يانجم ياللي في سما الكون وضاح=سلم على المضنون دامك تمره
قله ترا برق الغلا يمكم لاح=تمطر مزونه بالغلا والمسره
اشتاقله والشوق يانجم فضاح=لو ماتكلم صاحبه باح سره
تقرا تعابيره بلا هرج وافصاح=تفضح خفاه دموع شوقٍ يجره
إن مالقيته تلتقي منا الاروح=روحي تزوره كل يوم بمقره
متوشحه وده على قلبي وشاح=اخلص وفاه ومد مكنون دره
لوراح عمري فدوته يوم لو راح=مانساه لين الجدي يصبح مجره
والابل تاخذ من عطارد لها مراح=ترع حماه ولاشكت جور حره
كن المطر في تربته تو ماطاح=نجمٍ لهيب الشمس يزيد حره
وانا فؤادي من غلا وشوق بي فاح=فوحة دلالٍ جنب جمرٍ تكره
ريح الشمال الي تلفح تلفاح=مره يسار ومره ايمين مره
واللي مركبهن يلوح بملواح=مشغول عنهن يم طيره وحره
قبل المغيب وخايف الطير لاراح=يمسيه ليل ويفتقد منه جره
يانجم ياللي في سما الكون وضاح=سلم على المضنون دامك تمره

ترا القلم لونزف عن خاطري حبره=باقي علومٍ بقلبي ماذكرناها
ياصبر قلبي على بلواه ياصبره=كاس النكد من حياتي كم شربناها
استنطق الحرف والقا وسطه العَبره=تخنق حروفي عن المعنا وتنهاها
ياقوة الله معايه ضاعت الدبره= والعين من مابها لي نثرت ماها
كسر الخواطر صعيبٍ يا عرب جبره=والروح من جرحها ياكبر بلواها
ماكني الا اشيل .طويق في كبره= وكن المحاني سعير النار يصلأها
مايوذي الناس غير اللي قصر شبره=يميل والعايله مايوم قداها
لويعتذر عارفينه زين وانخبره=اعذار مثله مضرتها بفحواها
هو يحسب انا لهلحينه على خبره؟= لا والله إلا. الاعيبه كشفناها
اخيره لو كفا شره واخذ عبره = يصير شفنا جميلة كان سواها

مالوم قلبي الياحبك ومالومه= لاعطاك صدق الحبة مع مشاعرها
ولالوم طرفي اليامنه جفى نومه=وشلون ترقد عيوني يامسهرها؟!!
وانته الياغبت كن النفس ماكلومه=وكن المحاني بها نارٍ تساعرها
لهفة وليفٍ تزايد فيه وتزومه = حتى عيونه تنثر له عبايرها
قلبه عطاك الغلأ واتقن لك.رسومه=في لوحة الود بشعوره يصورها
رسم بها وردة الاشواق يشمومه=تفرعت بالخفوق وفاح عاطرها
وجتله حروف المثل بحساس مزهومه=احلى العناوين بحروفه يسطرها
قلبٍ تفردت به واعطاك مرسومه =اشواق بالثانية يمك يصدرها
بحرالغلا سابحه .بالشوق و يعومه=اصداف دُره ينثر لك جواهرها
لو سامه اللي رفع له بالغلأ سومه=ماعطاه من نظرته والناس حاقرها
بكيفهم لوتزايد منهم خصومه=متجاهلٍ صاغر العالم وكابرها
يعيش في جو ودٍ تمطر غيومه=سحايبه من رهيف حساس مصدرها

تحية اجلال لكل من يقف خلف هذا الصرح
من مؤسسين ومراقبين ومستشارين وكل عضو ينتسب لهذا الموقع

