دام مـا بخلـت بــي الدنـيـا البخيـلـه=فـدوة للربـع.. مــن كـمـي لكـمـي
و دامنـي فـردِِ مــن أفــراد القبيـلـه=حــرب ربعي..عزوتي..لحـمـي..ودمـي
مـا تخيّـر فـي فصيلـه عـن فصيـلـه=كـل حربـي علـى الأرض ابـن عـمـي

وين انت ياللي كـل ماتمـر ذكـراك=توقد فتيل الشوق وتـذوب الاضـلاع
تعال..وجلس صبلـي مـن شفايـك=هيل الكلام اللـي تصبـه بالاسمـاع
مدري متى اشبع من سوالفك..وارواك=اثر الحكي بعضـه خزامـى ونعنـاع
عن كل من حولـي تاخذنـي لدنيـاك=واندم على وقتٍ قبل لاعرفـك ضـاع
تزهر حياتي في حضـورك ولامـاك=مثل المطر..تزهر من حضوره القـاع
قلت ابي اجرب قلبي احاول.. انسـاك=ورتعت قبل القلـب يـدري ويرتـاع
ساق الهوا مركب غرامـي لمرسـاك=ماعاد ينفع بـه مجاديـف وشـراع
عطني حضورك..وإقطع دروب فرقاك=لايهب للفرقا علـى القلـب ذعـذاع
مايستحق يعيش بـه كـود شـرواك=قلبٍ يضمك حـب ويضمـك اوجـاع

الظّلْمْ كيف اقْبله.. والصّبْر كيف احْـرزهْ=عزالله انّي من الاثنيـن.. قلبـي جريـح
والله ..مايجـرح الرّجّـاااال و(يْنفـرزهْ)=الأ..لاقال الصّحيييح..وقيل ماهو صحيـح
كلمه بسيطه..ولكـن حجْـم مااااتفـرزه=يْخلّي الكون فيك يضيييييق لوهو فسيـح
الرّجْل قبـل تْحكـمْ عليـه فجْـأه..رزه=يبين لـكْ راااهـيٍ بالعقـل والأ شحيـح
والطّيب..واااجد مجال الطّيب مير ابـرزه=اظهاااار فعل الجميل..وترك فعل القبيـح
حطّ اصبع الطّيييب بعيون الرّدى.. واغْرزه=وش قيمتك بالحياااااه ان ماكسبت المديح
حاولت اجمّع بها فُلّ الشّعـر.. وكْـرزه=قصيدتي..وارضي الطّيب واغيض البجيح
مـن عادتـي أجتهـد بالقاف..وآطـرّزه=باجمل عبارات.. والاّ آريّحـهْ واستريـح
ان مانظمته نظم سبحـه خرزه.أخـرزه=لو قالو انّه مليح..آقول مااااهـو مليـح

لعيون ساره كتبت احلى المواويل=وغنيتها فدوة(ن)لعيـون سـاره
عيونها كنهـا مهـدودة الحيـل=مايناسب لوصفها الا هالعبـاره
نعسانة(ن)دوبها ماهوب بالحيـل=تسرق من النوم لكن في شطاره
اي والله اني حسدت الكحل والميل=لمصافح اهدابهـا تاره..وتـاره
تبعث من عيونها لقلبي مراسيل=لين انها احتلت القلـب بجـداره
غدى لها قلبي اوطان ومداهيـل=الحالهـا مالهـا ضره..وجـاره
الله عطاها الجمال بدون تجميـل=من كل زين الله اعطاها اخيـاره
نهارها اجمل نهار وليلهـا ليـل=لياتفـرق سـواده عـن نهـاره
ماتحصي اوصافها كثر الاقاويـل=لكن قل الحـر تكفيـه الاشـاره
في داخلي للغلا حفـل وقناديـل=وناس(ن)تعانق بعضها في حراره
ألذ مابالهوى عنـاد المواصيـل=والركض بين الحلاوه..والمراره
كل التعب..لو منه ماجا محاصيل=لخاطر عيونها ماهـو خسـاره

بديـت بأسـم مكـون الـكـون تكـويـن=المنـفـرد والمتـحـد فــي كـيـانـه
