقى مقادير الولي مستحيله باذن الولي ماينفعون ويضرون سبحان من مولج نهاره بليله مير اسمعوني كان بالاذن توحون كلام عندي للعوارف دليله ياهل الحسد واهل النمايم على الهون يابايعين الطيبه بالهزيله المال ماطيب مساكين وعفون الطيب كايد والمسافه طويله اهل الردى قبل البدايه يضيعون اللي بوقت الهون كلن دليله والقل ماكسر مجاديف دندون ضاري على رد الوفى والجميله يفداه من هرجه سوالف يقولون مايجيب غير المخطيه والفشيله الناس من هذا ومثله يعانون ياعل مايبقى لمثله عقيله عجاب صالح الحنتمي |
ماخطي وماحب الخطيه من الناس
عن الكلام الشين حافض الساني والنفس ماعودتها درب الادناس حافض وقاري بين قاصي وداني اشيد بالطيب وحطه على الراس بعيد والا ياملا من خواني ياكثر ماتطلع مباغيض وانجاس من القرابه يالله المستعاني حلوقهم من غيبة الناس يباس وطعناتهم منها القريب يعاني وياكم واحد من بعيدين الارماس ياقف معك لابار فيك الزماني لاقلت تكفى ماعتذر طيب الساس ينفعك لابار الردي والهداني انا رجل راعي مبادي وحساس ماحب درب الميسره والهواني من طاب يلقاني مثل درة الماس ومن شان ماشانه موافق الشاني يالله لاتثري ثرى كل بلاس حلو السان وبالقفى عقرباني للغافلين وخيرة الناس نداس ولطيبن من الحسد مايداني عجاب صالح الحنتمي السالمي |
حوالي الالفين حسبة معاشي
مايكفي الموتر مع الخط بنزين واللي مربي لوناسه مواشي عن جلستن بالبيت مابين جدرين برضن نضيفه مايبي له فراشي وسوى من الخولان مايضبغ الصين راع العلف يبغى على طول كاشي والجيب فاضي ياعسى ربي ايعين ونويت قبل الصبح يجلا الغطاشي ابيعهن ياناس وسلم من الدين كبير سن وحرق الهم جاشي يوم اتذكر مامضالي من اسنين ياناس مابغى زود هرج ونقاشي يكفيني اللي في مابين قوسين عجاب صالح الحنتمي السالمي |
البارحه حلو الكرى حارب العين
يااله تجزى كل نفس ابعملها لاقلت ياعين الشقى ليه تبكين قالت صواديف الزمن محتملها انشدك ياعجاب وين العزيزين اللي تحل عقالها وتعقلها من دونهم ياما حسبنا من سنين ناخت لهم سود اليالي جملها وذكرت لي من صفوة الناس غالين ونيت ونت من نشب في وحلها يبغى الخلاص وباغتوه المعادين متهوم في نفسن حشى ماقتلها عن حالتي غنيت بالشعر بيتين من وقت فيه النفس زايد زعلها عجاب صالح الحنتمي السالمي |
اول حياتي بالبداوه شقاوي
بين الشمال وبين نجد العذيه اسرح صباح وغيبت الشمس ضاوي حافي قدم من دون زاد ومطيه وبعد البداوه والزمان القساوي سجلت يالنشاد بالعسكريه كلي امل بالله وكلي رجاوي اعيش والسعد بالحياه الهنيه خدمت فيها بين مجبر وهاوي والحمد لمعبود رب البريه عرفت فيها من بعيد ودناوي ارجال كلن يعتزي في خويه وبعد التقاعد تالي العمر ثاوي شوفي شجر واثر على المعنويه والحال طاويها من الهم طاوي شهب السنين العوب جارت عليه افضل الجلسه لحالي خلاوي ماعندي الا دلة الشاذيه ومن خيرة الاصحاب قرمن حياوي محزم ظهر لابارت الناس فيه عجاب صالح الحنتمي السالمي |
يالعين لو تبكين حين قدتيه
