بعد مالزّم عليه امتطي صهوة جوادي = قامت افكاري تودي والهجوس تجيب ليه
واتذكر ماقفي والفكر بي للخلف عادي = للوراء ويفل قصة ماضية مرت عليه
ليلةٍ فيها القمر 16 او منها وغادي = يوم مريت المنازل شرق في ذيك النحيه
يومها كانو بوادي والمفالي سد وادي= جيتها والريم ترعى وسطها والشمس حيه
ثم ولعت الحطب والنار من قدح الزنادي= وقلت بابيتّ بعد فنجال بن الشاذليه
واقبلت فيها الحيا ثم اوقفت قامت تنادي= قالت اقلط وين تمسي ديرتك ماهي هنيه
قلت طرقي بعد شفتك كيف يهناني رقادي= عودّي يابنت غادي للبيوت اللي ذريه
كيف باقلط بعد قلبي صار متولع وغادي = قالت اقلط مانرد الضيف وعيونه شقيه
عندنا بيطيب زادك لا خلطته فوق زادي= والليالي مقفية وانته على ظهر المطيه
قلت لاوالله علومك ماتخرّط بي شدادي= من يقلك مانميز فالصواب وفالخطيه
والله ان الشوق زاد وزاد حرقّ لي فؤادي=مير عز النفس منعاته على مثلي قويه
من بغى فالعز يمشي غير يعلنها جهادي= مايطيع النفس يعذلها عن دروب الدنيه
بان علمي وذكريني وذكري علم المهادي= سجل التاريخ فعله ماتردى مع خويه