رب الحجـر .. رب الشجـر .. والثقاليـن=مـرسـل محـمـد وامــر ٍ باتبعـانـه
اللـي عبيـده لــه صـيـام ٍ مصلـيـن=يـرجـون رحـمـة ربـهـم وامتنـانـه
وعطفه .. ولطفه .. لاغدى الخلق نصفيـن=ويشهـد علـى الانسـان حتـى بنـانـه
ياناصـر الرسـول فـي بـدر .. وحنيـن=ياجاعـل لـسـان البـشـر ترجمـانـه
انـت المعيـن ولاحـد ٍ غيـرك معـيـن=ومـن بعـد ذكـرك كـل شـي ٍ باوانـه
ياراكـب اللـي مـن حفيـزه اقـزوزيـن=تـو .. ودبـل زيـرو .. وون.. اصدرانـه
صـدّر خــلال انتخـابـات الزعيمـيـن=قـدام بـوش الابـن يكـسـب رهـانـه
قبـل استـلام البيـت الابيـض بشهريـن=و مجلـس شيوخـه .. وانظمـة برلمانـه
جي .. إم .. أس .. حروف وارموز .. تبيين=للمصنـع الـلـي صمـمـه والصيـانـه
احـدث موديـل بتكنلوجـيـا الصوالـيـن=والله عطـا الـلـي يصنعـونـه اتقـانـه
لياسـرى ماضـن مـن اللـيـل ثلثـيـن=وولـع مصابيحـه .. وولــع اسكـانـه
كـن اجماحيـاتـه شـمـوع المحبـيـن=فـي عيـد ميـلاد .. اوقـده شمعـدانـه
وكـن اشتغالـه هرجـة ٍ بيـن ثنتـيـن=يخفنهـا بـيـن الخـجـل .. واللعـانـه
ويشبـه لياقـام يتمشـى علـى هـويـن=مـشـي الفـتـاه المتـرفـه بمشيـانـه
ولياعطـا مردومـة ٍ كنـهـا قـيـن =قـام يغنـج .. ويهـوس كـن اغنجانـه
شريفـة ٍ فـي حفـل نـاس ٍ شريفـيـن=ترقـص علـى يالليـل ادآنــه يـادآنـه
تهـز .. وتهـز الخصـر .. والذراعـيـن=ومـن راسهـا ماطـاحـت الاستكـانـه
وليامشـى مـن نجـد بيـن الصلاتـيـن=مايصـبـح الا فــي حــدود الكنـانـه
يصـرخ بعنـف .. لياخـذ شـوي بنزيـن=مثـل صـريـخ صغـيـر ٍ بالحضـانـه
ياسايـقـه بالله هالحـيـن هالـحـيـن=قـم دق سلفـه .. واربـط حـزام امانـه
حنـا عـلـى رد الجمـايـل مضـريـن=حاضـر بحاضـر .. والتهـاون جبـانـه
دسلـه .. وزدلـه بأشتغـال الصلنصيـن=ولايـحـرك الا بـآخــر ازعيتـمـانـه
خل الحصـى علـى حصـاه .. وحصاتيـن=يفـر مـن حـدره فـريـر (السمـانـه)
حـده علـى قصيـاه .. ياسايقـه لـيـن=تعـزف قـزوزه مثـل عـزف الكمـانـه
ويخلـي الـعـادم بـطـون الشكامـيـن=غليـون (حشـاش ٍ) بـراسـه شطـانـه
كنـه بتفكـيـره .. يـحـرر فلسطـيـن=ومستيـسـر ٍ شــارون بالخـيـزرانـه
نصه ديـار طيـور شلـوى .. الدماسيـن=وقل ويـن مطلـق .. ثـم لياقيـل عانـه
تلقـاه فـي بيـت ٍ يـذري عـن البـيـن=سلـم عليـه ومــن لقـيـت بمكـانـه
سـلام مـمـزوج ٍ بعـطـر الرياحـيـن=والا زبـاد ٍ تـو جــا مــن عمـانـه
ألـذ .. واحـلا مـن حليـب المـلاويـن=ليـاروحـن مـــن وادي ٍ ديـدحـانـه
مثـل الـزلـول الفـاخـره بالـدواويـن=ويلاعـب الغـربـي زهــر قحويـانـه
مقـدار ربـع ٍ لـوهـم بعـيـد غالـيـن=علـى خـفـوق ٍ قـدرهـم ماأستهـانـه