الله يلوم اللي يلومك من الناس الدمع من موقك على الخد هليه عسى يخفف هم ويبدد الياس انا الحزين اللي على الله مشاكيه شربت من كاس العنى بالزمن كاس ماني وحيد الوقت ماكثر بلاويه كم واحدن مثلي شكى هم وتعاس من ماتشوف اليعين والاذن توحيه ياعاذلي لاتلومني صدع الراس وجدي على ماضي ليا اوحيت طاريه تقول في قلبي مسابير وامواس اخير من حاضر كثيره جواريه وقت اختلف وانا حياوي وحساس الرابح اللي فرض ربه يصليه صدوق ماهو بين الاجواد بلاس دايم مع الوافين تشكر مساعيه له بينهم قيمه وشيمه ومجلاس |
العود يسهر كل ليله ولابات
يقالب الارياء على راس عرقوب من وقت صاير فيه بعض الغيارات قل الصحيح وراعي الكذب محبوب وراع الصحيح يحاربه كل شمات يلبسه ثوبه مع الناس مقلوب لو تدفنه بالطيب ينسى بلحضات مافيه خير وماقضى للبشر نوب الطيب في مثله عليه الحسوفات مدام ماهو عند الاجواد محسوب ترى دروب الطيب صعبه وعسرات على الردي واللي من العرف مسلوب يطيب مره بعدها عشر مرات عن واجبه كنه مع الوجه مضروب مايستوي لطيبه والصعيبات غير ابلجن مافيه خله وعذروب عجاب صالح الحنتمي السالمي |
البارحه عني لذيذ الكرى طار
بينه وبين العين صاير تجافي لاجيت انام بنونها تقل مسمار من هم مابين المعاليق خافي اشكيه للمعبود رفاع الاضرار سبحان من فضله على الناس ضافي ماشكي على غير الولي سر وجهار شكوى لغيره للمبادي تنافي اما هرجي فيه من الناس ثرثار يفكر الايام دايم عوافي والا اتسبب يابعيدين الانظار بحراج رجالن معي دوم وافي نفسي عزيزه يامواريث الاخيار عن العلوم الهابطه في عفافي ياونتي ونيتها جوف الاسحار وانا ضلوعي من زماني اسخافي على الرجال اللي لهم فعل وذكار راحت بهم سود الليالي مقافي ماباقي الا ذكرهم عند الاخيار اقبورهم تسفى عليها السوافي عجاب صالح الحنتمي السالمي |
شايب وعندي يالعوارف نصيحه
من تجربه ياناس ماهي دعايه الكذب لرجال عيب وفضيحه وهرج القفى والدنفسه والوشايه ترى العلوم الهادفه والمليحه لطيبين من الرجاجيل غايه واللي ورى الهفوات تسمع فحيحه يرقص طرب على خطاك وخطايه ابعد عنه وفجوج ربي فسيحه ماهو على الاجواد راعي وصايه شريحته ياشينها من شريحه طبعه يذكرني بشمس المرايه مهما حصل ماتصح غير الصحيحه وعقارب الساعه قريب النهايه يالله ياللي كل همن تزيحه لاتجعل الدنيا سبايب شقايه نفسي بها من كل عله جريحه ركضت ماحققت فيها هوايه عجاب صالح الحنتمي السالمي |
ياوادي الجافي سرى الليل كله
وانا عيوني حاربت لذة النوم فيهن تقل من جاير الوقت مله تقول فيهن رمح ابو زيد ملحوم والقلب هاجوسه ورى الحدب تله تل الرشا من فوق حمرا من الكوم على القليب اللي وروده ادله يسوقها من خيرة البدو شغموم والكبد فيها يالاجاويد عله والحال حال اللي بدنياه مظلوم من وقت فيه اشوف بالناس خله لو ان فيه العبد معطى ومحروم وين انت ياللي كل عقدن تحله مفراص ماص ولصعيبات زيزوم بعيد شوح ومايعرف المذله مايلحقه مني مذمه ولا لوم يفداه من يفرح على ادنات زله دايم لسانه بالمقفين مسموم في حاجته لو كل ساعه تذله من الكرامه بارد الوجه معدوم ماله مع الوافين مذهب ومله اليا قضى شانه يواجهك بعدوم الطيب باهل الطيب دايم جبله ولناس ياعارف مواثيق وسلوم عجاب صالح الحنتمي السالمي |
وجدي وجود اللي غداله نداوي
