سقت النظر من ناظري بالدرابيل=سوقة تبصّر والمعاين فطيني
وأمعنت في سود(ن)علينا مقابيل=قام يتبين سبرهن للذهيني
أخيلهن بالعين مثل السماليل=وإزداد قلبي من دليله يقيني
إنه صحيح العلم ماهو تهاويل=إروايته وإسنادها للثنيني
عن مصدرٍ(ن)ماثوق وحين وتأويل=باللي على الاصحاب والتابعيني
ياصف وصفهن كما حالك الليل=هاذي لها الغاره والاخرى كميني
نوازلٍ تنزل على الحي وتزيل=منها العرب عزيلهم مدركيني
قنديلهم يسلب ويعطون منديل=ومن هول كونه عدهم ميتيني
حل الوهن بقلوبهم والحلاحيل=ماتحول دون إحلوقها باليديني
هدا العساف إجمالها للجماميل=والعود يخشى من ضناه البطيني
فيها لبو وجهين حطوا مداخيل=الآيفون بئس الخوي والقريني
اللي وجوده زاد فردة على الشيل=سوءٍ(ن)على المقفين والمقبليني
دنياء كفاالله شرها والمحابيل=تلعب على ماقيل بالمارتيني
سادوا بها الآشرار وأم الخلاخيل=لها الشبك مجدوع دنياء وديني
وأهل الامانه والخيار المشاكيل=غطأ الكتام إنجومهم لاتبيني
تقاربت والشرق كنه ربع ميل=والغرب عنا مايجي قفلتيني
عصر الحضارة واكبه وإركب الريل=عيش الرفاه وعايش الراهبيني
واللي تحراء باشقر الريش لسهيل=راعي ولع لايوقض الغافليني
قالوا يهيد ونكحل العين بالميل=حتى إنخلي كل قاسي يليني
وقالوا وقالوا والنوايا مغاليل=والرب بالمرصاد للماكريني
وبرادة الله ينتهي كل ماقيل=بفك الآسير ونصرة الصالحيني