عيال عـود ٍ غـاب راسـه علـى الزيـن=ممنـوح مـن ربـه صــلاح البطـانـه
مطلق .. وغـازي .. والنعـم بالشقيقيـن=وأخوانـهـم .. والله علـيـه وامـانــه
ماهـو مكفيهـم لانـعـم .. ولانعمـيـن=هيـف السميـن اللـي كثيـر ٍ أدهـانـه
واهـل هـلا يامرحبـا فيـك .. وهلـيـن=وكـل ٍ حجـاجـه يعجـبـك بضحكـانـه
واهــل دلال قـنـاد غــال المثامـيـن=وافضـل نمونـه هيـلـه .. وزعفـرانـه
كنـه للضرمانـه صـعـوط المجانـيـن=ليـاذاقـه النعـسـان طــار إنعسـانـه
واقـول .. يامطلـق فــدوك الكثيـريـن=أهديتـنـي دره .. وبـاقـه .. ودانـــه
الباقـه الـلـي مــن ورود البساتـيـن=مـن كـل شـي ٍ زيـن فيـهـا إذنـانـه
منباعها مـن جـوف قلـب .. وشراييـن=وجـم ٍ تـصـدر بـالـروى عيطشـانـه
فيها عتب .. لكن علـى الـراس والعيـن=انــا مــدان ومعـتـرف بـالادانــه
إن كانـا بالـوصـل مـعـك متـرديـن=منـك السموحـه راس مــال الخـزانـه
امـا تـجـي .. والا نجـيـك متعنيـيـن=وكـل ٍ علـى اصحابـه وسيـع ٍ بطانـه
وصـلاة ربـي عــد وبــل الـوداديـن=عـلـى رســول ٍ عـزنـا باتبـعـانـه

ايه امسح النمـره .. وكـل التفاصيـل=اسم .. ورقم .. شيخ المزايـا العظيمـه
لياصار ماصوته يجـاوب علـى التيـل=ماعـاد للجـوال .. والـرقـم قيـمـه
راح .. وعليـه قلـوب ربعـه معاليـل=وصـدور رحبـات المجالـس محيمـه
على أحر من الجمـر .. مثـل ماقيـل=كنـت انتظـر لحظـة لقـاه الكريمـه
ميـر القـدر مابـه لياحـل .. تأجيـل=ويرضايـه المؤمـن بصبـر وعزيمـه
دنيـاً لهـا عـلـى الاوادم مصـاويـل=وصكاتهـا فـي روسنـا مستديـمـه
أمراض .. وموت .. وشح زاد ومحاصيل=وكـوارث.. ووارث .. ودنيـاً ذميـمـه
مافـي مجـي المـوت شكـه وتأويـل=مثـل الغريـم اللـي يـدور غريـمـه
مرحوم يامـن لـه معـزه .. وتبجيـل=عندي .. وعند اهـل العقـول الفهيمـه
اقفـن علـيـه مـذوقـات الغرابـيـل=وبانـت علينـا مـن الخرايـم خريمـه
فيـه إهزمنـا .. وتركـنـا مغالـيـل=راس ٍ علينـا مـن فراقـه هزيـمـه
راس ٍ كفـو لدمـوع روس الرياجـيـل=اللـي يقفـون الهضيمـه .. هضيمـه
من القصيم .. الى الريـاض المراسيـل=وصلت .. وحزن رياض نجد .. وقصيمه
إكـد رحيـل مدلـل الضيـف تدلـيـل=وكل ٍ وصل مـن ضيقـة البـال تيمـه
هكا المسـاء وش يمسحـن المناديـل=كن السحاب الروس .. والدمـع ديمـه
عليـه مخـزون المحاجـر همالـيـل=من شدة الصدمـه .. وطـول الحريمـه
احد ٍ لـو انـه مـات موتـه تساهيـل=حسرة خبـر موتـه علـى ام اليتيمـه
واحد ٍ خبر موتـه خسـاره .. وتنكيـل=وفـي غيبتـه علـى القبيلـه ثليـمـه
كـان الغنيمـه فقـد بعـض الازاويـل=هـذا السلامـه منـه ماهـي غنيمـه
مفني عمار .. البن .. والهيل .. والحيل=وعـدو هـراج القفـاء .. والنميـمـه
