بييضٍ نواصي جبهته كلها شيب=من كثر مامرة عليه المصايب
كدصارع الدنياعلى الخبث وطيب=ومنالدهرشاف الفكروالعجايب

ياطبيب القلب قلبي روحت به=جادل ما عقبت للقلب تالي
والجهاز اللي زرعتوه لعبت به=مابقى كود السحر بالصدر خالي
كل ما قلت ارحمي قلبي طوت به=وضحكت في حاجب(ن) مثل الهلالي
العيون تخجّل اللي طالعت به=اختلط فيها الكمال مع الجمالي
اعرضت لي باللباس اللي زهت به=واندهشت وقلت:ألا وابري حالي
فوق عرش الزين قفّت واقبلت به=والنحر مثل القمر نوره يلالي
ما ذبحني مثل رمش(ن) سلهمت به=صرت افكر فيه من حالي بحالي
الكلام لياهرجت به وضحكت به=كن طعمه درّ خلفات(ن) متالي
لو تطاوعني على امري ما عصت به=كان ارددها على روحي تعالي
لين ترتاح العيون اللي شقت به=واهتني في شوفته دايم قبالي
الله اعلم وين قلبي وجهت به=حوّلت به للوطا من راس عالي
شالت القلب المولع وانتحت به=مابقى له لا دقاق ولا جلالي
اتنشد عنه من يوم اختفت به=ما ذكرلي لا جنوب ولا شمالي
ياوجودي وجد منهو لولحت به=وانطلق من فوق مومية الحبالي
طاح قدام السيوف اللي سطت به=الصوايب غامقه والدم سالي
في نهار(ن) كم شجيع(ن) يشتمت به=غابت الاذهان من شد القتالي
طاح بين الخيل ماحد يلتفت به=لو يردد وين حامين التوالي
شاف عجلات المنايا نوخت به=والفرس راحت مع الوضح الغوالي
مثل قلبي والهنوف اللي غدت به=واخرتها لا جواب ولا سوالي
تل قلبي كل ما راحت وجت به=تل غرب فوق درّاج ومحالي
تلته حمر شناح وصدّرت به=يصتفق برشاه من جال(ن) بجالي
آه ياممشى الطريق اللي مشت به=ليتني معها ولد عم(ن) موالي
ودي آقف وسط سوق(ن) وقفت به=لو مالي بالتجارة راس مالي
لو حصل لي شوف وجه(ن) فرّعت به=ما غبط عنتر وابوزيد الهلالي
عقبها لو ابعدت به وقربت به=المهم يبين عقلي من هبالي

قلب ابو كسار وضحا شلعت به = جادل في قد قوله ما تبالي
والجهاز الي مركب به عثت به = احدثة به في مفاتنها خمالي
اندهش من لبسها يوم عرضت به = وصار عنده من تهملعها اختلالي
اضحكة في هرجها ما قصرت به = نسته عمره ونسي ام العيالي
ما تحمل رمشها يوم طرقت به= صاب قلبه من تسلهمها جفالي
ويتمناها لوانها خيرت به = ايتهنا بشوفها حل وحلالي
ويوم من راس الطويله حولت به =قال لاح جروح روحي قلت غالي
مار قلبك يا محمد وش لقت به = يا طبيب القلب قلب العود بالي
المراجل قبلها كد شيبت به = متعبه من قبلها مسرى الليالي
اثر عودك عود والبنت جهلت به=ايتوجد وجد فرسان النزالي
في نهار من تهقواه قعدت به= ولحقو الفرسان مروية السلالي
احتمى فيه المنازل وانتخت به = عزوة ماهي على الجال الهيالي
غيروا مجرى القتال وسجلت به = عام جا باالشمس من عقب الظلالي
وجد ابو مشعل مثل من طوحت به = شاف دمه عقب ما وخذ الحلالي
اشهد ان الحب ناس هبلت به= من طحاطيح الرجال من الجمالي
ما درت با عمارها يوم وقعت به = حين ذكرها لياليها الخوالي
كم شقين يوم بانت جنحت به = والوضيحي للمثال اكبر مثالي
وحال ابو كسار حال دونت به = مار جعله عقبها يمشي عدالي
العصا يمشي وهي ما عتبت به= والعلاج الي معه يملا شوالي
بعد حاله ما قرت به وكتبت به= وراح قلبه مع طريق الزين جالي
العوض با العافيه يوم عرجت به= والمجال ان ما حصل فيه المنالي
ايتعبر با الحياه وما وصلت به= وبعد عرضتها يجي شايب مثالي
وكانها مرت عليه ولا اثرت به = هم لالي هم لالي هم لالي