هده وافق هدته عج وغبار على غياب الشمس ماله حراوي اظلم عليه الليل ماعين اخبار في ديرتن فيها اشهب الذيب عاوي توحش ومافيها من الناس مرار وجدي وجوده والمناوي مناوي ماحققت مطلب ومازرت ازرار بالله علام السراير رجاوي منجي سفينة نوح في عمق الابحار انا وجودي في زمان البلاوي ماسمع ماشوف احيان نشرات الاخبار في دار لو انه بعيد وسناوي اهم شي ارتاح قدام الاقدار وعيد ماضي مبعدين الحراوي اهل الكرم والجود وافين الاشبار في ظلهم يامن قصير وجلاوي والضيف لاجاهم على حيل وبهار احن للماضي وعاشق وهاوي من لامني يامال قصاف الاعمار عجاب صالح الحنتمي السالمي |
فات القطار وعودتبي معيفه
بعد النشاط وعنفوان الشبابي ومن النظر ماباقي الا النصيفه شوفي قصر يالله عليك الثوابي والحال حال اللي حياته كسيفه لاقلت زان الوقت نابه صطابي عشت الحياه الزايله والكليفه والراس من صكاتها غصب شابي من بعد مارقب كل عيطا منيفه اليوم جسمي دوب يحمل ثيابي وانا ابدوين عيد قلبي وريفه سجت خلا مع طيبين الجنابي وسوالفن بين النشاما طريفه بعيد عن هرج القفى والعتابي عايش على سلم الجدود الشريفه حتى على قبري يهل الترابي عجاب صالح الحنتمي السالمي |
البارحه بالعين مثل المشاهيب
حلو الكرى من سهرها ماهتنت فيه مدري سبب والا مرض يوم ويطيب يامدني اللي بالسموات تشفيه سبحانه اللي يعلم السر والغيب يعلم ومابه خلق يعلم بخافيه العام اعدي في طويل المراقيب مافيه رجم الا تعليت عاليه واليوم بالرجلين مثل الكلاليب الكبر ماحصلت حيّن يداويه مافك فرقي بعد كبري من الذيب العمر قفى والزمن خاب راجيه بالقلب يالنشاد مثل المخاليب اليا طراله تالي الوقت ماضيه ايام كل الناس عصبه واصاحيب متوالفين وطيبهم يقتدى فيه ارجال دنيا ودين ماهو زواريب من بعدهم عجاب كثرة طواريه عن قسمة المعبود مالي مجانيب سبحانه اللي كل مطلب يهييه عجاب صالح الحنتمي السالمي |
الجو زان وحان وقت المكاشيت
عن البلد شوف الصحاري منايه لجميع محتاجه من الصبح قضيت حاسب حساب لطرقتي بالبدايه ودقيت سلف اللي عليها اليا اقفيت تقول للعجلان مطلب وغايه وفي نجد قبل تغيب شمسه تمشيت وقطعت من صافي زلاله ضمايه لاحان وقت الفرض للفرض صليت وطلبت من رب العباد الهدايه ابغى اتونس دامني ماتوفيت لابد ماللعبد ساعة نهايه من وقت فيه يشيب الطفل عانيت يالله تجبر في شبابي عزايه عجاب صالح الحنتمي السالمي |
الله من دنيا كثيرن عناها
قامت توجهني على غير ماريد النفس فيها ما تحقق مناها جاري لها تالي زماني تناكيد يزود مع زود المشاكل غثاها تقول بالرجلين من جورها قيد لا أقبلت تعطيني أقشر عطاها ولا أقفيت غنت لي على نايف الحيد من مرها يا ناس ما طعم حلاها يالله لا تجعل حياتي تناكيد طردتها وزريت مالحق مداها ونكفت ما حققت فيها مقاصيد كم أدرجت من فوق حبي رحاها لين أوقفتني بين صدر ومواريد واليوم لو جتني عجوله خطاها اخترت عنها الآخره يالاجاويد ركعه بجوف الليل ولا ضحاها أخير من دنيا الشقى والسراميد عجاب صالح الحنتمي السالمي |
الله من قلبن كثيره الهوده
شين خفي وشي باين للاعيان من الزمان الشين باحة سدوده حطتني الدنيا للاحزان نيشان ابغى اتخلص والحبال معقوده يفارج الضيقه ويقاضي الشان يسامع الداعي وهو في سجوده تجلا صدى قلبن من العام مرضان عبدك ضعيف وكل حاجه تكوده بعد النشاط وسجت الرجل طربان بين الخوال وبين ديرة جدوده ياعل يسقيها من الغيث هتان قدام نور الصبح يطلع عموده يهل ودانه على كل الاوطان من غرب تدفع به ذعاذيع نوده والشرق تقهربه على بطون وديان ومافيه وادي مايتعدى حدوده كلن يربع في دياره وفرحان وراع العلف ماعاد نسمع وجوده لو خزنه عامن بعد عام خسران هذا منى قلبي وهذا سعوده واكيد منوة كل راعين الاضعان عجاب صالح الحنتمي السالمي |