رمز الكـرم .. حلـو النبـا والتعاليـل=لياطـاب مجـلاس النديـم .. ونديمـه
ماظـن فـي مثلـه تعـوض المقابيـل=وجهة نظر .. حسب اعتقـادي سليمـه
عشقـة بعيديـن النظـر والمواصـيـل=ان مانجبت مثـل العسيلـي .. عقيمـه
ولا قول خَلْيَت مـن وجـود الحلاحيـل=لكـن قليـل اللـي صفاتـه عديـمـه
علـى بعضهـم فـي بعضهـم تنافيـل=شـي ٍ مايجهـل فيـه غيـر البهيمـه
مرحـوم يامنصـا الرجـال المشاكيـل=ونطـاح قـالات الرجـال الجسيـمـه
جاه .. ووجاه .. وحبك جـزل التماثيـل=مستوطنـات ٍ راس محـرج خصيـمـه
ولاهو على وجهـه ولا جاهـه بخيـل=للـي بـه المعـروف ماهـو ظليمـه
يقـوم بالقـالات .. ويحـط .. ويشيـل=ومرجع لمن يبغون الاريـاء الحكيمـه
علـى المشاكـل مايجـر المـواويـل=يحسـب لعاقبـة الامـور الوخيـمـه
مايستجـره صـوت دبكـه .. وتطبيـل=وعنده لمن خالـف وصالـف قسيمـه
لاحتاجـت القـالات شـرب الفناجـيـل=طـق البهـام لكـل راعـي هميـمـه
بأسلوبـه يعـد هـل العـوج تعـديـل=وعلاقتـه مـع كـل طيـب حميـمـه
ماطيشنـه مثـل بـعـض المهابـيـل=نـدر قوافيـه الـجـدد .. والقديـمـه
تواضع وضحكة حجاج وهـلا .. هيـل=وبشاشـة ٍ بالوجـه تسـوى وليـمـه
أمدح .. ومدحي فيـه ماهـوب تضليـل=اشهـود ربـي بـارض ربـي مقيمـه
والمدح باأهـل المـدح مابـه مداخيـل=والا بغيـر اهـلـه قـولـه جريـمـه
يالله عسى قبر ابيـض الوجـه لسيـل=ويخضـر جنابـه كـل ماتهـل غيمـه
ويـبـد الله ظلـمـتـه بالقـنـاديـل=آميـن يامححـي العظـام الرميـمـه
يامفضل محمد علـى الرسـل تفضيـل=كـرم سمـيـه بالجـنـان النعيـمـه

باسم ربـي ابـدا واتعـوذ مـن الشيطـان=قبل ابدا كلامـي والعـب القـاف واحوفـه
ياعـالـم مالايعـلـم الـجـن والانـسـان=يامن كل خوف اصله خطـأ ماعـدى خوفـه
فرجك ومـدد عونـك وفزعتـك يارحمـان=وحجاك وذراك من اغبر الوقـت وصدوفـه
مضى وقت مثل الصايـم الجايـع العطشـان=يدور مـن المـا لـو ملـي راحـة كفوفـه
أقبـل جبيـن الشعـر واستجـدي القيفـان=وبيت القصيـد اشـوف فضلـه ومعروفـه
انا بشان وافراح البشر والشعر فـي شـان=عن الشعر كلـه رغبـة النفـس مصروفـه
وجا مايحرك هاجـس المشفـي المرضـان=على فتـل قيـد الشعـر بيديـن مشعوفـه
يدور علـى اللـي تفحمـه راسهـا مـالان=ويعرض عن اللي تعتـرض تقـل معسوفـه
بيوت القصيد النـدر أحـذر مـن الغـزلان=قوانيصهـا يلحقـهـم رهــاق وكلـوفـه
ياطير الخيال اصعد سمـا وافـرد الجنحـان=انا شفـي اللـي غيـر عـن كـل مالوفـه
أحس اني اول مـره اقصـد وانـا طربـان=وتجينـي ذلـول الشعـر بالشعـر مردوفـه
نعم طايش وشايـش ومتنومـس ونشـوان=من اللـي بعينـي مثـل خلـق الله اشوفـه