لثنو عليه طيبين السلومي=مالي على الباقين شرهات وشعاد
لو كان به من يقتفي للعلومي= اللي مسويلي بها طارق زياد!!؟
يبقى بعيني مثل سمل الهدومي=لاناشدة عنه ولا القلب نشاد
الحرف عندي مثل حرٍ يحومي=يصيد من جزل المثل صيد لاصاد
اعطيته المعنى وقام بلزومي=ولاني بحاجة كل زاري ونقاد
عمر الحكي ماهد قوة عزومي=انا كذا من خلقتي غصب وعنااااد
معناي عانق في سماي الغيومي=وامطر على بيض الورق عذب الاشهاد
حلاه ينسيني مرارة اهمومي=يوم اتسلى فيه زادٍ بلا زاد
هذا وباشكر كل ربعي وقومي=بالموقع اللي يعتلي عال الأمجاد
لهم التحية عد برق الوسومي=وعداد مايكتب من القيل بالضاد
تمت وخشم بليس غصب مخزومي=ولافيه دخانٍ بلا عود وقااااد

الشعر ينبع من هواجيس الاضلاع=والحرف يبني بالمعاني بيوته
احد شكابه لوعته يوم يلتاع=واحد شكابه فقد غالي وموته
ولاظن به مرتاح في كل الاصقاع=كلٍ يرد الاه في لحن صوته
وانا وشعري والمعاني والابداع=لعبة زمان اوراق همي بلوته
قلبي تجرع من همومه تجراع=واضحت هموم الوقت شربه وقوته
يشكي نكاد الهم في كل الاوضاع=مارتاح قلبي. كل همٍ يشوته
كن النفس من ضيقة الهم بنزاع= وشراع حظي معدماتٍ بتوته
ماطاعني وقتي ولا الحظ لي طاع=مترديه بين الخلايق بخوته
ضاع الأمل ياللأسف يوم لي ضاع=حفل الفرح عقب طبعنا كروته
ماعاد يغريني بها عزف وايقاع=مر الزمن عفنا بقايا سحوته

ياعين لاتبكين حيٍ لنا مات=اقفا وقفت به رياح الزماني

ياعين وش ذكرك في حي الاموات=اللي بقلبي حيزه والمكاني
ياعين لو دمعي يرده لنا جات=عبرة تروي من طرفها السواني
ياعين ماب الموت دبرة وحيلات=اقفا وانا بقيت عقبه واعاني
ياعين ضيقة في خفى الروح حزات=تهز لي ياعين كامل كياني

هيهات يرجع واحدٍ مات هيهات=لو تنطبق سبع السماوات ثاني
امرٍ حكم به خالق الكون وايات=سبحان من نزل السبع المثاني
امنتبه عن كل ملحد وزلات=واستغفر الله كان زل الساني
ياعين خفي من دموعك مراعات=للي شكى غربة مكان وزماني

ياحرب ياعلين الاذكار والكار=ياللي لكم سيرة علت كل سيره
حتى فعول اطفالكم لوهم اصغار=فخرٍلكم ياحرب في كل ديره!
ياقدرة الله يامنيعين الاسوار=الله عطاكم بالمعزة مسيره
مسيرةٍ في كل مجدٍ لها اطوار=تملك لباس المجد ماتستعيره
اهل فخر يبقى للجيال تذكار=عبر السنين الماضيه والاخيره
حريبكم توقد على كبده النار= يوم اليالي بالعرب مستديره
ياما حميتو بالقى عكش الاوبار=اليا اقبلت صفر السبايا مغيره
اكبار والله في فعايلكم اكبار=ياسعد من حرب العزيزة تجيره
واليوم يا اهل الخير شأن الاقدار=ان الحويفي في ضروفٍ عسيره
يومه حكم عليه في حد بتار=ولع فؤاده مثل نار السعيره
ينخا لكم ياحرب تكرار ومرار=الكسر مايبرا بليا جبيره
والحر مايظلم وله ربعٍٍ احرار=وانتم حرار ولا عليكم كبيره
تصغر لكم كل الصعايب وتنهار=من عزمكم تصير حبة شعيره
تكفون ثم تكفون مادونه اعذار=انتم لها يا اهل الوجيه السفيره