طرى علي البارحه من خوالي
خالي محمد ماقفه جاب طرياه ليه معه قصه قديم اليالي وانا صغير السن في دار مضماه من العطش ماشوف روس الجبالي ويقنت ماليه من الموت منجاه وجاني وانا طايح وماتسر حالي ماحيط وسقاني عسى الله يجزاه بالجنه اللي مابعدها زوالي رحمه من اللي تسجد الناس لرضاه مرحوم ياحلو النبا والقبالي زين الجناب وتفعل الطيب يمناه نجره بتال الليل دايم يلالي للجار وضيوفن على الصوت تنصاه في مجلسه دايم زحول الرجالي انشهد انه بعد موته فقدناه عجاب صالح الحنتمي |
يالوقت جضت منك حتى المواشي
اللي من اول بين ريف وربيعي لاخايلت برق الحيا بالنواشي مع كل وادي وجهت له وريعي دربه سماح وماذكربه عكاشي قبل الشبوك تردها والسريعي من بعد ماتكل وتشرب بلاشي خضراء الديار وكل فجن وسيعي اليوم عشر اشياه تاكل معاشي وراع العلف بالدين عيا يبيعي احيان ماعندي دراهم وكاشي والنفس تقرع من زعلها قريعي من وقتي اللي فيه صاير غطاشي خلاني امشى فوق شوك النقيعي وامور فيها لو فتحت النقاشي عدة الشريط ايام ماني رضيعي ودفنتها عن كل حاسد واشي لين الوداعه ينتزعها الوديعي عجاب صالح الحنتمي |
البارحه قلب العنا يابو راكان
ياطيب الرفقه صدوق الكلامي من الهموم اللي ثقل ضلع ورقان صحيت مثل المنقرص من منامي بلاي ياراع الوفى طير حوران عله لجت بين اللحم والعظامي وانا ماحب اشكي على فلان وفلان شكوى لغير الله عيب وملامي عن الملا سري ورى عشر بيبان وعن قوم فيه وفيه رافع مقامي مالي ومال الناس ريض وعجلان لابد مايطوى على الجسم خامي النفس قافيها يالاجواد ديان يالله جنبني طريق الحرامي ياراعي الاحسان تجزى بالاحسان يوم التلاقي عند رب الانامي وراع الخطا في كل الاحوال خسران يوم الحساب ويوم نب الاسامي نصيحتي يصغي لها كل فهمان ومنها يتذمر ميت القلب عامي عجاب صالح الحنتمي |
يقول من يبدع جديد المثايل
مالاق غنابه وماشان خلاه يتعب على الجزله بكل الوسايل وماكل شاعر يطرب الناس معناه لو الزمن من كل الاطراف مايل ياكثر صدماته وياكبر بلواه على رجال الطيب وهل الصمايل وكرم حقيقي مادخل به مضاهاه اللي بقي حيين منهم قلايل ومن مات جعل الله يكفر خطياه واليوم فيه مشاورين الحلايل اللي من اول ماتخلص من الشاه صارت لهم هيبه بكل القبايل سبحان واحد تسجد الخلق لرضاه خصيت ماعميت قوم الكمايل اهل الوفى والمعرفه واهل الجاه ياوادي الجافي سقتك المخايل اجيك وانسى في كنفك المعاناه مع صفوة الاصحاب زمل الثقايل هذا هواي وكل واحد ومشهاه عجاب صالح الحنتمي |
اسجد شكر لله رب البريه
على سلامة درع جنبي حزامي شافاه علام الامور الخفيه بعد المرض باذنه تعافى وقامي حبيب جعل ايام عمرك هنيه وتلبس ثياب العافيه كل عامي اليوم كل العزوه الحنتميه شيبانهم واللي بسن الفطامي لك يرفعون التهنيه والتحيه يامعربين مابين خال وعمامي نسل الجدود اهل الكرم والحميه عيال حنتم طيبين المقامي ستر البنات ومحتمين الرعيه على السبايا في نهار الزحامي ياما خذوها من بعيد الجويه في يوم من صبحه على الخيل دامي اهل البيوت البينه والذريه لضيف والجيران فيها طعامي وحلو النبا والدله الشاذيه ونجرن على صوته يجون الكرامي وماقول ماب الناس ناس وفيه الطيب له في كل ديره نوامي عجاب صالح الحنتمي |