تداعت هواجيس القريحـه علـى الولهـان=ومن الشعر لهـل الشعـر غنيـت معزوفـه
وركبنا على افضل مانتجـت دولـة اليابـان=لاندكروز.. فاكس آر ابيضٍ.. تعجب اوصوفه
مع الدرب لاوحف صبح ولا اوحف مسيّـان=تقـل مـروةٍ مـع شفـة البيـر محذوفـه
لا والله زبنـت الله عـن الظلـم والبهتـان=مثل طلقـة العبـرود مـن بطـن شاخوفـه
هو غاية طلب مـن فكـر وعقّـد الحجّـان=نـوى طرقـةٍ بأنـواع الأخطـار محفوفـه
نصينا عليـه اللـي تقلّـط لحـا الضيفـان=علـى الحشـو ودلال البغاديـد مصفـوفـه
وللعود الأزرق فـي سمـا بيوتهـم دخـان=يشابه ضبـاب اللـي ضحـا تـردم قنوفـه
بخب النقـع موقـع حفـل شمّـخ النيبـان=ومن الحربي اللي ماحضر واعلـن وقوفـه
هذا الموقف اللـي ماعنـه عذرمهمـا كـان=يجي لـه حميّـا الرجـل ويخلـي ظروفـه
لو ظروفه أكثر من صفايـح حجـر ورقـان=يجمّـع ظروفه...ثـم يبنـط بهـا الطوفـه
هنـا للتحـام الصـف ولوحدتـه عـنـوان=ومن يقدر يهـزّ الجمـع لالتحـت صفوفـه
ياخب النقـع سولـف للاجيـال والأزمـان=عن آخر حدث تاريخ حرب حضنـه جوفـه
تاريـخٍ انجـازات اهلـه نالـت استحسـان=دهاة العـرب مـن بـاب صنعـا ليالكوفـه
بروايز صفحاتـه مـن اللـول والمرجـان=ومن واحد وعشرين الذهب تكتـب حروفـه
تاريـخٍ ماضـرّي للتهـاون.. وللـخـذلان=مضـرا لتتويـجـه الأفـعـال منصـوفـه
منصوفه.. بين اللي لبسـوا هامتـه تيجـان=وخلوهـا تعانـق هامـة الجـدي وتطوفـه
تبا تقـوم ناقـة صالـح وعزهـا مانهـان=مـدام ان بنـي سالـم ومسـروح مكنوفـه
حرابـة سلاطيـن الـدول منبـع الفرسـان=يـوم ان اليـادي طلـق ماهيـب مكتوفـه
ضربنا اروع الامثال فـي نخـوة الجيـران=ودون اخويانـا نقطـع الـراس وانلـوفـه
فدينا الخوي بـارواح ستـه مـن الشبّـان=غير اللي بشـذرة مرهـف الحـد منسوفـه
بالاد الحلال ان كان ماهـي علـى البرهـان=بالاسماع مسموعـه... وبالعيـن مشيوفـه
غير اللون الابيض للخوي مانعـرف الـوان=ماتصبح بنا هقـوات الاصحـاب مكسوفـه
ونسـوي لاسوينـا المعاريـف بالمـجـان=مخلوفـه...والا انـشالله ماهـي مخلـوفـه
كذا طبعنا ...مـن الله خلقنـا وحتـى الان=مواقيفنـا بالخـيـر والـشـر معـروفـه
ولامنا عطينـا ظهورنـا.. قصدنـا حقـران=ماننظر خلاف.. ونترك الضعـف لضعوفـه
ولامنـا عطينـا نحورنا...نشبـه الطوفـان=نعـز الصديـق ولحيـة الخصـم منتوفـه
بحالة رضانا...نجـزا الاحسـان بالاحسـان=وبحالـة غضبنـا مانخلـي لنـا حسـوفـه
يعني ..نزعل الراضي..ونرضيك يالزعـلان=بيـومٍ معازيبـه تـبـرّا مــن ضيـوفـه
لنا في سنام المجد..مجـد وحمـا واوطـان=وعلى غاربه نرقى...مانرقـى مـع ردوفـه
بكـل اختصار...اقولهـا بالفـم الملـيـان=اخذهـا علـى ماقالـوا النـاس مكشـوفـه
