الله على الي نازح البعد يطويه=طي الورق باستنسلات الصحافة
كن الكواكب لاتحرك تحييه=يسلب مشاعر من فطن له وحافه
آخر موديل وفارقاته مواريه=بالحجم والتصميم كم وكثافة
لكزس ومعنى اسمه على اللي مسميه=بين الخيال الواقعي والخرافة
والتسمية تحتاج شرحٍ وتنبيه=للجاهل اللي ما يعرف الثقافة
رجعٍ من الماضي على حظ راويه=ومجده تجدد بعد تم اكتشافه
جيبٍ ليا فكرت باللي مسويه=تشهد لندرة صنعته واحترافه
ثلجي وبا لوانه حقايق وتمويه=يغويك عن قطع اليقين اختلافه
كن الشعاع اليا تمثنى مثانيه=لون ارتكاز الموج زافه وزافه
والله مدري لا وقف ويش أحليه=ميقاف نابليون ليلة زفافه
يمشي له الطابور بالشانزاليزيه=الورد قدمه والعساكر خلافه
وإلا عديمٍ ينتظر نسر داعيه=رام العشاء من عقب جوعه وشافه
جثل المناكب بارزاتٍ ثناديه=طير الثلاث اللي براسه صلافة
لكزس وباشعاره معاني تحديه=ليا طالت خطوط السفر والمسافة
فيه أنظمة تشغيل ذاتي وتوجيه=ونوابض استشعار عند انعطافه
وبه ميزةٍ زودٍ على كل ما فيه=مع قمة القوة يحوز الظرافة
كنك ليا منك قصرت بتمدريه= تمدري اللي ما تعرف اللقافة
ليا اطلق عنان الليت والليل غاشيه=نجمٍ كشف عن باب ألافق انكشافه
جيبٍ مفاتيحه على ايدين راعيه=وظرفٍ تعرف مهمته من غلافه
منصاه نجد اللي عسى السيل يسقيه=وقت المساء خلى الخليج وضفافه
يحمل سلامٍ من خفى الروح مهديه=كنه نبات الوسم قبل انتصافه
للفرم بندر مرسلاتٍ معانيه=غيث الزمان اليا تقافى جفافه
القول عقب الفعل ودك تبديه=وان صار قبل الفعل ناقص وتافه
ماهو بعتلٍ ينقل الكبر والتيه=الله يبي من يتقيه ويخافه
بالوجه ألابيض حاضره مثل ماضيه=نزه الجناب ولا بقوله جلافه
وليا طلبته حاجةٍ تقل تعطيه=ليا لد يمك باحترام ولطافة
يستاهل التمجيد والمجد زاهيه=كم شاعرٍ يثني على الفرم قافه
فعل أخو حسناء سابقاتٍ حسانيه=وحتى عدوه شاهدٍ باعترافه
من لاذ تحت احماه ينسى عوانيه=طور الحجاز ومن طمع به يعافه
بندر على اسمه سيس المجد بيديه=نعم الخليفة واحتفظ بالخلافة
لله دره كل ما اذكر مساعيه=ماب المصاعب عند بندر كلافة
طبع أبو مشعل دايماً ما يخليه=في وقفته وبشيمته وبعفافه
قد الفعايل كلها والمشاريه=والطيب ماعمره عرض له وطافه
وانا انتظر منه الخبر قبل لا ادعيه=والشان حان وغايتي لاستضافه
منك وعليك وفيك جعلك تسويه=أحرم به المسلم ولا أكمل طوافه
ولا ودي اكشف يا ابيض الوجه خافيه=ويصبح حديثٍ بين مجهد وسافه
وانا بلاي من أوله غير تاليه=تحت العباة وطول زول الزرافة
حاولت به لكن على الله مشاكيه= والرجل مايرضى الردى والضعافة
والوقت محدٍ سالمٍ من بلاويه=فيما حواه الكون نونه وكافه
هذا جوابي وأنت تعرف مغازيه=والعلم عندك وقفةٍ وانحرافه
وإن كان به شيٍ من المدح ناسيه=عفوك ترى النسيان كلٍ يخافه