دايم بذكرالله رطب لساني=فيه ابتدي قولي وفيه اتمه
لاشك بأن العبد عمره فاني=وان مات ما تعرف فصيلة دمه
نادو ولد عبدالله البدراني= محمد اللي كل همي همه
مكانته عندي مكان اخواني= انا أشهد ان الطيب كله لمه
شفقن على شوفي وانا شفقاني= في خاطري قدرومقامه قمه
عداً عذي يروي الضمياني= عذباً زلال مرتهي فالجمه
بشكي عليه صويحباً شقاني= والزين كله في عيوني خمه
ماله حلي في عيوني ثاني= لاشافني رحب ولو مع عمه
وانا ليا شفته نسيت احزاني=من الفرح في داخلي با ضمه
فيه الجمال اليوسفي رباني =ورث الحلا والزين من يم امه
بسباب ريحة عطره الروحاني=يغمى علي وافوق يوم اشمه
وشلال شعره كاسي الامتاني=ليا انتثر ياصل نهاية كمه
وجهه وخشمه والعيون تعاني=من الثام اللي تحته مطمه
له مبسمن مثل الجمر فتاني=والنهد دوبه بادياً بالزمه
والخصر كنه خاتم سليماني= واللي بقى ياصاحبي ما ذمه
تكفى يابن عبدالله البدراني=ياكيف ابصله والعرب ملتمه
شورك ورايك لاوصل كفاني=شوراً يكفي عن جميع الامه
ودايم بذكرالله رطب لساني=فيه ابتدي قولي وفيه اتمه