لامنا دخلنا...ندخـل مـع اوسـع البيبـان=على المجد...لين المجد يرخي لنـا اكتوفـه
وبـاق القبايـل والنعم...مابهـم نقـصـان=على الله تعالى أدخل عـن الظلم...وحتوفـه

كلمة سلام وصباح الخير كثرها = ترا لها وقعها في نفس مجنونك
ودي تروووح وتجي حتى تكررها= ماامل منها ولامن مشاهد عيونك
عيونك اللي قلوب الناس تآسرها = من شافها تفتنه ويصير مفتونك
موتي وانا حي يستوطن محاجرها= مابيني وبينه الا (غمزة) جفونك
جابتك لي صدفة ٍ مدري وش آخرها= وانا تركت الجميع وقلت ممنونك
سلمتك الروح تنهاها وتامرها= ياللي خوانك على زينك يحسدونك
لك صورة ٍ برهنت عظمة مصورها = عجزت اوصفك واتخيلك وش لونك
لك هيبة ٍ ماتخليني اناظرها= ارفع لك اشوف مير يطيح من دونك
ابطيييت وانا المشاعر عنك ساترها= وانته تبختر وتاخذني على هونك
واليوم جتك المشاعر هي وشاعرها= متقاسمين الوجل وش لون يرضونك
كلي أمل ماتجي مكسور خاطرها = وانا اوعدك ماتخونك فيه إضنونك
والا اعتذر ورفض الاشوااااق وانكرها= وارتح وخله يزووود هباااال مجنونك

والله اني لاجرح القاف لين يسيل دمه=واتعبث في معانيه وابيّح كنينه
واجمعه .. وافرقه نرفزه ..وارجع والمه=لين يهدى من عناده.. ويبدي لي حنينه
لو زعل مني وضيقت صدر ابوه.. وامه=والله اني ماتركه دام ماكحلت عينه
وان زعل مني.. ومن سيرتي.. وانا ابن عمه=ليه مايزعل من انصافي اللي مبتلينه
آآآآخر صفوف اهل الشعر.. صارو ا فيه أئمه=لعن ابو شعرٍ بسط لابسط اصحابه يدينه
الشعر نزل عباته.. وشلفاه.. ومعمه=شوف حتى الشعر.. كيف اثرت فيه المدينه
صار سهل .. وكل من وده يخمه.. يخمه=بعد كانت هيبته هيبة الليث بعرينه
ودام كل انسان يارد .. ويشرب من مجمه=يتحمل موقفي ضده.. الله لايهينه
لايقول انه بحر صعب.. واني ما أهمه=البحر ياما هرب ماه عن وجه السفينه
احترمته.. مير شفت احترامي له مذمه=يوم مايلقي لي البال وش بيني وبينه
لامتى استحمل عناده.. وانا بالجوف اضمه=ولامتى وانا اترجاه.. واقبل جبنه
لي عليه انه يجيني لامني جيت يمه=كل ماطلب منه فزعه يناولني يمينه
وله علي اني لاعانق بحرفه كل قمه=مااذبح من افكاري لخاطره غير السمينه

ماتهون الدمعه اللي على خدك جرت=علمتني كيف الاحساس بالغيره يكون
كنها يوم استهلت على الخد وسرت=خنجر ٍ مرت على القلب واشبعته طعون
لاذكرها الله بالخير مني لاذكرت=ليلة ٍ صارت مشاريه .. وعتاب .. وشجون
بنت .. انا اكبر من ظنون ٍ على بالك طرت=مثل مانتي عندي أكبر كثير من الظنون
كذّبت عليّه أصدق ظنونك وافترت=الظنون احيان نوع ٍ من انواع الجنون
فكري .. ليه القضيه لهالحد اكبرت=دامت انا كل واحد على الثاني يمون
ياهلا والله وسهلا استهلت وامطرت=في دموع الغيره اللي عليّه ماتهون