الله من قلبن كثيره همومه
شين خفي وشي تدري به الناس الليل لاعسعس وغابت نجومه يدكبه تسعه وتسعين هوجاس وناستي بالوقت شبه معدومه لو كثرت الزيلان ياقل الاوناس عجاب يالاصحاب لاحدن يلومه مايحس مثله غير مدرك وحساس ماهو من اللي مايثمن علومه عقرب ثرى لظهور الاجواد نداس مسكين ياللي لاقضينا لزومه اقفى كما يقفي مع الريح قرطاس اللي يخالف سلم ربعه سلومه انشهد انه بالزمن مفلس افلاس يقوله اللي ماتردت عزومه قوي باس ومامشى درب الادناس ماعاش في وقت الترف والنعومه اول حياته يوم الارياق يباس عجاب صالح الحنتمي |
مرحوم ياحلو النباء راعي الجود
ياراعي الوقفات في يوم الانشاب يوم الدعاوي حد شلفا وعبرود من دون ربعك بالخطر درع وحجاب يابن شويمش عمر الانسان محدود الموت واحد والمنيه لها اسباب يالله يامعبود ياخير معبود ياحي ياقيوم يارب الارباب ترحمك ياللي لك مكانه ومحمود عند الجميع اقصى القبايل والاقراب قلبي بعد موتك به هموم والهود والعين كن بنونها شوك وحراب عجاب صالح الحنتمي |
هموم قلبي بالزمن مستجده
وللعين حلو النوم عيا يطيبي اليا غفيت زان نوم المخده فزيت مثل اللي صوابه عطيبي رموه راعين الرمك والاشده بدارن خلا لو صاح ماله مجيبي قفو عنه في سهلتن مجرهده عليه قام الذيب يقنب قنيبي من علتن بقصى الحشاء مستبده علاجها يحتار فيه الطبيبي عن الوجيه الكالحه والمصده خفيتها لو كنت منها صويبي وين انت ياللي لصعيبه نعده في وقت نادر فيه تلقى صحيبي حزام لاجتني من القوم ضده وصدره عليه طاب فاله رحيبي ماكل من يضحك بوجهي موده يامكثر اللي فيه عله وريبي بعيد والا من قرايب وبده تجاربي منها طلع نص شيبي عجاب صالح الحنتمي |
يامل قلبن بين الاضلاع حنا
حنين سكس امعرضينه نفودي ماحملته حملت دداسن ودنا الحمل جاير والمسافه تكودي من وقت عزمي فيه قام ايتدنا والحال ينقص بالزمن مايزودي يالله لاتخيب لنا فيه ضنا اشوف في بعض الخلايق جحودي ياعل مايبرا ضعنهم ضعنا قلوبهم لو يضحك السن سودي في هرجهم ماينخدع في زمنا غير الغشيم اللي عليهم يرودي عليه صفر الخيل دايم تعنا ويسكت غبا مدري بدمه برودي شهب الذياب الجايعه لاعونا عليك باللي صانعينه يهودي اليا فهقت اجزاه ودك تمنا على حدود الدار ضمن الجنودي عجاب صالح الحنتمي |
اللي مضى من حسبة الوسم عشرين
مالاح براق الحيا بالخيالي طالبك ياقابل صلاة الصلين ياحي ياقيوم ياذا الجلالي نون من القبله يجيله ودادين على بطون الاوديه والمفالي يفرح به الوبال واللي معه ضين يغسل غبار الارض غسل الزوالي بعد المحل ترجع سوات البساتين العشب ينبت بالسهل والجبالي عن راعي الاعلاف نقضي زمانين من فضل ربي مادفعنا ريالي هذا مناي وغايتي يالعزيزين على الولي ماهي صعيبة منالي البارحه قدام صوت المواذين ارشيف من ماضي حياتي طرالي بين السلف وبيوتنا والمعاطين وعدن على طيه مقام ومحالي وصحيت لاني وين واللي مضى وين قلت اه ياوجداه يابري حالي عجاب صالح الحنتمي |
الساعة الآن 02:00 AM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir